Yut

Mi Bin Save Kam blong Letem Sore blong Mi I Go

I kam long Juan Su

Man we i raet, hem i blong Taiwan.

Taem we ol fren blong mi, Brata Jen mo waef blong hem, i bin kasem baptaes long wod blong mifala, mi bin glad bigwan. Wan yia afta long baptaes blong tufala, tufala i bin sil insaed long tempol mo boe blong tufala we i bin ded bifo tufala i joenem Jos, i bin sil long tufala. Hem i naes tumas blong luk ol Jen oli gro long gospel.

Afta Brata Jen i bin ded long wan aksiden blong trak, wan yia afta. Afta long aksiden ia, ded blong hem i luk olsem se, i stap long tingting blong mi oltaem mo oltaem mi stap drim long hem. Mi bin wekap wetem wora blong ae i ron mo stap askem bakegen mo bakegen, “?From wanem?” ?From wanem Lod i stap letem trabol olsem ia i stap hapen? ?From wanem wan samting olsem i save hapen long wan naesfala famle olsem?” Wan dei, taem mi stap traehad blong faenem ansa long ol kwestin ia, mi pikimap wan lesen manuel mo ridim ol toktok ia we i kam long Presiden Spensa W. Kimbol (1895–1985):

“Sapos yumi stap tingting se laef long wol ia nomo i evri samting abaot laef, bae harem nogud, sore, fasin blong no gat sakses, mo laef we i sot, bae i wan filing blong harem nogud. Be sapos yumi tekem laef olsem wan samting we i no save finis we i stap finis stat long laef bifo laef ia mo afta i go kasem fiuja blong laef blong yumi we i no save finis afta we yumi ded, afta bae yumi lukluk evri samting we bae i hapen long wan stret wei. …

“?Ol temtesen oli no stap raon long yumi blong testem paoa blong yumi, ol sik oli no stap raon long yumi blong yumi save lanem fasin blong save wet longtaem, mo ded, blong yumi save kasem wan bodi we i nomo save ded mo fulap long glori?”¹

Long tetaem ia, mi jusum blong letem sore blong mi i go mo lukluk fored long promes fiuja ia we i posibol. Mi bin luk insaed long ae blong maen blong mi, Brata Jen i kam tugeta bakegen wetem famle blong hem wetem bigfala glad. Samting ia we mi luk, i bin tekem pis i kam long mi. Mi save se Papa long Heven bae i givim waes ia mo strong tingting ia long yumi, blong yumi fesem ol hadtaem.