President a Odzi Kan na n’Apamfo Amandzɛɛbɔ, Fankwa 2013
Ahotseweefo ma Hyɛber Horow Nyina mu
Mowɔ mbafober mu nkaakaa wɔ wiadze afã bi ho a, obotum ayɛ mfonyin krataasin ama afe no mu hyɛber horow a, ɔsesã no. Bosoom biara a otwa mu no yɛ ahomkã na nwanwa. Awɔwber mu da pa mu no, esukwankyeaba fitaa fɛɛfɛw fura mbepɔw nye kuropɔn stiitsi mu nyina. Fefɛwber dze nsutɔree a ɔtsew beebiara nye ebun-ebun a ɔfefɛw beberebe no ba. Ɔhyewber wifua no sen nyaa na ɔyɛ akataenyim bruu fɛɛfɛw ma ewia ne nhyirɛnee no. Na ahamantaber sesã ɔdomankoma nhataw nye nhyiren enyi, ma wɔbɛyɛ akokɔangoa nye memen horow. Meyɛ abofra no, mepɛɛ hyɛber biara, na besi ndɛ no, modɔ no mu kor biara no su nye ne soronkoyɛ no
Hɛn abrabɔ mu so wɔ hyɛber horow. Binom yɛ dɛw na ɔyɛ ahomkã. Binom so nntse dɛm. Hɛn abrabɔ mu nda binom ne fɛw tse dɛ calendar mu mfonyin fɛɛfɛw. Naaso, nda nye gyinabew binom no dze tsirpae ba, na wobotum dze abagura kɛse, ebufuw nye ayawdzi abɛhyɛ hɛn abrabɔ mu.
Megye dzi pefee dɛ, ber bi etwa mu a hɛn nyina enya adwen bi dɛ nkyɛ ɔbɛyɛ ahomkã dɛ yebenya tsenabew wɔ asaase bi do a, nda no nyina sen dɛ hyɛber mfonyin fɛw-mapã, na yekwetsir mber no a ɔnnyɛ enyigye no koraa.
Mbom iyi nnkotum ayɛ hɔ. Nna ɔnnyɛ apɛdze pa so.
Sɛ mohwɛ mankasa m’abrabɔ do a, ɔda edzi dɛ mber a me nyinii ne fã kɛse no, baa mo do, ber a nna murudua ehum ehum hyɛber mu.
Hɛn Ɔsor Egya a ɔwɔ nyansaa nyina no nyim dɛ ama Ne mba eenyin aabɛyɛ abɔdze a Ɔahyehyɛ ama hɔn no, obehia dɛ wonya amandzehu ho sũahu wɔ hɔn ɔnnkyebo ɔbra sar yi do. Mormon Nwoma mu nkɔnhyɛnyi Lehi kãa dɛ sɛ dza otsia nnyi hɔ a “nkyɛ ndzeyɛtsenenee nnda edzi” (2 Nephi 2:11). Nokwar, abrabɔ mu wenwen no na ɔma yehu, yɛdze toto ho, na yɛtse ne dɛw no (hwɛ N&A 29:39; Moses 6:55).
President Brigham Young kãa no dɛm kwan yi do: “Enyansafo a wɔbɔsoa hɔn enyimnyam, bɛkyebo, nye onnyiewiei nkwa ahenkyɛw no, otwar dɛ wodua abɛbrɛse biara a wɔahyehyɛ dɛ enyansafo bodua mu, ana woenya hɔn enyimnyam nye nkwagye ntowdo no. Esian biara a adasamba bodua mu no …. besiesie hɔn ma woenya enyigye wɔ Ewuradze enyim. …. Nsɔhwɛ na sũahu biara hom dua mu no hia ma hom nkwagye.”1
Asɛmbisa no nnyɛ dɛ yebehyia amandzehu hyɛber, mbom mbrɛ yebesi bɔsɔw ehum no. Hɛn akwanya kɛse wɔ abrabɔ hyɛber a daa ɔsesã mu no nye dɛ yebosuo Nyame No nokwar asɛm no mu no dzen, osiandɛ N’afotu no mmboa hɛn ma yensɔw abrabɔ mu ehum nko, mbom ɔma hɛn kwankyerɛ so ma yedua mu. Hɛn Ɔsor Egya dze N’asɛm edua No nkɔnhyɛfo mu ama hɛn— nyimdzee a ɔsom bo a ɔahyehyɛ dɛ obegya hɛn edua taferbanyinmbɔmu hyɛber mu akɔ ahosɛpɛw a onnyi kãbea nye onnyiewiei nkwa ne kan a ɔhyerɛn mu. Ɔyɛ hɛn abrabɔ mu sũahu ne fã tsitsir dɛ yebenya ahoɔdzen, akokodur, nye nokwar a yedze bosuo nokwar na tsenenee mu dzen, ekutukubɔ a ɔbɔto hɛn nyina ekyir no.
Hɔn a woesian enuma nsu mu na wɔagye Sunsum Krɔnkrɔn akyɛdze no dze hɔn anamɔn esi esuafo kwan no do, na wɔahyɛ hɔn dɛ wondzi hɛn Agyenkwa no N’anamɔnkwan no do, nkakrankara nye nokwar mu.
Agyenkwa no kyerɛkyerɛɛ dɛ ewia fir wɔ “nyimpa bɔn nye nyimpa pa do, na ɔtɔ nsɔ gu hɔn a wɔtsen nye hɔn a wɔnntsen do” (Matthew 5:45 ). Ɔtɔfabi a yenntum nntse ase siantsir a ahokyer, dza ɔnnsɛ mpo, toto hɛn wɔ abrabɔ yi mu. Mbom dɛ yɛyɛ Chirst akãdofo yi, yegye dzi dɛ sɛ “[yɛ]hwehwɛ enyiber do, na [yɛ]bɔ mpaa aber nyina, na [yɛ]gye dzi, … ndzɛmba nyina bɔkɔ do yie ama [hɛn] yieyɛ, sɛ[yɛ] nantsew tsenenee kwan do N&A 90:24; woetsim akã ho).
Dɛ yɛyɛ N’Asɔrmba, dɛ yɛyɛ Ahotseweefo yi, yɛsom enyigye na ɔpɛ muara, ma wimu tse biara nye hyɛber horow nyina mu. Na yɛyɛ dɛm a, gyedzi a ho tsew, ayarsã enyidado, nye ɔsor ayamuyie hyɛ hɛn akoma mu mã.
Yɛbɔkɔ do, edua hyɛber horow nyina mu—enyigye nye yaw dze. Naaso, yɛyɛ Jesus Christ No n’akãdofo no, hyɛber a yɛwɔ mu no mmfa ho, yɛdze hɛn enyidado bɔtwer No, ber a yɛnatsew kɔ Ne kan no ho.
Ne sin ara, yɛyɛ Nyame Ahotseweefo a, yeesi pi dɛ yɛbosũa No, yɛadɔ No, na yɛadɔ hɛn fɛfo ɔdasanyi. Yɛyɛ ahohɔ wɔ osũafo nhyira kwan no do, na yɛbɛnantsew enyiberdo akɔ hɛn ndaamba ɔsor fie no.
Dɛm nksi, hom mma yɛnyɛ Ahotseweefo fefɛwber, ɔhewber, ahamantaber, nye awɔwber. Yɛnyɛ Ahotseweefo hyɛber horow nyina mu.
© 2013 by Intellectual Reserve, Inc. Wɔakora ho tumdzi nyina. USA na wotsintsimii. English approval: 6/13. Translation approval: 6/13. Translation of ne Nkyerɛasee First Presidency Message, September 2013. Ne Nkyerɛasee wɔ Fante Kasa mu. 10669 502
Erekyerɛkyerɛ efi Amandzɛɛbɔ Yi Mu
President a Odzi Kan na n’Apamfo akyerɛkyerɛ dɛ, Nsɛmpakã a ɔkrɔn kɛse nye yɛrotow ndwom”Asɔr Ndwoms ix). Ber a ipɛnsapɛnsam amandzɛɛbɔ yi no, susu dɛ enye hɔn a ekyerɛkyerɛ hɔn no bɔtow asɔr ndwom yinom anaa binom so a ɔfa iritsim amandzehu ber mu: “Fapem a Ɔyɛ Dzen” (nkanee 4); “The Lord is My Shepherd” (nkanee 108); anaa “Hom Mma Yɛnkɔ Do” (nkanee 10). Sɛ enya ekenyan a, enye hɔn nkyɛ w’abrabɔ mu ehum hyɛber a ɔdaan nhyira ho asɛm.