Pweng sin Prestuhnsi Se Met, Septempuh 2013
Mwet Luhlahlfongi ke Puhlan Pacl Nohfohn
Oasr mwe esam luhk ke nga tuhlihk ke ip se luhn facluh ma kuh in oruh petsac kahto na pwacye kuh in tuhkuh ke eklac luhn puhlan pacl uh. Kais sie mahlwem somlah pa kahto ac wolacna. Ke sie lwen wowo ke pacl ohu, snow suwohs ac nwacsnwacs uh nwacklah finohl ac inkacnek luhn siti an. Spring use af in ahknwacsnwacs ac fahrngwelihk luhn mah folfol sra. Kuhsrao toasr luhn summer orwaclah petsac mihslac folfol ke fihrihr luhn sie faht kahlwem. Ac autumn wolacna ekuhllah sahk uh nuh ke tuhn arulacna kahlwem ke sruhsrah nwacsnwacs, rangrang, ac sruhsrah. Ke nga tuhlihk ac, nga luhngse kais sie puhlan pacl, ac nuh mihsenge, nga luhngse atac ac siena luhn kais sie.
Oasr puhlan pacl uh ke moul lasr pac. Kuhtuh pa fucsrfucsr ac mihslac. Kuhtuh sahyac tiacna. Kuhtuh lwen ke moul lasr uh pa kahto oacna petsac ke kacluhntuhr. Na oasr lwen ac ohiyac sahyac ma oruh puhla toasr ac kuh in us nuh ke moul lasr puhla luhn ahsor, ahngyahng, ac koluk.
Nga muh oasr pacl se kuh luo kuht nohfohn nuhnkuh lah ac wona kuht fin kuh in muhta ke acn se ma oasr lwen sesseslah ke petsac suwohswohs ke puhlan pacl ac eslah pacl upac infulwac an.
Tuhsruhktuh ma inge tiac kuh in sikyak. Oacyacpac tiac ma luhngseyuck.
Ke nga liye ke moul luhk sifacna, fihsracsr in liye lah puhslac pacl kapwack yohk luhk tuhkuh nuh sihk ke nga oasr ke puhlan pacl upac.
Pahpah tuhmasr Inkuhsrao suc etuh ma nuh kwewa El etuh lah tuhlihk Nahtuhl in kapwack nuh ke mwet eltahl luhmweyucklac nuh kac uh, eltahl ac enenuh in mukwikwi ke puhlan pacl upac ke pacl eltahl muhta fin facluh. Mwet pahluh Lehi ke Puk luhn Mormon el fahk lah fin wacngihn ma lain, suwohswohs tiac kuh in sikyak (liye 2 Nephi 2:11). Pwacye, ma upac luhn moul pa lwelah kuht in akihlen, kapsra, ac sruikihn ma wo (liye D&C 29:39; Moses 6:55).
Prestuhn Brigham Young el fahk ohinge: “Mwet lahlmwetmwet nuh kwewa suc eis twefuroh luhn wolacna, moul ne tok ac moul ma pahtpaht enenuh in som ahluhkwelah ma upac nuh kwewa, in eis wolacna ac enganwack moul ma pahtpaht laltahl. Ma upac nuh kwewa ma kuh in tuhkuh nuh sin mwet moul uh fah kweokkihn … in ahkoeloslac in engankihn muhta yurin Leum. … Mwe srihfe ac mukwikwi nuh kwewa kom som ahluhkwelah pa enenweyuck nuh ke molwelah lom.”1
Kihsen siyuck an tiac pa kuht fin ac eis puhlan pacl upac tuhsruhktuh kuht ac muhtweng fuhkah pacl upac uh. Pacl wo lasr ke eklac luhn puhlan pacl ke moul pa sruok ke luhlahlfongi kahs luhn God, mweyen kahsruh Lal tiac in kahsruh ke ma upac muhkwena tuhsruhktuh in kahsruh in kol kuht ahluhkwelah. Pahpah tuhmasr Inkuhsrao El use kahs Lal sin mwet pahluh Lal—lahlmwetmwet sacohk orwaclah in kol kuht ahluhkwelah ma upac luhn puhlan pacl an nuh ke engan yohk liki kuh in sruhmuhnyuck ac kahlwem fokoko luhn moul ma pahtpaht. Ma inge pa ip yohk ke mukwikwi luhn moul lasr in orwaclah kuh, puhlaik, ac suwohswohs in sruok nuh ke ma pwacye ac suwohs finne oasr srihfeyuck ke ma kuht oasr kac.
Mwet suc utyak nuh ke kof luhn pacptais ac eis mwe sang luhn Nguhn Muhtahl oakiyac niyaclos nuh ke inkacnek luhn mwet tuhma lutlut ac siyuckyuck in ukwe suwohs ac ke luhlahlfongi ke falken niyacn Mwet Lahngo lasr.
Mwet Lahngo El luti lah faht ah tuhkahkwack “in srweyac mwet koluk ac mwet wo oacna sie, ac El sang pac af nuh fin mwet suwohs ac mwet sesuwohs” (Mattu 5:45). Kuhtuh pacl uh kuht tiac kuh in kahlwem kac lah efuh ma upac, finne ma tiac fal uh, sikyak ke moul uh. Tuhsruhktuh ke mwet fahsr tukun Kraist, kuht luhlahlfongi kuht fin oaru in suk, pruhe pacl nuh kwewa, ac luhlahlfongi, ma nuh kwewa fah orek in wo kacsr, kuht fin fahsr suwohs (liye D&C 90:24; ahkuhtweyac wo ituckyang).
In oacna mempucr luhn Alu Lal, in oacna Mwet Luhlahlfongi uh, kuht luhngse ac engan in kuhlwacnsap ke ohiyac nuh kwewa ke puhlan pacl nuh kwewa. Ke kuht oruh, insiyacsr ac sesseslah ke luhlahlfongi muhtahl, finsrak ma ahkkweye, ac luhngse pwacye inkuhsrao.
Tuhsruhktuh, kuht fah enenuh in som ahluhkwelah puhlan pacl nohfohn uh—kwewana pacl wolacna ac upaclac. Tuhsruhk wacngihn ma ke puhlan pacl uh, in oacna mwet fahsr tukun Jisus Kraist, kuht ac sang finsrak lasr nuh Sel ke kuht fahsr nuh ke kahlwem Lal.
Ke kahs fototo, kuht pa Mwet Luhlahlfongi luhn God, oaru in lotwelah Kacl, in luhngse El, ac in luhngse mwet wiyacsr. Kuht pa mwet mahtuh ke inkacnek ahkinsewowoyeyucklac luhn mwet tuhma lutlut, ac kuht ac oaru in fahsr nuh ke finsrak inkuhsrao lasr.
Ke ma inge, lwelah kuht in Mwet Luhlahlfongi ke puhlan pacl spring, summer, fall, ac winter. Lwelah kuht in Mwet Luhlahlfongi ke puhlan pacl nohfohn.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, September 2013. Kosraean. 10669 868
Luti ke Pweng Se Inge
Prestuhnsi Se Met luti, “Kuhtuh ma sruhmuhnyuck wolacna emet uh fahkwack ke onkihnyacn on in alu uh” (Hymns, ix). Ke kom sramsram ke pweng se inge, motko in onkihn yurin mwet kom luti an soko on in alu kuh soko on sahyac ma sramsram ke ma upac: “How Firm a Foundation” (no. 85); “The Lord Is My Shepherd” (no. 108); kuh “Let Us All Press On” (no. 243). Kom fin puhla mokleyuck, akacsruhi ke sie pacl ma upac tuhkuh nuh ke moul lom ac eklac nuh ke mwe insewowo se.