Pweng sin Prestuhnsi Se Met, Julahe 2013
Facluh Enenuh Payonir uh Mihsenge
Nuh sin mwet pucspucs, fahsr luhn payonir ke yac 1847 ah tiac muhtwacwacack Nauvoo, Kirtland, Far West, kuh New York tuhsruhk ma e fin acn England, Scotland, Scandinavia, kuh Germany. Tuhlihk srihsrihk ah tiac kuh in kahlwem na pwacye luhlahlfongi kuh ma mokleack pahpah ninac kiyaclos in som liki sucu, kawuck, insewowo, ac moul wo lalos.
Tuhlihk srihsrihk se kuh in siyuck, “Ninac, efuh kuht in som liki lohm uh? Kuht ac som nuh oyac?”
“Fahsruh na, tuhlihk sacohk nuhtihk; kuht ac som nuh Zion, acn sin God lasr.”
Infulwacn moul wo lohm uh ac olwelah luhn Zion oasr inkof na pohlkuhlak ac sralacp se ke Atlantic luhlahp. Suc kuh in ahkuhtweyac sahngweng ma sruokwacni insiyacn mwet ke puhluhn pacl in fahsr ahluhkwelah upac ingoh? Pihrihkyuck ke mahmah mihs luhn Nguhn, ahkkweyeyuck ke sie luhlahlfongi ma fihsrwacsr tuhsruhk kawihl, Mwet Luhlahlfongi payonir ingoh luhlahlfongi ke God ac muhtwacwacack ke fuhsrahsryucsr lalos.
Elos sahflahiyac ah sun acn Nauvoo in sifil mukwilac na in sun ohiyac upac ke inkacnek ah. Suhkan kuclyuck uh akihlenyucki ke mah ac eot ke inkacnek soko ah nohfohn Nauvoolac ne Salt Lake City. Pa kain molo ma moliyuck sin kuhtuh payonir ah. Mahnoltahl puckpucki ke mihslac, tuhsruhk ineltahl oasr ne tok.
Kaho ullac ah kahkahsrihklac, wil ke wackuhn ah kahskahs, mukul watwen uh orekma upac, tuhram in mweun ah sritaclkihnyuck, ac kayoti ah tuhngtuhng. Tuhsruhk payonir ma mokleyuck ke luhlahlfongi ac kalyeiyuck in fahsr nuh met ke pacl upac uh tahfwelah fuhfahsryucsr lalos. Elos kwacna yuck:
Fahsruh, Mwet Wo, tiac sahngweng ke rekma;
Ke engan ke fahsr lom.
Fin upac nuh ke kom liye inge,
Luhng kuhlwacng innek lom. …
Kwewa wo! Kwewa wo!1
Payonir inge esamwack kahs luhn Leum ke El fahk lah mwet Lal enenuh in srihkeyuck ke ma nuh kwewa, elos in muh kuh in ahkolah in eis wolacna lalos Yohrohl, finne ke wolacna luhn Zion.2
Fahsr luhn pacl uh oruh kuht muhlkuhnlah ac ahksrihkyelah luhngse lasr nuh selos suc fahsr ke fuhsrahsryucsr na ngal sac, som liki inkacnek emtuhng soko ke kuclyuck wacngihn ine kac ah. Ac fuhkah nuh ke ma upac mihsenge uh? Yac wacngihn inkacnek eoteot in fahsrkihn kac, wacngihn finohl upac in fanuhk, wacngihn acn loal in tuhpal, wacngihn inkacnek in oreklac, wacngihn infacl in tuhpalyuck? Kuh oacna oasr enenuh na pwacye se ke nguhn luhn payonir sacn in kol kuhtlac liki sensen ma oruh in nwekkuhtlac ac kol kuht nuh ke sie Zion luhn wo?
Ke yac pucspucs e ke sahflah luhn Mweun Ahkluo Facluh ah, akwuck fal ke moul nwacsnwacs uh srihksrihkeni. Pihsen ma koluk uh yohkyohkwaclihk; mwet uh tiac tui in oruh koluk nuh sin sie sin sie. Mwet puhkantwen suk kuhnausyacn moul fuhlwact ac puhsisacl uh, suk pwacr ke kihtin pacl in kihsackuhnlah engan luhn ma pahtpaht uh. Oruh kuht ikolyac mihslac.
Kuht muhlkuhnlah ke Mwet Greek ac Rome ah kuhtanglah arlac wo ke sie facluh ahkmas ac ohiyac ke sahflahiyen orwaclah wo sac—ke sie alsracngwesr ac muhnahs sahflahiyac ah kuhtanguhltahllah nuh ke muhsahllah laltahl. Ke sahflahiyac ah, yohk liki na ke eltahl luhngse sukohsohklah, eltahl luhngse ma wo ac moul in insewowo; ac wacngihnlac nohfohn—moul in insewowo ac wo ac sukohsohklah laltahl.
Nimet lohacng nuh ke mwe sruhf luhn Setuhn; tuh, tu kuh ke ma pwacye. Kena suhfal luhn nguhn uh fah tiac oreklac ke sie suk ma wacngihn sahflahiyac ke engan inmahsrlon mwe ahkpwacr luhn ikoac ac orekma koluk.” Orekma koluk uh tiac kuh in oruh moul nwacsnwacs se. Koase uh tiac ahkkahlwemye luhngse. Sahngwengtoht uh tiac sang puhlaik. Suhmuhngnguh uh tiac mokle luhlahlfongi.
Kuhtuh upackihn in kutong isruhnyuck ac sramsram in ahkkoluk luhn mwet lahlfon ma ahkkolukye moul nwacsnwacs, orekma suwohs, ac ahkostwen nuh ke masap luhn God uh. Tuhsruhk facluh nuhnkuh muh wacngihn srihpac in ahkostwen nuh ke ip yohk uh. Ke suhpweyuck Noah in muhsahi soko oak ah, mwet lahlfon pucspucs liye nwacsnwacsiyacn kuhsrao ac isruhn ac lwesrihk—ne ke af ah tuhkuh.
Kuh kuht enenuh in sikalweni in lutlutkihn kain lesin yohk molo ngwe? Pacl uh eklac, tuhsruhk ma pwacye uh srwackna fahsr. Ke kuht tiac srihke in eis woiyacn ohiyac sikyak ke pacl somlah ah, kuht allah in kalweni kac ke loaliyac, kweokiyac, ac ngaliyac kac kwewa. Yac kuht tiac lahlmwetmwet in ahksol suc etuh muhtwacwacyac ah liki sahflahiyac—Leum lasr, suc orwaclah plwacn in molwelah uh—liki na wet soko ah, suc sruhnga kahtoiyac ah?
Tiksineri se fahkwack kalmeyacn payonir se muh “mwet se ma som met liki nuh kwewa in ahkolah kuh ikacslah inkacnek soko nuh sin mwet sahyac uh in ukwe.”3 Kuht kuh in luhman mokle kuht sifacna ke puhlaik ac tiac ahlohloh ke srihpac se ma ahkuhtweyac payonir ke fihl se tari ah? Nga kom kuh in, ke pwacyeiyac uh, oacna payonir uh?
Nga etuh lah kuht kuh in oacna. Wee, facluh enenuh fuhkah payonir mihsenge!
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn First Presidency Message, July 2013. Kosraean. 10667 868
Luti ke Pweng Se Inge
Ma suhmuhslah uh ahkuhtweyac lah mwet luti sucu uh pa in “sulkackihn, fahk, ahkkweye, ac luti, ac suli mwet nuh kwewa in tuhkuh nuh yurin Kraist” ( liye D&C 20:59). Motko in fahkwack ke ma sulkackihnyuck ac ma suliyuck lun pweng lal Prestuhn Monson nuh selos suc kowos forfor nuh yohroh an. Kom ac kuh in ke sramsramkihn nuh selos inkacnek in akihlen ac ukwe mwe srihkasrak suwohswohs uh, oruh in tiac kuhtasrihk, ac lutlut ke tahfonglac luhn mwet sahyac uh. Siyuck sin mwet kowos luti an lah elos kuh in oacna payonir mihsenge uh fuhkah.