Lamharon
Pwede Bala Ako Magpaambit sang Libro ni Mormon?
Ang tagsulat nagapuyo sa Washington, USA.
Sang una ko pa lang nga tuig sa high school, ang akon seminary teacher nag-agda sa amon klase nga maghatag sang mga kopya sang Libro ni Mormon sa mga abyan namon nga indi miyembro sang Simbahan. Bisan kahuluyaon gid kaayo sa akon, ginbaton ko ang pangagda.
May pila man ka adlaw nga gintipon ko ang akon kaisog, pero sang ulihi ginhatag ko sa akon abyan nga si Britny ang libro sang tig-palanyaga kag nagpaambit ako sang malip-ot nga panaksihon. Ginpasalamatan ako ni Britny para sa libro.
Sa katapusan sinang school year, nagbalhin eskuwelahan si Britny pero padayon kami nga nagakontakanay. Ginsugiran niya ako parte sa iya bag-o nga eskuwelahan kag nga halos tanan sang iya mga abyan mga miyembro sang Simbahan, pero wala gid sia nag-istorya sang bisan ano sa akon nga parte sa Dios.
Nagbag-o ina antes ako naglakat sa misyon. Nakabaton ako sang mensahe kay Britny nga kuno may importante sia nga ibalita sa akon: bulunyagan na sia, kag luyag niya ako pasalamatan sa pag-inabyanay namon kag sa pagpakita ko sang maayong ehemplo.
Ginpili sang Dios ang isa ka mahuluy-on nga 15-anyos nga wala sing eksperiyensia parte sa misyon kag gingiyahan ini nga magpaambit sang ebanghelyo sa isa nga nahibaloan Niya nga magabaton sini. Nakahibalo ako nga sa pagpamati sa Espiritu, tanan kita sarang makakita sang mga tawo sa aton palibot nga nagahulat nga makahibalo parte sa ginpanumbalik nga ebanghelyo. Nakahibalo ako nga kon magbulig kita nga makadala sang bisan isa lang ka tawo sa Ginuo, “ano ayhan kadako ang mangin [aton] kalipay upod sa iya sa ginharian sang [aton] Amay!” (tan-awa sa D&C 18:15).