Mensahe sang Unang Panguluhan, Disyembre 2013
Pamilya kag mga Abyan sa Katubtuban
Kon sa diin man kamo nagapuyo, may mga abyan kamo nga nagapangita sing mas dako nga kalipayan nga inyo nasalapoan sa pagpangabuhi sang ginpanumbalik nga ebanghelyo ni Jesucristo. Indi man nila malaragway ining kalipayan sa hambal, apang mahibal-an nila ini kon makita nila ini sa inyo kabuhi. Magatinguha sila nga mahibal-an ang ginahalinan sinang kalipayan, ilabi na kon makita nila nga nagapangatubang man kamo sang mga pagtilaw pareho sa ila.
Nabatyagan ninyo ang kalipayan samtang ginatuman ninyo ang mga kasuguan sang Dios. Amo ina ang ginpromisa nga bunga sang pagpangabuhi sang ebanghelyo (tan-awa sa Mosias 2:41). Wala kamo nagatuman sing tampad sang mga kasuguan sang Ginuo agud makita sang iban nga tawo, pero inang nakakita sang inyo kalipayan ginahanda sang Ginuo sa pagpamati sang maayong balita sang Pagpanumbalik sang ebanghelyo.
Ang mga bugay nga ginhatag sa inyo nagtuga sang mga obligasyon kag manami nga mga oportunidad para sa inyo. Bilang may kasugtanan nga disipulo ni Jesucristo, obligado kamo nga magtanyag sa iban sang oportunidad nga makasalapo sang dugang nga kalipayan, ilabi na sa inyo mga abyan kag mga miyembro sang inyo pamilya.
Nakita sang Ginuo ang inyo oportunidad kag ginlaragway ang inyo obligasyon paagi sa sining kasuguan: “Kinahanglanon sa tagsa ka tawo nga ginpaandaman nga magpaandam sa iya isigkatawo” (tan-awa sa D&C 88:81).
Ginapahapos pa gid sang Ginuo nga sundon inang kasuguan paagi sa pagbag-o nga nagakatabo sa inyo tagipusuon sa inyo pagbaton kag pagpangabuhi sang ebanghelyo ni Jesucristo. Bilang resulta, ang inyo gugma para sa iban nagatubo, amo man ang inyo handum para sa ila nga makasalapo sang amo man nga kalipayan nga inyo naeskperiyensyahan.
Isa ka halimbawa sinang pagbag-o amo ang kon paano ninyo ginabaton ang kahigayunan nga makabulig sa pangmisyonaryo nga buluhaton sang Ginuo. Madali nga mahibal-an sang full-time nga mga misyonero nga makapaabot sila gikan sa isa ka matuod-tuod nga hinaylo ukon convert sang bulig kon magpangayo sang matudloan ukon referral. Nagahandum ang isa ka hinaylo nga ang iya mga abyan kag mga miyembro sang pamilya malipay man.
Kon ang inyo ward mission leader ukon mga misyonero magpangayo sang ngalan sang mga tawo nga tuludloan, isa ini ka dako nga pasidungog sa inyo. Nakahibalo sila nga nakita sang mga abyan ninyo nga malipayon kamo kag, gani, inang mga abyan ginhanda agud mamati kag magpili nga batunon ang ebanghelyo. Kag may pagsalig sila nga kamo ang mangin abyan nga ila kinahanglanon sa ila pagsulod sa ginharian.
Indi kamo dapat mahadlok nga mawad-an sang mga abyan sa pag-agda sa mga misyonero nga magbisita sa ila. May mga abyan ako nga nagsikway sang mga misyonero apang ginpasalamatan ako sa malawig nga tinuig sa pagtanyag sa ila sang isa ka butang nga nahibal-an nila nga tuman ka importante sa akon. Sarang ninyo himuon ang mga pag-abyanay sa katubtuban paagi sa pagtanyag sang ebanghelyo, nga makita nila nga nagdala sa inyo sang kalipayan. Indi gid pagpaligara ang oportunidad nga agdahon ang isa ka abyan kag ilabi na ang isa ka miyembro sang pamilya sa pagpili nga sundon ang plano sang kalipayan.
Wala na sing mas dako pa nga oportunidad para sa sinang pagpangagda sangsa sa mga templo sang Simbahan. Didto ang Ginuo makatanyag sang mga ordinansa sang kaluwasan sa aton mga minatay nga wala nakabaton sini sang buhi pa sila. Nagatan-aw sila sa inyo (gikan sa kalibutan sang mga espiritu) nga may pagpalangga kag paglaum. Ang Ginuo nagpromisa nga makaangkon sila sang oportunidad nga magkari sa Iya ginharian (tan-awa sa D&C 137:7–8), kag Iya gintanom ang gugma para sa ila sa inyo tagipusuon.
Madamo sa inyo ang nakabatyag sang kalipay sa pagtanyag sang mga ordinansa sang templo sa iban, pareho man nga nalipay kamo kon nagahatag kamo sang ngalan sang mga tawo sa mga misyonero agud bisitahan. Nakabatyag kamo sang mas dako pa gid nga kalipay sa paghikot sang mga ordinansa para sa inyo mga minatay. Ginpahayag sa Propetang si Joseph Smith nga ang aton wala’y katapusan nga kalipayan posible lamang kon itanyag naton ang alagyan padulong sa sinang pagpakamaayo sa aton mga minatay paagi sa pag-proxy sa ila sa mga ordinansa sang templo (tan-awa sa D&C 128:18).
Ang tion sang Paskua nagaliso sang aton mga tagipusuon sa Manluluwas kag sa kalipay nga dala sang Iya ebanghelyo sa aton. Ginapakita naton ang aton kapasalamatan sa Iya sa pinakamaayo nga paagi kon ginatanyag naton inang kalipayan sa iban. Ang kapasalamatan nagahimo nga kalipayan kon maghatag kita sang mga ngalan sa mga misyonero kag kon magdala kita sang ngalan sang aton mga minatay sa templo. Ang ina nga ebidensya sang aton kapasalamatan sarang maghimo sang mga abyan kag mga pamilya nga nagapadayon sa katubtuban.
© 2013 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, December 2013. Hiligaynon 10672 861
Pagtudlo gikan sa Sining Mensahe
Si President Eyring nagapaathag nga makapakita kita sang aton kapasalamatan sa Manluluwas paagi sa pagpaambit sang ebanghelyo sa iban. Sarang ninyo hambalan upod sinang inyo ginatudloan kon paano ang dulot sang ebanghelyo nagbugay sang ila kabuhi. Hunahunaa ang pag-agda sa ila nga kilalahon sing mainampuon, inang luyag nila paambitan sang regalo sang ebanghelyo kag kon paano nila himuon ini.