2013
gud laef
Ogis 2013

Visiting Tijing Mesej, Ogis 2013

gud laef

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu. Blong kasem moa infomesen, go long reliefsociety.lds.org.

Fet• Famle • Help

Ol stamba tingting blong program blong Jos long saed blong gud laef, i blong helpem ol memba blong oli save dipen long olgetawan, blong kea long olgeta we oli pua mo olgeta we oli stap long nid, mo blong givim seves. Program blong Gud Laef i stamba blong wok blong Rilif Sosaeti. Presiden Henri B. Aering, Fas Kaonsela long Fas Presidensi, i bin tijim se:

“Lod, stat long stat blong taem, i bin givim ol rod blong ol disaepol blong Hem oli givhan long man. Hem i bin invaetem ol pikinini blong Hem blong givim evri taem, samting, mo laef blong olgeta blong joenem Hem blong givhan long ol narawan. …

“Hem i bin invaetem mo i bin komandem yumi blong tekempat long wok ia blong leftemap olgeta we oli stap long nid. Yumi mekem wan kavenan blong mekem hemia long wota blong baptaes mo long ol tabu tempol blong God. Yumi mekem i kam niu bakegen, kavenan ia long Sandei taem yumi kakae sakramen.1

Anda long daereksen blong bisop, o branj presiden, ol lokol lida oli helpem laef blong ol memba long saed blong spirit mo long saed blong wol ia. Ol janis blong givim seves, plante taem, oli stat wetem ol visiting tija we oli stap lukaotem insperesen blong save olsem wanem blong lukluk long ol nid blong wanwan sista we oli stap visitim.

I Kamaot long Ol Skripja

Luk 10:25–37; Jemes 1:27; Mosaea 4:26; 18:8–11; Doctrine and Covenants 104:18

I Kamaot long Histri blong Yumi

Long namba 9 Jun 1842, Profet Josef Smit i bin givim wok long ol sista blong Rilif Sosaeti blong “givhan long olgeta we oli pua” mo blong “sevem ol sol.”2 Olgeta gol ia, oli stap yet olsem stamba blong wok blong Rilif Sosaeti, mo i kamaot tru long moto blong yumi se, “Bigfala lav i neva sot” (luk longFas Korin 13:8).

Namba faef Rilif Sosaeti jeneral presiden, Emelin B. Wels, mo tufala kaonsela blong hem, oli bin putumaot moto ia long yia 1913, blong mekem se yumi save tingbaot ol stamba prinsipol blong yumi: “Mifala i stap talemaot se stamba tingting blong yumi i blong holemtaet ol tijing, we oli kam tru long insperesen, blong Profet Josef Smit long taem we hem i talemaot plan ia we ol woman oli kasem paoa tru long koling blong prishud, blong stap olsem wan grup we i stret, blong save lukluk long olgeta sikman, blong save helpem olgeta long nid, blong save mekemgud long olgeta we oli olfala, blong givim woning long hem we i no gat wari, mo blong givhan long olgeta we oli nomo gat papa mo mama.”3

Tedei, Rilif Sosaeti i stap go aot raon long wol taem ol sista oli givim jareti, we i stret lav blong Kraes, i go long ol neiba blong olgeta (luk long Moronae 7:46–47).

Ol Not

  1. Henri B. Aering, “Opportunities to Do Good,” Liahona and Ensign, Mei 2011, 22.

  2. Josef Smit insaed long Daughters in My Kingdom: The History and Work of Relief Society (2011), 63.

  3. Daughters in My Kingdom, 63.

Wanem Mi Save Mekem?

  1. ?Olsem wanem nao mi stap mekem miwan i rere blong lukaot long miwan, mo blong lukaot long famle blong mi long saed blong spirit, mo tu, long saed blong wol ia?

  2. ?Olsem wanem nao mi save folem eksampol blong Sevya taem mi stap help blong lukluk long nid blong ol sista we mi stap lukluk long olgeta?