Mbabun
Mutumii Gyaa M’awerɛhow mu
Ɔkyerɛwfo no fi Taiwan.
Ber a m’anyɛnkofo Onuabanyin Chen na ne yer wonumaa hɔn baa me a ward mu no, m’enyi gyee mbordo. Hɔn enuma n’afrenhyia no, wɔsɔɔw hɔn ano wɔ temple mu, na hɔn babanyin a ofii mu ansaana wɔrobɔdɔm Asɔr no, wɔsɔɔw no ano kãa hɔnho. Nna ɔyɛ ahomkã dɛ ibɔhwɛ Chenfo no a worinyin wɔ asɛmpa no mu.
Nkyii Onuabanyin Chen wui wɔ kaar akwanhyia mu afedan no. Akwanhyia ekyir no, nna ɔyɛ dɛ ma daa no wu no da m’adwen do, ma ɔtaataa mo do wɔ adaaso mu. Medze nyisuwa soɛree na misii do mpɛn pii bisaa dɛ, “Dɛn ntsi a? Dɛn ntsi na Ewuradze ma dɛm abɛbrɛsɛ yi ho kwan ma osi yi? Dɛn ntsi dza ɔtse dɛm bɔto ebusua fɛɛfɛw yi do? Da kor bi, ber a medze nsɛmbisa yinom reper no, miyii adzesua nwoma bi na mekenkaan nsɛm yinom a ofi President Spencer W. Kimball (1895–1985) hɔ no:
“Sɛ yɛhwɛ ɔnnkyebo asetsena dɛ ɔyɛ asetsena no ne nyinaa a, nna yaw, awerɛhow, nkõgu, nye abrabɔ tsiabaa yi bɛyɛ esian. Mbom, sɛ yɛhwɛ abrabɔ dɛ ɔyɛ onnyiewiei, a ɔtserɛw fi asetsena a yɛwɔ mu ana yɛreba asaase yi do, kesi owu-ekyir onnyieiwie ndaamba mu a, nna yebotum enya dza osisi nyina ho ntseasee yie. …
“Ana wongyaa hɛn mma nsɔhwɛ ama yeehu hɛn ahoɔdzen, yarba ama yeesũa abotar, owu ama yeetum eebenya bɛkyebo na enyimnyamhyɛ?1
Hɔ noara no, mobɔɔ adwen pɔw dɛ mebegyaa m’awerehow mu na mahwɛ ndaamba no a obotum aba no, na wɔabɔ ho anohoba no. Muhuun Onuabanyin Chen wɔ m’adwen enyiwa mu dɛ ɔnye n’ebusua abɔmu enyigye mu. Dɛm nhunii no dze asomdwee brɛɛ me. Minyim dɛ Ɔsor Egya dze nyansa na akokodur bɛma hɛn ma yɛdze ehyia amandzehu horow.