Fas Presidensi Mesej, Ogis 2013
Luksave, Tingbaot mo Talem Tangkyu
God i askem blong yumi talem tangkyu long Hem from eni blesing we yumi kasem long Hem. Hem i isi long yumi blong talem sem toktok nomo long prea blong yumi blong talem tangkyu, mo plante taem, yumi ripitim semfala toktok, be yumi rili mas gat tingting blong talem tangkyu blong yumi olsem wan presen we yumi wantem givim wetem hat i go long God. Yumi mas givim ol tangkyu long God tru long Spirit (luk long D&C 46:32) blong mekem se yumi filim tru fasin blong talem tangkyu long wanem we God i bin givim long yumi.
?Olsem wanem nao yumi save tingbaot wan smol pat blong evri samting we God i bin givim long yumi? Aposol Jon i raetemdaon wanem we Sevya i bin tijim yumi abaot presen blong stap tingbaot samting we i kam tru long presen we i Tabu Spirit: “ Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala” (Jon 14:26).
Tabu Spirit i mekem yumi tingtingbak long ol samting we God i bin tijim yumi long hem. Mo, wan long ol wei we God i stap tijim yumi, hem i wetem ol blesing blong Hem; mo olsem ia nao, sapos yumi jusum blong yusum fet blong yumi, Tabu Spirit bae i tekem ol gudfala fasin blong God blong stap kaen i kambak long tingting blong yumi.
Yu save testem hemia long prea tedei. Yu save folem komanmen ia blong mas talem tangkyu long Lod we i God blong yu from evri samting (luk long D&C 59:7).
Presiden Esra Taf Benson (1899–1994) i talem se prea i givim taem ia blong mekem hemia. Hem i talem se: “Long wan taem, Profet Josef i bin talem se wan long ol sin we i moa bigwan we bae ol Lata-Dei Sent bae oli rong long hem, hem i sin blong no save talem tangkyu. Mi ting se plante long yumi i no bin tingting long hemia olsem wan bigfala sin. I gat wan fasin we i stap long yumi, we, long ol prea mo ol toktok blong yumi long Lod, yumi stap askem sam moa blesing. Be, samtaem, mi filim se yumi nidim blong givim moa prea blong stap talem tangkyu, mo talem hat blong yumi from ol blesing we yumi kasem finis. Yumi stap gat fulap moa long hemia.”1
Yu save gat wan eksperiens wetem presen we i Tabu Spirit tedei. Yu save stat blong talem wan praevet prea blong talem tangkyu. Yu save stat blong kaontem ol blesing blong yu, mo afta, stop smol taem. Sapos yu yusum fet blong yu, wetem presen we i Tabu Spirit, bae yu faenem ol memori blong ol narafala blesing we bae oli fulumap maen blong yu. Sapos yu stat blong talem tangkyu from wanwan long olgeta, bae prea blong yu i tekem taem smol bitim oltaem. Bae yu stat blong tingbaot, mo semtaem, fasin blong tangkyu bae i kam.
Yu save traem semfala samting taem yu stap raetemdaon wan samting long jenol blong yu. Tabu Spirit i bin helpem ol pipol wetem hemia, stat long stat blong taem. Yu tingbaot se buk blong Moses i talem se i gat wan buk blong histri we oli holemtaet i stap, we oli bin raet insaed long hem long lanwis blong Adam, from se God i bin givim raet long plante long olgeta we hem i bin singaotem blong oli raetem samting tru long spirit blong insperesen (luk long Moses 6:5).
Presiden Spensa W. Kimbol (1895–1985) i bin tokbaot wei ia blong raetem samting wetem insperesen long wei ia: “Olgeta we oli stap raetemdaon wan buk blong histri, bae olgeta nao bae oli save tingting long Lod long evri dei laef blong olgeta. Ol jenol oli wan wei blong kaontem ol blesing, mo blong livim i stap wan lis blong ol blesing ia i stap, blong laen we i kam biaen long yumi i save ridim.”2
Taem yu stat blong raet, yu save askem yuwan: “?Olsem wanem nao God i bin blesem mi mo olsem wanem Hem i blesem olgeta we mi lavem tedei?” Sapos yu mekem hemia plante taem mo wetem fet, bae yu luk se bae yu stap tingbaot ol blesing. Mo samtaem, bae yu tingbaot sam presen long maen blong yu, we yu no bin luk dei taem, be afta nomo, mo bae yu save se i bin han blong God we i bin tajem laef blong yu.
Mi prea se bae yumi traehad oltaem, wetem fet, blong luksave, tingbaot mo talem tangkyu from ol samting we Papa blong yumi long Heven, mo ol samting we Sevya blong yumi i bin mekem, mo oli stap mekem blong openem rod i gobak long Tufala.
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong First Presidency Message, August 2013. Bislama. 10668 852
Yusum Mesej Ia blong Tij
Long mesej blong hem, Presiden Aering i invaetem yumi blong tingbaot kaen mo gudfala fasin blong Papa long Heven long prea blong yumi. Toktok raon, wetem olgeta we yu stap tijim, long olsem wanem nao, fasin blong prea wetem hat blong talem tangkyu i helpem yumi blong luksave han blong God long laef blong yumi. Tingting blong nildaon blong prea wetem olgeta we yu stap tijim, mo talem long huia we i stap talem prea, blong talem tangkyu nomo.
Yu save stadi tu long saed blong fasin blong talem tangkyu taem yu ridim ol ves ia antap long ol ves we Presiden Aering i bin tokbaot: Ol Sam 100; Mosaea 2:19–22; Alma 26:8; 34:38; Doctrine and Covenants 59:21; 78:19; 136:28.