Klumech er a First Presidency, Ongeteruich el buil 2013
Ngercheled el mora Siik
Mora Ruriul-klebesei el Santo, eng kmal klou a belkul a usbechelel a mora siik el kirir a rodam me a rodos er kid el tir, a kmo ngera uchul, ete mla mo cheroid er a Ikelesia. Kede medengelterir tirkaikid el chad el tir a mle tal mesisiich er a ebangkelio? A leuaisei, e ngera ngercheled el mora siik el kirir?
Ka momdasu er tirkel mla remiid er a delongelir a remecheuodel, a remesobil, me a rsmecher. Kede blechoel metik er tir er a medidirt el cheloit el basio lokedongall el klesabisi. Sel mocheuekl a klengeasek, el mechudelang, me a klisichir el dikeang, me a llomes er a urungulir lorael mo nguemed, eng sebechir el ngmai a ngeso e mo mesisiich lokiu a chim lolngeseu me a reng el medengelii a klechubechub.
Ng uaisei, el ngarngii a rebebil lousbech er kid el mora siik el kirir. A rebebil a ngara ringel er a chelsel a klengit ea rebebil a ngara dakt malechub a rraureng malechub ete diak lodengei. Ngii di luchul, eng di tir el mla mo cheroid er a omeruul er a chelsel a Ikelesia. E sebechir el melemolem el cheroid el di merekmo kid—a remesisiich el chedal a Ikelesia—a blak a rengud el mora siik e olsobel er tir.
Kmong Techa el Chad Lochotii a Rael
Sesei el taem er a memong e ak ngiluu a babilengel a chad el ngii a mla mo cheroid er a Ikelesia. Ng kmal lochotii a teletelir a rebetok el chedal a ikelesia. Uriul er a lesodii a uchul eng mlo cheroid er a ikelesia, eng milluches el kmo:
“Ng mle betok a kulab e chelecha eng di mekesai. Ng diak lungil a renguk e omelchesiu er ngak el mla ruebet er a rokui el tekoi. A ebangkelio a dimlak a ta me bol cheroid er a renguk, ng di mlo cheroid er a klengar ngak. A kulengit a nglunguuch er a kau.
“A kulengit me lak mobes er kemam a re ngar tiei—el mla remiid el Ruriul-klebesei el Santo. Ak medengei el kmo ngar ker a Ikelesia, eng di bebil er a taem e a kuusbech er a chad lochotii a rael er ngak, e melisiich er ngak, e choridii a dektek, e ouchais er a klaumerang el me er ngak.”
Tia er a kunguiu er tial babier, eng mlo melcheluches er a uldesuek er a bo kuldingel er a ta er a basio er a zunga er a beluulechad—el merael chisel el Victoria me a Albert Musuem er a beluu er a London, England Eng, kmal ungil ruul, el zunga er a 1831 luruul er ngii a Joseph Mallord William Turner. Tial zunga olecholt er a okrokr el chedelekelk el eabed me a meringel el daob lolchotel a kengaol me a kodall. Ea llomes er a mla remiid el bilas a dmiich er cheroid. E sel belengel, el kmal meringel a daob er ngii, a ngarngii a klou el chert er a siik er ngii. Tirkal chad a meringel el meius er tial chert er a siik lomtok er tial meringel el daob. Ea tkul a chelechol a dechor a redil me a reteru el ngalek, e mla mo dekimes er a chull el menga er a ses el eolt. E blak a rengrir lomes el bedul tial daob. Ak dilbechii a ngklel tial zunga er a uldesuek. Sel kumes er ngii eng Mo er a Siik.1
Chelsel a ses el eolt er a klengar, e ngarngii a kengaol. Rsechal me a redil, rebuik me a rekebil a metik er tir el cheloit e chemau a telemall. Ng techa mo omekrael er a bilas er a siik, el mo mechei a ungil klengar er a blai me a telungalek, e mora siik?
A ngercheled a diak lak el sebechel mekedmokl. Kid a meruul a urerel a Rubak; meng kired el ngmai a ngeso er Ngii.
Sera le ngara beluulechad a Mastang, e Ngii a ulemekedong er a rechad er a omenged er a Galilee el mo mechei a ukedir e bo loltirakl er Ngii, el dilu el kmo, “Ak rullemui el mo oumenged er a rechad.”2 Mei e bo de teloi er a roumenged er a rechad el sechal me a redil, e dodars aikel ngeso el sebeched lodars.
A ngercheled a tuobed el mora siik er tirkel tir a mla mo cheroid er a ikelesia, me bol sebechir el mei er a tebebelel a Rubak el ngai a Tekingel, me bol ngara deureng loba Chedaol Reng er Ngii, e bo lak el “ngodech el chad malechub el chad er a ngodech el beluu, e bai bo dosisiu el santo, el ngara telungalek er a Dios.”3
Osisechalk er a Beltikelreng
Ak mla metik a eru el uchul ea rechad a lmuut el mei er a ikelesia e mengodech a blekerdelir, kse er tir, me a omerellir. A kot, a rechad a lmuut el mei ele kmo ng techang a ulechotii er tir aikel diak a ulebengelel techall el mo er tir e ngilsuterir el melilt el mo ngmai. A rediak el sal mesisiich er a ikelesia a diak el sebechir el meketeket el mechitechut sel tal lesa klungiaol el tir a sebechir el morngii.
Ongerung, a rebebil a lmuut el mei ele rebetik er a rengrir malechub “a re tal chad el santo” a mla otireklii sel tekingel Osobel, e mla oubeltikelreng el mora retonari er tir,4 e mla ngosuterir a rebebil el kudmokl a urungulir me a blakelreng er tir el mo medengei.
Sel ngii a kmal techel tial teletael a—a melemolem el—osisechalk er a beltikelreng.
A mera er ngii, e tirkel chad el cheloit er a ringel el daob el ngar sel zunga er a Turner a kmal osisiu tir me a tirkel diak el sal mesisiich el chedal a ikelesia el mengiil er tirkel ngara chert er a siik el me melai er tir. A rengrir oureng a ngeso. A rchedil me a rchedam a ngara nglunguuch el kirir a rengelkir el sechal me a redil. A redil olengit a ngeso er a babeluades me a bechil bol sebechel mengai. Bebil er a taem e a rengalek a meluluuch el kirir a rechad er a blirir.
Nglunguchek me bol ngarngii sel blakelreng er kid el mo osiik er tirkel diak el mesisiich el chedal a ikelesia el deluut el ngoiteterir el mei er a ebangkelio er a Jesus Kristo, me luchul e bol teloi er kid el rokui.
Mei e de bo er a siik er tirkel mla remiid el iiliuekl er kid: a remechuodel, re mla melakl, rsmecher, tikrel sechudel, diak el mesisiich er a ikelesia, me tirkel diak loltirakl a llach. Mei e dodersii a chim lolngeseu me a reng el medengelii a klechubechub. Sel bo deuaisei, e kede mo uchul a deureng el mora rengrir, e kid a mo melchesuar sel klungiolel a rengud sel dengeseuir a tang el mo er sel rael er a diak a ulebengelel klengar.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, October 2013. Palauan. 10670 881
Osischeklel Tia el Klumech
Momdasu a oker tirkal chad el moldingel er tir el kmo te medengelii a kmo ng techang el meringel er ngii a mei er a ikelesia. Ng sebechiu el ngiltii a chimol chad e mosaod a teletael lolchotel a beltikelreng, el uaia siotai er ngii el mei er a ongdibel er a telungalek malechub e lomesoil er a blirir.