Mensahe sang Unang Pangulohan, Oktubre 2013
Ang Aton Responsibilidad sa Pagsagup
Para sa mga Santos sa Ulihing mga Adlaw, ang kakinahanglan nga masagup ang aton mga kauturan nga, sa kon ano nga rason, naglisa sa pagka-aktibo sa Simbahan may wala’y katapusan nga kahulugan. May kilala bala kita nga amo sina nga mga tawo nga sang una nagbaton sang ebanghelyo sing lubos? Kon amo, ano ang aton responsibilidad sa pagsagup sa ila?
Panumduma ang mga nagtalang nga mga tigulang, mga balo, kag nagamasakit. Sa masami ara sila sa mamala kag masubo nga kamingawan sang pagkahamulag nga ginatawag pag-isahanon. Kon ang pagkabataon magligad, kon ang maayong lawas magluya, kon ang kapagsik amat-amat nga madula, kon ang kasanag sang paglaum magpiraw, mahimo sila buligan kag sakdagon sang mabinuligon nga kamot kag maluluy-on nga tagipusuon.
May ara, siyempre, sang iban nga nagakinahanglan sang pagsagup. Ang pila nagaproblema sa sala samtang ang iban nagtalalang tungod sang kahadlok ukon pagpabaya ukon pagkaignorante. Sa bisan ano man nga rason, ginhamulag nila ang ila kaugalingon gikan sa pagkaaktibo sa Simbahan. Kag halos piho gid nga magapadayon sila sa pagtalang luwas lang kon mapukaw sa aton—nga aktibo nga mga miyembro sang Simbahan—ang handum nga magsagup kag magluwas.
Isa nga Magpakita sang Alagyan
Sang san-o lang nakabaton ako sang sulat halin sa isa ka tawo nga nagpalayo gikan sa Simbahan. Ini nagalarawan sang madamo kaayo sang aton mga miyembro. Pagkatapos nga malaragway kon paano sia nangin inactive, sia nagsulat:
“Sang una madamo kaayo ang yara sa akon kag karon diutay na gid lang. Indi ako malipayon kag nagabatyag nga dawsa nagakalugaw-an ako sa tanan nga butang. Ang panaksihon ko parte sa kamatuoran sang ebanghelyo wala gid nadula bisan pa nga wala ko ginapangabuhi sing lubos ang iya sini mga pinanudlo. Nagapangayo ako sang inyo mga pangamuyo.
“Palihog indi ninyo kami pagkalimti nga ari sa gwa— ang nagtalalang nga mga Santos sa Ulihing mga Adlaw. Nakatultol ako kon diin ang Simbahan, pero kon kaisa sa huna-huna ko kinahanglan ko sang isa pa gid nga magtudlo sa akon sang alagyan, magpaisog sa akon, magpanas sang akon kahadlok, kag magpanaksihon sa akon.”
Samtang ginabasa kon ini nga sulat, nadumduman ko ang akon pagbisita sadto sa isa sang pinakadaku nga art gallery sa kalibutan—ang bantog nga Victoria kag Albert Museum sa London, Ingglatera. Didto, nakwadro sing tuman katahum, ang isa ka obra-maestra nga ginpinta sang 1831 ni Joseph Mallord William Turner. Ang painting nagapakita sang madamol nga gal-um kag sang tuman kabalod nga dagat nga nagapatimaan sang katalagman kag kamatayon. Isa ka suga gikan sa nabaradero? Nga sakayan ang nagaigpat sa malayo. Sa atubangan, may isa ka daku nga lifeboat nga ginaitsa sang matag-as kag mabaskog nga mga balod. Ang mga lalaki nagabugsay sing todo samtang ang sakayan nagasulong sa unos. Sa baybayon nagatindog ang isa ka asawa kag duha ka kabataan, nga basa sang ulan kag ginahampak sang hangin. Nalangkag sila nga nagatan-aw sa dagat. Sa akon pamensaran ginpalip-ot ko ang ngalan sang painting. Sa akon ini nangin Ang Pagsagup.1
Sa tunga sang mga kabudlayan sang kabuhi, ang katalagman yara lang sa malapit. Ang mga lalaki kag mga babayi, hamtong man ukon mga bata makasalapo sang ila mga kaugalingon nga nabara kag nagapangatubang sang kalaglagan. Sin-o ang mabulig sa mga nagakinahanglan, nga magabiya sang kasulhay sang puluy-an kag panimalay, kag maglakat sa pagsagup?
Ang aton buluhaton indi imposible. Nagahimo kita sang buluhaton sang Ginuo; nagakadapat kita sa Iya bulig.
Sa tion sang pag-alagad sang Ginuo [sa duta], nanawagan Sia sa mga mangingisda sa Galilea nga ibilin ang ila mga pukot kag magsunod sa Iya, nga nagasiling, “Sunod kamo sa akon, kag himuon ko kamo nga mga mangingisda sang mga tawo.”2 Kabay nga magbuylog kita sa kawsa sang mga mangingisda sang mga tawo [mga lalaki kag mga babayi], agud nga makahatag kita sang kon ano nga bulig ang aton masarangan.
May katungdanan kita nga magdab-ot sa pagsagup sadtong nagbiya sa kasegurohan sang pagkaaktibo, agud nga madala sila sa lamisa sang Ginuo para magpaayaw sa Iya pulong, para maagum ang pagpakig-upod sang Iya Espiritu, kag para “indi na mangin mga dumuluong kag mga dumalayon, kundi mga masigkabanwahanon kaupod sang mga balaan kag mga bahin sang panimalay sang Dios.”3
Ang Prinsipyo sang Pagpalangga
Nadiskubrihan ko nga duha ka importante nga mga rason ang mayor nga kabangdanan sa pagbalik sa pagkaaktibo kag pagbag-o sang mga pamensaron, mga pamatasan, kag mga buhat. Una, ang mga tawo nagabalik bangud may isa nga nagpakita sa ila sang sarang nila malab-ot sa wala’y katubtuban kag nagbulig sa ila sa pagdesisyon nga matuman ang mga ini. Ang mga indi-gawa aktibo indi makuntento nga mangin ordinaryo lang sing malawig kon makita nila nga ang pagkadungganon sarang lang nila malab-ot.
Ika-duha, ang iban nagabalik bangud ang mga pinalangga ukon “mga masigkabanwahanon kaupod sang mga balaan” nagsunod sa laygay sang Manluluwas, naghigugma sang ila isigkatawo subong sa ila kaugalingon,4 kag nagbulig sa iban sa pagdab-ot sang katumanan sang ila mga damgo kag mga handum.
Ang panugod sini nga proseso amo pirme—kag magapadayon nga mangin—ang prinsipyo sang pagpalangga.
Sa pagkamatuod, yadtong mga tawo nga nabara sa mabalod nga dagat sa painting ni Turner pareho sa madamo sang aton mga di-gawa aktibo nga mga miyembro nga nagahulat nga masagup sadtong nagabugsay sang mga lifeboat. Ang ila mga tagipusuon nagapaabot sang bulig. Ang mga iloy kag mga amay nagapangamuyo para sa ila mga anak. Ang mga asawa nagaampo sa langit nga ang ila mga bana matandog. Kon kaisa ang kabataan nagapangamuyo para sa ila mga ginikanan.
Ang akon pangamuyo amo nga maangkon naton kuntani ang kaluyag nga sagupon ang mga indi-gawa aktibo kag dalhon sila pabalik sa kalipay sang ebanghelyo ni Jesucrito, agud nga makaambit sila upod sa aton sang tanan nga ginatanyag sang lubos nga pagpakig-upod.
Kabay nga magdab-ot kita sa pagsagup sang mga nagtalang sa palibot naton. ang mga tigulang, ang mga balo, ang nagamasakit, ang mga may kasablagan, ang mga di-gawa aktibo, kag ang mga wala nagatuman sang mga kasuguan. Kabay nga itanyag naton sa ila ang mabinuligon nga kamot kag maluluy-on nga tagipusuon. Sa paghimo sini, makadala kita sang kalipay sa ila mga tagipusuon, kag matilawan naton ang lubos nga katumanan nga maagum kon nagabulig kita sang isa ka tawo sa pag-usoy sang dalan pakadto sa kabuhi nga wala’y katapusan.
© 2013 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, October 2013. Hiligaynon 10670 861
Pagtudlo gikan sa Sining Mensahe
Binag-binaga ang pagpamangkot sa mga tawo nga inyo ginabisita kon may kilala sila nga nagaproblema sa pagsimba. Mahimo kamo magpili sang isa ka tawo kag hambali ang mga paagi nga mapakita ang pagpalangga, pareho sang pag-agda sa iya nga magpasakop sa family home evening ukon magkari agud magsalo sa isa ka tigkaon.