Fas Presidensi Mesej, Septemba 2013
Stap olsem ol Sent blong Evri Taem
Taem mi wan smol pikinini, mi gat ol memori blong wan pat blong wol, we i save stap olsem wan pikja blong postkad we i stap soem ol taem blong yia we oli stap jenis. Wanwan manis we i pas i gud mo i naes tumas. Long taem blong wan naesfala dei blong winta, fres sno i bin kavremap ol hil mo ol rod blong taon, olsem wan blangket. Spring taem, i tekem i kam ren we i klinim evri samting mo mekem ol niu lif blong tri mo gras i gro mo karem flaoa. San we i saen klia, i mekem ol skae oli blu gud long taem blong sama. Mo long otom taem, evri grin kala ia i jenis i kam long ol naesfala orenj, yelo mo red kala. Olsem wan smol pikinini, mi bin lavem wanwan long ol Taem ia, mo kam kasem tedei, mi lavem wanem we i stap long ol Taem ia mo ol samting we i mekem ol Taem ia oli defren long ol narafala Taem.
Yumi, tu, yumi gat ol Taem long laef blong yumi. Sam oli gud mo naes. Samfala oli nogud. Sam long ol dei blong laef blong yumi, oli olsem ol naesfala pikja long wan kalenda. Mo yet, i gat sam dei mo sam samting we i mekem hat i soa mo i save tekem i kam insaed long laef blong yumi, ol dip filing blong nogat hop, gat nogud tingting mo kros.
Mi sua se long wan taem o long wan narafala taem, yumi evriwan i bin gat tingting ia se, bae hem i gud moa sapos yumi go stap laef long wan ples we i fulap long ol dei we i gat ol gudfala taem nomo mo stap longwe long ol nogud taem.
Be hemia i no posibol. Mo tu, i no wanen oli wantem long yumi.
Taem mi lukluk bak long laef blong miwan, mi save luk save se, ol taem we mi bin gro bigwan long hem, hem i long taem we mi stap pas tru long ol raf taem ia.
Papa blong yumi long Heven we i waes evriwan, Hem i bin save se blong ol pikinini blong Hem, oli gro i kam ol man mo woman we Hem i bin mekem blong oli kam, bae oli nidim blong eksperiensem ol taem blong hadtaem long rod blong olgeta insaed long laef long wol ia. Profet Lihae long Buk blong Momon i talem se, taem i nogat fasin blong go agens, “stret fasin i no save hapen” (2 Nifae2:11). Hem i tru tumas, hem i ol strong fasin blong laef ia nao, i letem yumi blong luksave, komperem mo stap glad long switnes blong laef (luk long D&C 29:39; Moses 6:55).
Presiden Brigham Yang i talem olsem: “Evri waes man we oli putum hat blong king long hed blong olgeta, we i hat blong glori, blong bodi we i nomo save ded mo laef we i no save finis, olgeta ia oli mas pas tru long evri hadtaem we oli givim blong ol waes man ia oli mas pas tru long hem, blong oli save kasem glori mo kam olsem wan god. Evri hadtaem we i kam long ol man we i laef long wol ia, bae oli safa … blong rere long olgeta blong oli save filim glad ia taem oli stap long ples we Lod i stap long hem. … Evri tes mo eksperiens we yu bin pas tru long olgeta, i mas hapen olsem blong mekem se yu save kasem salvesen blong yu.”1
Kwestin we i stap, i no we bae yumi fesem ol hadtaem o nogat, be hem i olsem wanem nao bae yumi stanap strong agensem ol strong win. Bigfala janis blong yumi long ol taem ia we oli stap jenis bigwan long laef, hem i blong holem taet ol fetful toktok blong God, from ol kaonsel blong Hem, hem i givim long wan fasin we i no blong helpem yumi nomo blong stanap strong agensem ol srong win blong laef, be tu, blong lidim yumi i go tru. Papa blong yumi long Heven i givim long yumi ol toktok blong hem, tru long ol profet blong hem—bigfala save ia we i blong lidim yumi tru long ol jalenj blong ol had taem go kasem glad ia we i nogat wan toktok i save tokbaot wetem bigfala laet ia blong laef we i no save finis. Ol eksperiens blong yumi oli ol impoten pat blong laef blong yumi blong developem paoa ia, strong tingting, mo gud fasin blong holemtaet trutok mo stret mo klin fasin, nomata long ol hadtaem we yumi stap eksperiens.
Olgeta we oli bin go insaed long ol wota blong baptaes mo kasem presen ia we i Tabu Spirit, oli bin putum tufala leg blong olgeta long rod ia blong stap olsem wan disaepol mo kasem wok ia blong folem gud wetem fet ol mak blong leg blong Sevya blong yumi.
Sevya i bin tijim se, san i saenem “gudfala man mo ol nogud man i semak nomo, mo … ren i kam long ol man we laef blong olgeta i stret, mo long olgeta we laef blong olgeta i no stret tu” (Matiu 5:45). Samtaem yumi no save adastandem, from wanem ol hadsamting we i no fea oli stap hapen long laef. Be olsem ol man blong folem Kraes, yumi gat tras ia se, sapos yumi lukaotem gud, prea oltaem mo stap bilif, … evri samting bae oli wok tugeta blong gud blong [yumi], sapos [yumi] wokbaot long stret rod (luk long D&C 90:24; oli ademap italik).
Olsem ol memba blong Jos blong Hem, olsem ol Sent, yumi glad blong givim seves wetem gladhat long eni weta mo long evri taem. Mo taem yumi mekem olsem, ol hat blong yumi i fulap wetem tabu fet, hop we i gat hiling, mo bigfala lav blong heven.
Be yet, bambae yumi mas pas tru long evri taem ia—tugeta, gud mo nogud. Be nomata long wanem taem, olsem ol man blong folem Jisas we i Kraes, bambae yumi putum hop blong yumi long Hem taem yumi stap wokbaot i go from laet blong Hem.
Long sot toktok, yumi ol Sent blong God, we I gat strong tingting blong lanem abaot Hem, blong lavem Hem, mo blong lavem ol man raon long yumi. Yumi, yumi ol man we oli stap wokbaot long tabu rod ia blong stap olsem ol disaepol we oli blesem, mo bae yumi wokbaot stret i go from gol blong yumi long heven.
From samting ia, letem yumi stap olsem ol Sent, long taem blong spring, sama, fol, mo winta. Letem yumi stap olsem ol Sent long evri taem.
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13. Oli letem translesen: 6/13. Translesen blong First Presidency Message, September 2013. Bislama. 10669 852
Yusum Mesej Ia blong Tij
Fas Presidensi i bin tijim se, “Sam long ol bigfala tijing, oli prijim taem oli stap singsing long ol hym” (Ol hym ix). Taem yufala i stap toktok raon long mesej ia, tingting blong singsing wetem olgeta we yu stap tijim, wan long ol hym ia, o wan nara singsing we i tokbaot stanap strong long taem blong hadtaem: “Tijing blong Jisas oli Stampa Blong Yumi” (no. 6 , STSP); “The Lord Is My Shepherd” (no. 108); o “Yumi Mas Gohed” (no. 10, STSP). Sapos Tabu Spirit i talem, serem wan taem we yu bin fesem ol strong win long laef blong yu we i bin kam wan blesing.