Cov Hluas
Kuv Puas Muaj Cuab Kav Muab Phau Ntawv Maumoos Rau Lwm Tus?
Tus sau zaj no nyob hauv Washington, USA.
Thawj xyoo uas kuv kawm ntawv qib siab high school, kuv tus xib hwb hauv seminary caw kom peb muab ib Phau Ntawv Maumoos rau cov phooj ywg uas tsis yog mej zeej. Txawm kuv tsis muaj peev xwm heev, kuv cia li hais tias kuv yuav ua li ntawd.
Kuv yuav tsum siv ob peb hnub thiaj li muaj cuab kav txaus, tiam sis thaum kawg kuv muab phauv ntawv no rau kuv tus phooj ywg Britny thaum noj su thiab ua tim khawv rau nws. Britny ua kuv tsaug rau phau ntawv ntawd.
Thaum xyoo kawm ntawv tiav lawm, Britny tsiv tsev, tiam sis wb tseem sib tham. Nws qhia kuv txog nws lub tsev kawm ntawv tshiab thiab txog qhov uas yuav luag tag nrho nws cov phooj ywg yog mej zeej hauv lub Koom Txoos, tiam sis nws yeej tsis tau nrog kuv sib tham txog tej yam ntawm sab ntsuj plig.
Ua ntej kuv yuav mus ua tub txib, qhov nws hais ntawd tau hloov. Kuv tau txais tsab xov los ntawm Britny uas hais tias nws muaj ib qho tseem ceeb nws xav qhia kuv: nws yuav ua kev cai raus dej thiab nws xav ua kuv tsaug vim kuv yog nws tus phooj ywg thiab kuv coj yam ntxwv zoo rau nws xyaum.
Vajtswv qhia ib tug tub hluas txaj muag uas muaj 15 xyoos thiab tsis paub ua tub txib thiab ua rau nws paub qhia txoj moo zoo rau lwm tus uas Nws paub tias yuav lees txais. Kuv paub tias thaum peb ua raws li tus Ntsuj Plig, peb yuav nrhiav tau tib neeg nyob ib puag ncig peb uas tos ntsoov xav kawm txog txoj moo zoo. Kuv paub tias yog peb coj ib tug neeg xwb los cuag tus Tswv, “[peb] yuav muaj txoj kev xyiv fab loj kawg nrog tus ntawd nyob hauv [peb] Leej Txiv lub nceeg vaj!” (Q&K 18:15).