Klumech er a First Presidency, Ongeuid el buil 2013
A Beluulechad er Chelecha el sils a Ousbech er a Ruchelel
A omerolir a ruchelel er a 1847 a dimlak lomuchel er a Nauvoo, Kirtland, Far West, me a lechub eng New York ng bai ulemuchel er a cheroid el beluu er a England, Scotland, Scandinavia, me a lechub eng Germany. A remekekerei el ngalek a dimlak el sebechir el mtebengii a mesisiich el klaumerang el millisiich a rengrir a redemerir me a rederrir el di merael e mechititerir a telungalek er tir, a sechelirir, me a mededaes el klengar.
A kekerei el ngalek a locha ulleker el kmo, “Edei, ngerang me kede merolang? Kede mo er ker?”
“Morael el mei, e kesiokel el ngalek; e kede mo er a Zion, el belual a Dios er kid.”
A delongelel a selbechakl el klengar er a blai me a iaksok er a Zion eng dilechor a kengaol el debel a mesisiich el Atlantic. Ng techa sebechel mo ouchais er sel dakt el mlo olsarch er a rengrir er tia el kengaol el omerael? Ngulekiu a uleklatk el lulengululau a Chedaol Reng, ultekau er a mesisiich el klaumerang, e tirka el uchelir a resanto a ulemerang er a Dios e mocha omekall el merael.
Me a le bochang er a Nauvoo e te liluut el mo chemau a ringel er tia el omerael. A bdangch er a debull el dellemakl er a ked me a bad a olchotel a cherrengelel omerael er a Nauvoo el mo er a Salt Lake City. Tia a berraod el blo loluked er ngii a rebebil er a ruchelel. A bedengir a delakl el ngara budech, eng di ngklir a di melemolem el obengked.
A mesaul el kerbou a mlo outubuach, a ochil a kareta olengchongch, rebekeu el chad oureor, taiko er a mekemad a melebusech, me a charm er a ked a lmangel. Eng di a remesisiich a klaumerang er tir e meduch a rengrir el ruchelel a di millemolem. Te mle blechoel el mengitakl:
Mei, mei, el Santo, diak a ureor el demedakt;
A deureng obengkem er a omerollem.
Altang omomes eng meringel tia el omerael,
Kerasia a ruklem er chelchal sils. …
Rokui a di ungil! Rokui a di ungil! 1
Tirka el ruchelel a millebedebek a tekingel a Rubak: “A rechedak a kmal kirir el mo melasm e ucharm a rokui el tekoi, me te mo keldmokl el mo nguu a klebkall el bo kumesterir, ng klebkellel a Zion.”2
A klemengetel a taem a diak el suld a uldesuam e longekerei a sulam el mo er tirke el milrael er a meringel rael, e di mlo mechei a olengchelir el diak a ngakl er ngii el debull. Me ngera ongarm er chelechal sils? Ng diak a bekbeduul el rael el bo dorael, ng diak a ibekbad el rois el bo dolemiakl, ng diak a deliobech el bo doleong, ng diak a rael el bo dolemotem, ng diak omouachel el bo doleiull? Me a lechub eng ngar ngii a usbechellel er chelechang se el reng er a ruchelel el mo omekrael er kid el mo cheroid er a aike el kengaol el mo tomellid e mekrolid el mo er a Zion?
Betok el rak er a uriul er a Ongerung el Mekemad er a Beluulechad, a deruchellel a ungil blekeradel a di merael el meriou. A delngerenger a mla olengasech; a ungil blekeradel a ruebet el meriou. Te betok a ngara meklou e bekerurt el mlai er a kerior, te osiik el olsiich a rengrir er chelechang e mo choitii se el diak a ulebengelel deureng. Me a leuaisei e ke de metom er a budech.
Kede obes el uase te milkerang a rechad era Greece me a Rome e mirrael mo mesisiich er a bersik el beluulechad e milkerang e te mlo mechitechut—ng milkerang a saik me a chelitechut e tomelterir. Ea uriul, eng mede me te mle sorir a illmokl, eng di ng liluut el kmal sorir a kellechakl e ungilbesul klengar; e te di tilom el rokui—ungilbesul klengar me a ilmokl.
Lak metuchakl er a omengetikaik er a Diabelong; bai, mdechor el mesisiich er a klemerang. A urungulel a reng a diak bo el betik er a diak a ulebengelel deureng alsekum eng teloi er a nglemokel reng me a klengit. A klengit a diak el sebechel mengetakl er a klungiaol. A ketui a diak el loldubech a beltikelreng. A bedelkall a diak el beskid a blekeu. Doaoch el reng a diak longesuseu er a klaumerang.
A rebebil a metik er ngii el meringel el outekangel a ulekakou me a mekngit el tekingir a rekebelung el chad el oltuub a klikiid er a deleboes, melemalt, me a oltirakl a llechul a Dios. Eng di a beluulechad a melemolm el ouketui aika el osisechakl. A Noah er se er a le mechedereder el mo melasch er a mlai, ea remengebelung el chad er a buai a ulemes me a el ungil a eanged e te ulemtelub e ulemekakou—el choielii a chull el mei.
Ng kmal kired el mo blechoel mesuub aika el kesiokel suobel? A taem a mengodech, eng di a klemerang a di melemolem. Alsekum e kede metom el uker a klubeled er a mla memong, e ke de mekerior el lemuut el mo obangel a klengit el reng, me a ongarm, el de blo de siseb er ngii. Ng diak a llemesel a rengud el mo orrenges er Ngii el medengelii a uchelel el mo er a ulebengelel—a Rubak er kid, el kildmeklii a telbiil kirel a diak a ulebengel klengar—ng bai diak el bersoech, el ouketui er a klebekelel?
A belkul a ruchelel er a dictionary a kmo “ng tang el choiakuchei el mengetmokl malechub eng mekengii a rael el mo er a rebebil el choiakuriul.”3 Ng sebeched el mo bekeu e otekangel a moktek er a ruchelel er a mla memong el telecheroll? Ng sebechem, kau me a ngak, el mo ruchelel?
Ak medengei el kmo ng sebeched. Ng merang, a beluulechad er chelecha el sils a ousbech er a ruchelel!
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/12. Kengei er a oidel: 6/12. Oidel a First Presidency Message, July 2013. Palauan. 10667 881
Osischeklel Tia el Klumech
A chedaol llechukl el mesaod el kmo a rechad el oldingel e olsisechakl a mo “mengelechel, omeketakl, olsisechakl, e mengemedaol el mei er a Kristo” ( D&C 20:59). Bo beketakl aike el tekingel a President Monson el mengelechel e mengemedaol el mo er tirke el moldingel er tir. Altang soam el mo mengedecheduch er tir el kirel a rael el lebo lolechesuar e oltirakl a melemalt el okesiu, mo cheroid er a cheleblad, e mesuub er a cheleuid er a rebebil er a rechad. Moker er tirke el molsisechakl er tir el kmo te mekerang e mo ruchelel er chelechal sils.