Mensahe sa Visiting Teaching, Oktubre 2013

Ang Langitnon nga Misyon ni Jesucristo: Tagtuga

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-log on sa www.reliefsociety.lds.org.

Pagtuo, Pamilya, Bulig

Si Jesucristo “nagtuga sang langit kag sang duta” (3 Nefi 9:15). Ginhimo Niya ini paagi sa gahum sang priesthood, sa idalom sang direksyon sang aton Amay nga Langitnon (tan-awa sa Moses 1:33).

“Dapat gid kita mangin tuman ka mapinasalamaton nga isa ka maalam nga Tagtuga ang nagbuhat sang duta kag nagbutang sa aton diri,” siling ni Pangulong Thomas S. Monson, “… agud nga maeksperiyensyahan naton ang tion sang pagtilaw, isa ka oportunidad nga maprobahan ang aton kaugalingon agud mangin takos sa tanan nga ginhanda sang Dios nga aton mabaton.”¹ Kon ginagamit naton ang aton pagbuot sa pagtuman sang mga kasuguan sang Dios kag maghinulsol, mangin takos kita nga magbalik kag magkabuhi upod sa Iya.

Parte sa Pagtuga, si Pangulong Dieter F. Uchtdorf, Ika-duhang Manuglaygay sa Unang Panguluhan, nagsiling:

“Kita ang rason nga gintuga Niya ang kalibutan! …

“Ini isa ka kabaliskaran sa palaisipan parte sa tawo: kon ikomparar sa Dios, ang tawo wala-wala; apang importante kita sa Dios.”² Ang paghibalo nga gintuga ni Jesucristo ang duta para sa aton bangud importante kita sa Amay nga Langitnon makabulig sa aton sa pagpadugang sang aton pagpalangga sa Ila.

Gikan sa Balaan nga mga Kasulatan

Juan 1:3; Mga Hebreo 1:1–2; Mosias 3:8; Moses 1:30–33, 35–39; Abraham 3:24–25

Gikan sa Aton Kasaysayan

Gintuga kita sa imahen sang Dios (tan-awa sa Moses 2:26–27), kag may ikasarang kita nga mangin pareho sa Dios bangud Iya kita mga anak.Ang Propetang si Joseph Smith naglaygay sa mga sisters sa Relief Society nga “mangin takos sa [ila] prebilihiyo.”³ Sa sinang pagpaisog bilang pundasyon, ang mga sisters sa Ang Simbahan ni Jesucrito sang mga Santos sa Ulihing mga Adlaw natudloan nga mangin takos sa ila langitnon nga ikasarang paagi sa pagtuman sang mga katuyuan sang Dios para sa ila. “Kon ila mahangpan kon sin-o gid sila—mga anak nga babayi sang Dios, nga may duna nga ikasarang sa pagpalangga kag pagbatiti—malab-ot nila ang ila mga potensyal bilang balaan nga mga babayi.”⁴

“Ginbutang kamo karon sa isa ka sitwasyon sa diin makaakto kamo suno sa mga balatyagon nga gintanum sang Dios sa inyo mga dughan,” siling sang Propetang si Joseph Smith. “Kon mangin takos kamo sa sining mga prinsipyo daw ano ka halangdon kag ka mahimayaon!—kon mangin takos kamo sa inyo mga prebilihiyo, ang mga anghel indi sarang mapunggan nga mangin inyo mga kaupod.”⁵

© 2013 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, October 2013. Hiligaynon 10670 861

Ano ang Sarang Ko Mahimo?

Paano bala ang pagtinguha nga mahangpan ang aton langitnon nga kinaiya nagapadugang sang aton pagpalangga sa Manluluwas?
Paano bala kita makapakita sang kapasalamatan para sa mga gintuga sang Dios?