Mensahe ti Umuna a Panguluen, oktubre 2013
Ti Pagrebbengantayo nga Umarayat
Para kadagiti Santo iti Ud-udina nga Aldaw, ti panagkasapulan a mangarayat kadagiti kakabsat a lallaki ken babbai a, gapu iti maysa a rason wenno sabali, saanen a makimismisa wenno mapmapan iti Simbaan ket addaan iti agnanayon a kinapategna daytoy. Am-ammotayo kadi dagiti kasdiay a tattao a naminsan idin a naan-anay nga immawat ken nagbiag iti ebanghelio? No kasta, ania ti pagrebbengantayo nga umarayat kadakuada?
Ibilangyo dagiti napukaw kadagiti lallakay ken babbaket, dagiti balo, ken dagiti masaksakit. Masansan unay a masarakanda iti namaga ken naliday a let-ang ti pannakaisina a maawagan iti panagmaymaysa. No sumina ti kinaagtutubo, no dumteng ti panagsakit, no kumapuy ti regta, no kumudrep ti silaw ti namnama, mabalin ida a masaranay ken matulongan ti ima a tumultulong ken ti puso a manangngaasi.
Agpayso nga adda dagiti dadduma nga agkasapulan iti pannakaarayat. Adda dagiti agkarkarigatan a mangrimbaw iti basol idinto ta adda dagiti agallaalla iti buteng wenno kinaawan ganaygay wenno kinaawan ammo. Ania man ti gapu, insinada ti bagbagida iti panagaktibo iti Simbaan. Ken awan duadua nga agtalinaeddanto a napukaw malaksid no adda mangriing kadatayo—nga aktibo a miembro ti Simbaan—a tarigagay a mangarayat ken mangisalakan.
Maysa a Mangipakita iti Dalan
Sumagmamano a panawen ti napalabas nakaaawatak iti surat ti maysa a lalaki a kimmalilis manipud iti Simbaan. Daytoy ti mangibagi iti kaaduan a miembrotayo. Kalpasan ti panangiladawanna no kasano a nagbalin a saan nga aktibo isuna, insuratna:
“Adu’t kukuak idi ket itan bassit unayen. Diak naragsak ket mariknak a kasla mapapaayak iti amin a banag. Kanayon nga adda pammaneknekko maipanggep iti ebanghelio nupay diak naan-anay nga agbibiag kadagiti pannursurona. Dawatek dagiti kararagyo.
“Saanyo koma a liplipatan dagiti kaduatayo nga awan ditoy—dagiti napukaw a Santo iti Ud-udina nga Aldaw. Ammok no sadino ti Simbaan, ngem no dadduma panagkunak a kasapulak ti maysa a tao a mangipakita kaniak iti dalan, mangparegta kaniak, mangikkat iti butengko, ken mangiburay iti pammaneknek kaniak.”
Bayat ti panangbasak iti daytoy a surat, nalagipko ti panagpasiarko idi iti maysa kadagiti dadakkel a galeria ti arte ti lubong—ti nalatak a Victoria ken Albert Museum iti London, England. Sadiay, adda napintas ti pannakaikuadrona nga obra maestra nga impinta idi 1831ni Joseph Mallord William Turner. Itampok ti naipinta a ladawan ti napuskol a nangingisit nga ulep ken ti rungsot ti nadawel a baybay a mangipakita nga adda agur-uray a pagpeggadan ken pannakatay. Nagraniag ti maysa a silaw manipud iti naisadsad a bangka iti adayo. Iti sanguanan, adda dakkel a lifeboat, nga impallangatok dagiti umay a dalluyon ti nalabutab a danum. Sipipigsa a naggaod dagiti lallaki bayat ti panangsarunson ti lifeboat iti bagyo. Iti igid ti baybay nakatakder ti asawa a babai ken dua nga annak, a nabasa iti tudo ken sinaplit ti angin. Sigagagar a matmatmatanda ti baybay. Iti panunotko inyababak ti nagan ti naipinta a ladawan. Para kaniak nagbalin daytoy a Panangarayat.1
Iti baet dagiti pakarikutan ti biag, adda peggad nga agur-uray. Dagiti lallaki ken babbai, ubbing man wenno nataengan ket masarakanda ti bagbagida a naisadsad ken naipasango iti pakadadaelan. Asinonto ti mangiturong kadagiti lifeboat, a mangpanaw kadagiti gin-awa ti pagtaengan ken pamilia, ket mapan umarayat?
Saan nga imposible ti aramidtayo. Addatayo iti panangibaon ti Apo; maikaritayo iti tulongna.
Bayat ti panagministro ti Maestro, kiniddawna kadagiti agdakdaklis iti Galilea a panawanda dagiti iketda ket sumurotda Kenkuana nga imbagana, “Pagbalinenkayto a dumakdaklis kadagiti tao.”2 Makikaduatayo koma kadagiti ragup dagiti dumakdaklis a lallaki ken babbai, tapno makaipaaytayo iti ania man a tulong a kabaelantayo.
Pagrebbengantayo ti tumulong a mangispal wenno mangarayat kadagiti nangpanawen iti kinatalged ti panagaktibo, tapno iti kasta mayegda iti lamisaan ti Apo tapno agpennek iti balikasna, tapno magun-od ti panangkadkadua ti Espirituna, ken tapno agbalin a “saantayon a ganggannaet ken dumagdagus, no di ket kailiandatayon dagiti sasanto, ken kabbalay ti Dios.”3
Ti Pagbatayan ti Ayat
Natakuatak ti dua kangrunaan a gapu iti panagsubli iti panagaktibo ken panagbalbaliw kadagiti ugali, kadawyan, ken tignay. Umuna, agsubli dagiti indibidual gapu ta impakita ti maysa a tao kadakuada dagiti agnanayon a posibilidadda ken tinulonganna ida a mangikeddeng a mangtun-oy kadagitoy. Dagiti saan unay nga aktibo ket saan a makontento iti nabayag a panawen apaman a makitada a magaw-atdan ti paglaingan.
Maikadua, agsubli dagiti dadduma gapu ta dagiti ipatpategda wenno “kailian dagiti sasanto” ket sinurotdan ti balakad ti Mangisalakan, inayatdan dagiti padada a tao kas iti bagida,4 ken tinulonganda dagiti dadduma tapno matungpal dagiti arapaapda ken maragpat dagiti ambisionda.
Ti pangguyugoy iti daytoy a proseso ket—ken agtultuloyto—ti pagbatayan ti ayat.
Iti pudno unay a kaipapanan, dagiti tao a naisadsad iti nadalluyon a baybay iti naipinta a ladawan ni Turner ket maipada kadagiti saan unay nga aktibo a miembro nga agur-uray nga arayaten dagitay tumultulong kadagiti agkagkagumaan. Aggagar dagiti puspusoda iti tulong. Ikararagan dagiti inna ken amma dagiti annakda a lallaki ken babbai. Ikararag dagiti assawa a babbai a matulongan koma dagiti assawada. No dadduma ikararagan dagiti ubbing dagiti nagannak kadakuada.
Ikararagko ta sapay koma a maaddaantayo iti tarigagay a mangarayat kadagiti saan unay nga aktibo ken maisublitayo ida iti rag-o ti ebanghelio ni Jesucristo, tapno makiranudda kadatayo iti dayta amin nga ited ti naan-anay a pannakisinninged.
Makatulongtayo koma nga umarayat wenno mangispal kadagiti napukaw nga adda iti lawlawtayo: dagiti babbaket ken lallakay, dagiti balo, dagiti masaksakit, dagiti adda pagkuranganna, dagiti saan nga aktibo, ken dagiti saan nga agtungtungpal kadagiti bilin. Mayawattayo koma kadakuada ti ima a mangtulong ken ti puso a manangngaasi. Iti panangaramidtayo iti kastoy, mangisangbaytayonto iti rag-o iti puspusoda, ket mapadasantayonto ti dakkel a pannakapnek nga umay kadatayo no agtitinnulongtayo iti dalan nga agturong iti agnanayon a biag.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannaakaipatarus ti First Presidency Message, October 2013. Ilokano. 10670 864
Panangisuro manipud iti Daytoy a Mensahe
Ibilang ti panangsaludsodyo kadagiti tao a sarungkaranyo no adda am-ammoda nga aggagar a makimisa. Mabalinyo ti pumili iti maysa a tao ket paglilinnawaganyo dagiti wagas a pangipakitaan iti ayat, kas iti panangawis kenkuana a makiraman iti family home evening wenno umay makipangmalem.