Visiting Tijing Mesej, Septemba 2013

Fasin blong Stap Dipen long Yuwan

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu. Blong kasem moa infomesen, go long reliefsociety.lds.org

Pikja

Rilif Sosaeti sil

Fet, Famle, Help

Blong stap dipen long yuwan i fasin blong save mekem samting, komitmen, mo hadwok ia blong givim yumiwan mo ol famle blong yumi ol samting long saed long spirit mo ol samting blong wol.¹

Taem yumi lanem blong putum long aksen, ol prinsipol ia blong stap dipen long yumiwan insaed long ol hom mo ol komuniti blong yumi, yumi gat ol janis ia blong tekem kea long olgeta we oli pua mo stap long nid mo helpem ol narawan blong oli kam blong stap dipen long olgetawan mekem se oli save stanap strong long ol hadtaem.

Yumi gat spesel janis ia mo wok ia blong yusum ejensi blong yumi blong kam blong stap dipen long yumiwan long saed blong spirit mo long saed blong ol samting long wol. Taem hem i stap tokbaot fasin blong stap dipen long yumiwan long saed blong spirit mo olsem wanem yumi stap dipen long Papa long Heven, Elda Robet D. Hels blong Kworom blong olgeta Twelef Aposol, i stap tijim se: “Yumi kam blong jenis mo dipen long yumiwan long saed blong spirit taem yumi laef folem ol kavenan blong yumi wetem prea—taem yumi klin inaf blong tekem sakramen, stap klin inaf blong gat wan tempol rekomen, mo stap mekem sakrifaes ia blong givim seves long ol narawan.”²

Elda Hels i bin givim kaonsel ia long yumi blong kam dipen long yumiwan long saed blong ol samting blong wol, “we i blong gat wan edukesen we i go bitim sekendri level o long rural trening senta, lan blong wok, mo laef folem wan laef we stret nomo long mane we yumi winim. Taem yumi stap longwe long ol kaon mo stap sevem mane naoia, yumi stap rere blong givim wan fultaem seves i go long Jos long ol yia we i stap kam. Stamba tingting bihaen blong stap dipen long yumiwan long saed blong spirit mo long saed blong ol samting long wol, i blong tekem yumi i go long wan ples we i moa hae mekem se yumi save leftemap ol narawan we oli stap long nid.”³

I Kamaot long Ol Skripja

Matiu 25:1–13; Fas Timoti 5:8; Alma 34:27–28; Doctrine and Covenants 44:6; 58:26–29; 88:118

I Kamaot long Histri blong Yumi

Afta we ol Lata-dei Sent oli bin kam tugeta long Sol Lek Vale, we i wan drae ples we i nogat man long hem, Presiden Bringham Yang i wantem olgeta blong oli gro i kam antap mo stanemap ol strong haos. Hemia i minim se, ol Sent oli nidim blong lanem ol skil we i save helpem olgeta blong kam blong stap dipen long olgetawan. Folem hadwok ia, Presiden Yang, i gat bigfala tras long wanem oli save mekem, ol talen, fasin blong olgeta blong stap fetful, mo gladhat blong ol woman, mo hem i leftemap tingting blong olgeta long sam spesel wok long saed blong ol samting blong wol. Nomata we sam spesel wok blong ol Sista blong Rilif Sosaeti i jenis smol tedei, ol stamba prinsipol ia oli stap semak:

Lan blong lavem wok mo no les.
Kasem wan spirit blong mekem sakrifaes yuwan.
Akseptem responsabiliti blong yuwan blong kasem paoa long saed blong spirit, helt, edukesen, wok, mane, kakae mo ol nara samting we yu nidim blong laef.
Prea from fet mo strong tingting blong mitim ol jalens.
Mekem olgeta we oli nidim help, oli kam strong moa.⁴

© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13. Oli letem translesen: 6/13. Translesen blong Visiting Teaching Message, September 2013. Bislama. 10669 852

?Wanem nao Mi Save Mekem?

?Olsem wanem nao mi stap helpem ol sista we mi stap lukaotem olgeta, blong oli save faenem ol ansa long ol nid blong olgeta long saed blong ol samting blong wol mo long saed blong spirit?
?Mi stap kam strong blong mi dipen long miwan long saed blong spirit taem mi stap rere from Sakramen mo stap sakrifaes blong givim seves?