Mensahe sa Visiting Teaching, Disyembre 2013

Ang Diosnon nga Misyon ni Jesucristo: Ang Bugtong nga Inanak

Tun-i sing mainampuon ining materyales kag hibaloa kon ano ang inyo ipaambit. Paano bala ang paghangop sang kabuhi kag misyon sang Manluluwas makadugang sang inyo pagtuo sa Iya kag makabugay sinang inyo ginaalagaran paagi sa visiting teaching? Para sa dugang nga impormasyon, mag-log on sa reliefsociety.lds.org.

Selyo sang Relief Society

Pagtuo, Pamilya, Bulig

Kabahin ini sang serye sang Mga Mensahe sa Visiting Teaching nga nagalakip sang mga aspeto sang misyon sang Manluluwas.

Ang aton Manluluwas nga si Jesucristo, ginatawag nga Bugtong nga Inanak bangod Sia lamang ang tawo sa duta nga nabun-ag sa mortal nga iloy kag imortal nga Amay. Iya ginpanubli ang diosnon nga mga gahum gikan sa Dios, Iya Amay. Gikan sa Iya iloy nga si Maria, Iya napanubli ang mortalidad kag kinahanglan Niya magbatas sang kagutom, kauhaw, kakapoy, kasakit, kag kamatayon.¹

Bangod si Jesucristo ang Bugtong nga Inanak sang Amay, sarang Niya ihalad ang Iya kabuhi kag mabanhaw. Ang balaan nga mga kasulatan nagatudlo nga “paagi sa pagpasag-uli ni Cristo,” kita “makaangkon sing pagkabanhaw” (Jacob 4:11). Natun-an man naton nga ang tanan “mahimo mabanhaw sa pagkawala’y kamatayon padulong sa kabuhi nga wala’y katapusan” kon kita “magpati” (D&C 29:43).

Kon mahangpan naton sing mas lubos kon ano ang kahulugan nga si Jesus isa ka Bugtong nga Inanak sang Amay, ang aton pagtuo kay Cristo magadako. Si Elder D. Todd Christofferson sang Quorum of the Twelve Apostles nagsiling, “Ang pagtuo kay Jesucristo amo ang mabaskog nga pagpati kag pagpasalig sang (1) Iya estado bilang ang Bugtong nga Inanak sang Dios, (2) Iya wala’y dulonan nga Pagpasag-uli ukon Atonement, kag (3) Iya literal nga Pagkabanhaw.”² Ang moderno nga mga propeta nagsaksi: “[Si Jesucristo] ang nangin … Bugtong nga Inanak sa unod, ang Manunubos sang kalibutan.” ³

Gikan sa Balaan nga mga Kasulatan

Juan 3:16; Doctrine and Covenants 20:21–24; Moses 5:6–9

Gikan sa Aton Kasaysayan

Sa Bag-o nga Katipan [New Testament] mabasahan naton ang parte sa mga babayi, nga nahingadlan kag wala, nga nagpakita sang pagtuo kay Jesucristo, nagtuon kag nagpangabuhi sang Iya mga pinanudlo, kag nagsaksi sang Iya pag-alagad, mga milagro kag kahalangdon. Ining mga babayi nangin dalayawon nga mga disipulo kag importante nga mga saksi sa buluhaton sang kaluwasan.

Halimbawa, si Marta nagpaambit sang mabaskog nga panaksihon parte sa pagkadiosnon sang Manluluwas sang sia nagsiling sa Iya, “Nagatuo ako nga ikaw ang Cristo, ang Anak sang Dios, sia nga nagakari sa kalibutan” (Juan 11:27).

Ang pila sang pinakauna nga mga saksi sa pagkadiosnon sang Manluluwas amo ang Iya iloy nga si Maria, kag iya himata nga si Elisabet. Wala madugayi pagkatapos nga ang anghel nga si Gabriel nagbisita kay Maria, ginkadto niya si Elisabet. Kag sang pagkabati ni Elisabet sang pag-abiabi ni Maria, sia “napun-an sang Espiritu Santo” (Lucas 1:41) kag nagpaambit sang panaksihon nga si Maria mangin iloy sang Anak sang Dios.

© 2013 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, December 2013. Hiligaynon. 10672 861

Mga Tanda

1. Tan-awa sa Gospel Principles (2009), 52–53.

2. D. Todd Christofferson, “Building Faith in Christ,” Liahona, Sept. 2012, 13.

3. “The Living Christ: The Testimony of the Apostles,” Liahona, Abr. 2000, 2–3.

Ano ang Sarang Ko Mahimo?

1. Ngaa importante para sa akon nga mahangpan ang papel ni Jesucristo?

2. Paano bala madugang ang aton pagtuo kon magtipig kita sang aton mga kasugtanan?