Fakahā he Konifelenisi Lahí e Tupu Tokolahi ʻa e Mēmipasipí mo e Kau Faifekaú
Kuo aʻu e tokolahi ʻo e Siasí ki he 15 milioná, ko e fakahā ia ʻe Palesiteni Tōmasi S. Monisoni ʻi he ʻuluaki fakataha ʻo e Konifelenisi Lahi Fakavaeuataʻu Hono 183 ʻi he ʻaho 5 ʻo ʻOkatopa 2013. Naʻá ne pehē ko e talu mei hono tukuhifo e taʻu ngāue fakafaifekaú ʻi ʻOkatopa 2012, mo e fakaʻulia e tupu e tokolahi ʻo e kau faifekau taimi kakato ʻoku ngāue he funga ʻo e māmaní—mei he toko 58,500 ki he 80,333.
Naʻe pehē ʻe Palesiteni Monisoni, “ʻOku hokohoko atu e tupulaki ʻa e Siasí mo ʻene liliu e moʻui ʻa ha kakai tokolahi ange he taʻu kotoa pē. ʻOku mafola ia he funga ʻo e māmaní ʻi he fekumi ʻetau kau faifekaú kiate kinautolu ʻoku kumi ki he moʻoní.”
Naʻá ne fakalotolahiʻi e kāingalotú mo e kau faifekaú ke nau kau fakataha ʻi hono vahevahe ʻo e ongoongoleleí. Naʻe pehē ʻe Palesiteni Monisoni, ʻa ia ko e taʻu ʻeni ʻe 50 ʻene hoko ko ha ʻAposetoló, “Ko e taimi ʻeni ki he kāingalotú mo e kau faifekaú ke nau kau fakataha mai ʻo ngāue fakataha ʻi e ngouevaine ʻa e ʻEikí ke ʻomi e ngaahi laumālié kiate Ia.”
ʻI he fakataha ʻo e hoʻatā Tokonakí, naʻe tukuange fakalāngilangi ai ha toko tolu mei he Kōlomu ʻUluaki ʻo e Kau Fitungotulú—ʻa ia ko ʻEletā John B. Dickson, Paul E. Koelliker, mo F. Michael Watson—pea fokotuʻu kinautolu ki he tuʻunga ko e fitungofulu mālōlō, pea naʻe tukuange foki pea mo ʻEletā Kent D. Watson ʻo e Kōlomu Hono Ua ʻo e Kau Fitungofulú. Naʻe fokotuʻu foki ko e Fitungofulu Fakaʻēlia ʻa Julio A. Angulo, taʻu 45, ʻo Pokotā Kolomupiá; Peter F. Evans, taʻu 54, ʻo Sōleki Siti, ʻIutā ʻo e USA; pea mo Gennady N. Podvodov, taʻu 47, ʻo Tonesikī ʻIukuleiní. Naʻe fanongonongo foki ai ʻa hono tukuange mei he Fitungofulu Fakaʻēliá ʻa César H. Hooker mo Craig T. Wright.
Naʻe mamata mo fakafanongo ha kakai ʻe laui miliona he funga ʻo e māmaní ki he konifelenisí ʻi he televīsoné, ʻInitanetí, letioó mo e satelaité. Ko e fuofua taimi foki ʻeni ke fakamafola fakahangatonu ai e fakataha lakanga fakataulaʻeiki he efiafi Tokonakí ʻi he televīsoné mo ʻInitanetí. Ne laka hake he kakai ʻe toko 100,000 tupu ne nau omi ki he ngaahi fakatahaʻanga ʻe nimá ʻi he Senitā Konifelenisí ʻi Sōleki Siti, ʻIutā ʻi he ʻaho 5 mo e 6 ʻo ʻOkatopá. Naʻe maʻu foki ʻa e konifelenisí ʻi ha ngaahi mītia kehekehe ʻi ha lea fakafonua ʻe 95 pea fakamafola ki ha ngaahi fonua mo e vahefonua ʻe 197.
Naʻe fakamāʻopoʻopo ʻe Palesiteni Monisoni ʻa e konifelenisí ʻaki haʻane kole ki he kāingalotu ʻo e Siasí ke nau fakahaaʻi ha angaʻofa lahi ange ki he niʻihi kehé pea ke nau femoʻuekina maʻu pē “ʻi hono fai e ngāue ʻa e ʻEikí.”
Ko Thomas S. Monson ʻi he Tāpanekalé he Temipale Sikueá he 1963, ʻi ha ngaahi momeniti siʻi pē kimuʻa pea fokotuʻu ia ke hoko ko ha Taki Māʻolungá.
Laʻitaá mei he ʻŌfisi ʻo e Palesitení