Thawj Pawg Thawj Tswj Hwm Tsab Xov, Kaum Ob Hlis Ntuj 2013
Tsev Neeg thiab Phooj Ywg Mus Ib Txhis
Txawm koj nyob qhov twg, koj yeej muaj phooj ywg uas nrhiav kev zoo siab uas koj twb nrhiav tau los ntawm qhov uas koj ua neej nyob raws li Yexus Khetos txoj moo zoo uas tau muab txum tim rov qab los. Tej zaum lawv yuav tsis paub piav txog kev zoo siab ntawd, tiam sis lawv yuav paub txog kev zoo siab ntawd thaum lawv saib koj lub neej. Lawv yuav xav paub lub hauv paus ntawm kev zoo siab ntawd yog dab tsi, qhov tseem ceeb yog thaum koj raug tej kev sim siab ib yam li lawv.
Koj tau muaj kev zoo siab thaum koj ua raws li Vajtswv tej kev cai. Nov yog tej txiv uas tus Tswv cog lus tias koj yuav txais thaum koj ua raws li txoj moo zoo (saib Mauxiyas 2:41). Tsis yog koj rau siab ua raws li tus Tswv tej lus txib kom lwm tus saib koj, tiam sis tus Tswv npaj cov uas saib koj txoj kev zoo siab kom lawv yuav xav mloog txoj moo zoo uas raug txum tim rov qab los.
Cov koob hmoov uas tus Tswv tau muab rau koj ua rau koj thiaj muaj tej kev lav ris thiab tej lub cib fim zoo kawg nkaus. Vim koj yog Yexus Khetos ib tug thwj tim uas tau khi lus tseg lawm, koj yuav tsum muab tej lub cim fim rau lwm tus pab lawv nrhiav tau kev zoo siab ntxiv, qhov tseem ceeb yog qhia rau koj cov phooj ywg thiab koj tsev neeg.
Tus Tswv pom koj qhov cib fim no thiab piav txog koj txoj kev lav ris thaum nws txib li no hais tias: “Tsim nyog txhua tus neeg uas twb tau txais lus ceeb toom lawm mus ceeb toom nws tus neeg zej zog thiab” (Q&K 88:81).
Tus Tswv ua yooj yim rau koj ua raws li lo lus txib ntawd los ntawm qhov kev hloov siab uas muaj thaum koj lees txais thiab ua raws li Yexus Khetos txoj moo zoo. Yog li ntawd, thaum koj txoj kev hlub lwm tus loj hlob tuaj, koj txoj kev xav kom lawv muaj kev zoo siab ib yam li koj muaj yuav loj hlob tuaj thiab.
Ib qho piv txwv txog qhov kev hloov siab ntawd yog koj txoj kev xav pab ua tus Tswv tej hauj lwm ua tub txib. Cov tub txib kawm hais tias ib tug neeg uas hloov siab los ntseeg tiag tiag yuav txaus siab xa lawv mus xyuas lwm tus. Tus neeg hloov siab los ntseeg xav kom nws cov phooj ywg thiab tsev neeg muaj kev zoo siab ib yam li nws.
Thaum koj pawg ntseeg qhov chaw tshaj tawm txoj moo zoo tus thawj coj los yog cov tub txib thov koj qhia lawv txog ib tug neeg uas lawv qhia tau, ces yog ib qho kev qhuas koj. Lawv paub tias cov phooj ywg twb pom koj txoj kev zoo siab, thiab, yog li ntawd, cov phooj ywg ntawd tau npaj los mloog thiab lees yuav txoj moo zoo thiab. Thiab lawv ntseeg hais tias koj yuav ua lawv tus phooj ywg uas lawv xav tau thaum lawv nkag los rau hauv lub nceeg vaj no.
Koj tsis tas ntshai hais tias koj cov phooj ywg yuav tso koj tseg yog koj caw lawv los ntsib cov tub txib. Kuv muaj cov phooj ywg uas hais tias lawv tsis xav ntsib cov tub txib tiam sis lawv ua kuv tsaug vim muaj ib qho uas lawv paub tias muaj nuj nqis rau kuv heev uas kuv xav muab rau lawv. Koj yuav ntaus kev ua phooj ua ywg mus ib txhis thaum koj qhia txoj moo zoo rau lawv, uas lawv pom tias tau ua rau koj muaj kev zoo siab. Tsis txhob tso tej lub cib fim tseg uas koj caw tau ib tug phooj ywg thiab koj tsev neeg hais kom lawv xaiv thiab ua raws li Vajtswv txoj kev zoo siab.
Tsis muaj ib lub cib fim zoo tshaj qhov uas koj caw lawv ua li ntawd nyob hauv lub Koom Txoos tej tuam tsev. Nyob ntawd tus Tswv yuav muab tej kab ke cawm seej rau peb cov poj koob yawm txwv uas txais tsis tau tej ntawd thaum lawv ua neej nyob. Lawv saib xyuas nej nrog kev hlub thiab kev cia siab. Tus Tswv tau cog lus tias lawv yuav muaj cib fim los rau hauv Nws lub nceeg vaj (saib Q&K 137:7–8), thiab nws tau cog txoj kev hlub lawv rau hauv nej lub siab.
Nej feem coob tau muaj kev xyiv fab thaum nej tau ua tej kab ke hauv lub tuam tsev pab lwm tus, ib yam li thaum nej muab tej tus neeg rau cov tub txib mus ntsib. Nyaj nej tau muaj kev xyiv fab ntau tshaj thaum nej ua tej kab ke rau nej cov poj koob yawm txwv. Tus Tswv tau qhia rau tus Yaj Saub Yauxej Xamiv hais tias peb yuav muaj txoj kev zoo siab nyob mus ib txhis tsuas yog thaum peb qhib kev rau peb cov poj koob yawm txwv txais tau txoj koob hmoov ntawd los ntawm cov kab ke hauv lub tuam tsev (saib Q&K 128:18).
Thaum lub caij Christmas peb lub siab tig mus rau tus Cawm Seej thiab qhov uas Nws txoj moo zoo ua rau peb muaj kev xyiv fab. Peb qhia Nws tias peb ris Nws txiaj thaum peb muab txoj kev zoo siab ntawd rau lwm tus. Kev ris txiaj yuav hloov los ua kev xyiv fab thaum peb muab tej tus neeg rau cov tub txib thiab thaum peb coj peb poj koob yawm txwv tej npe rau lub tuam tsev. Kev puav pheej txog peb txoj kev ris txiaj yuav ua rau peb muaj phooj ywg thiab tsev neeg uas nyob mus ib txhis.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus First Presidency Message, December 2013. Hmong. 10672 295
Qhia los ntawm tsab Xov No
Thawj Tswj Hwm Eyring piav hais tias peb qhia tau tias peb ris tus Cawm Seej txiaj thaum peb qhia txoj moo zoo rau lwm tus. Tej zaum koj yuav xav sib tham nrog cov uas koj qhia seb qhov uas lub txiaj ntsim ntawm txoj moo zoo tau foom koob hmoov li cas rau lawv lub neej. Cia li xav seb koj puas xav caw lawv thov Vajtswv seb lawv yuav xav qhia leej twg txog lub txiaj ntsim ntawm txoj moo zoo rau lwm tus thiab lawv yuav ua dab tsi.