Mwet Fuhsr
Nga Kuh In Fuhlwelah Mwe Ahsor Luhk
Mwet sihm se ma Taiwan.
Ke kawuck luhk Tamuhlwel Chen ac muhtwacn kiyacl ah pacptaislac ke ward lasr uh, nga enganwack na pwacye. Yac se tukun pacptais laltahl ah, elos siliyucki lun tempuhl, ac mukul nahtuhltahl suc misac tari met liki eltahl welah Alu uh siliyucki nuh seltahl. Ma wolacna in liye sucu Chen kapwack ke wosasuc uh.
Na Tamuhlwel Chen el misac ke sie ongaiyac ke stosah ke yac se tohkoh ah. Tukun ongaiyac sac, misac lal ah tuhkuh nuh ke nuhnak luhk uh ac kwacna ahktoasrye mwemwe luhk uh. Nga tuhkahkwek ke sronin muhta uh ac siyuck pacl puhs, “Efuh? Efuh Leum El lwelah kain ma koluk inge in sikyak? Efuh kain se enenuh in sikyak nuh sin sucu kahto se inge?” Sie lwen ah, ke nga puhla muhnahs ke kihsen siyuck inge, nga sruhkwack sie puk in lesin ac riti ke kahs inge sel Prestuhn Spencer W. Kimball (1895–1985):
“Kuht fin liye moul inge ke pacl uh muhkwena, na kweok, ahsor, suhfal, ac moul fototo ac ma luhman oacna koluk luhlahp uh. Tuhsruhktuh kuht fin liye moul ke ma pahtpaht se ma muhtwacwacack met liki moul se inge ac som ahluhkwelah misac lasr nuh ke ma pahtpaht, na ma sikyak nuh kwewa kuh in liyeyuck fal. …
“Yac kuht ac tiac eis mwe sruhf an in srihfe kuhiyacsr, mas kuht ac lotwelah mongfihsracsr, misac ma kuht kuh in eis moul ma pahtpaht ac wolacna?”1
Ke pacl se inge, nga sulwaclah in fuhlwelah mwe ahsor luhk ac ngwet nuh ke ma olwelah ac sukohsohk ke pacl fahsruh. Nga liyacack ke nuhnak luhk Tamuhlwel Chen el engan in sifil tuhkweni yurin sucu lal. Liyeyuck sac use nuh sihk mihs. Nga etuh lah Pahpah Lucng El use lahlmwetmwet ac puhlaik in sun ma upac uh.