Iren Mahsen en Presidensi Keieu, Senweri 2014
Ansou Keieu Mwahu en Padokedi Tuhke
Nan Rom en mahso, Janus wia koht en tepida kan. Kasansalepen koht menet kin kalapw wia mahs riau—ehu me kilikilengla mwuri, oh ehu me kilikilengla mwowe ong me kohkohdo. Ekei lokaiahn sahpw akan kin kihieng eden sounpwong en Senweri duwehte ede pwehki tepin pahr kin wia ansoun tehksapahl oh pil wiahda koasoandi.
Kiden sounpar ekei mwuhr, tiahk tohto nan sampah kin tapiada pahr kapw sang ni wiahda koasoandi kapw ong pahr kapwo. Ni mehlelo, wiahda koasoandi me mengei— kolokol koasoandi kan iei me uhdahn apwal.
Emen ohl me wiahda koasoandi tohto ong Pahr Kapwo nsenamwahuki eh wie kekeirda. E pein medewe, “Leledohr met, I idawehnehr ahi koasoandi en mwonge pwung, I sohte lingeringerda, I idawehn ei koasoandi en netiki mwohni, oh I saik pak ehu kaulimiki nein mehn mpei kan neirail kidio. Ahpw rahn wet iei Senweri 2 oh nei kuloako ahpwtehn wie sekesek oh lelehr ansou I en pirida. E pahn wia manaman ehu ma I pahn wie mwamwahute kohkohwei.”
Pwurehng Tepida
Mie koapwoaroapwoar me kin pid tepida kapw. I leme ni ehu ansou sohte lipilipil kitail koaros inangihier en pwurehng tepikihda mwohmw mwakelekel.
I kin pereniki alehda kompiuhder me kapw me saikinte mie audepe. Erein ansoukis e kin doadoahk mwahu. Ahpw mwurin rahn akan oh wihk kan ahr kin doula tohtohlahn pwurokirahm kan kin audaudiong loale (ekei me kitail kin pein kihieng ah ekei soh), kedkedeo kompiuhder-o kin pweipweiek, oh soahng kan me e kin mwadang wiahda mahso kin uhd wawaila. Ekei pak e kin sohte douluhl doadoahk. Lella pil kapirada kompiuhder kin kak wia doadoahk laud ehu ni ansou me e kin audaudkihla soahng tohto loale. Mie ansou me ihte me kak wiawi iei en kamwakelehda douluhl kompiuhder-o oh pwurehng tepida.
Aramas pil duwehte kin kak audaudkihla masepwehk, peikasal, oh pepehm en dihp toutou. Sapwung kan me kitail wiahier (me kitail pilada en wia oh me kitail sohte koasoanehdi en wia) kak katoutouih kitail lao e kin mwomwen apwal en ese dah me kitail konehng wia.
Ni me pid dihp, mie wiepen kamwakel douluhl me kahdaneki koluhla me kin mweidehng kitail en kamwakelehda pein loalatail oh kihsang pingiping me kin katoutouih mohngiongitail kan. Rongamwahuo, sang Tomw manaman oh limpoak en Sises Krais, kasalehiong kitail ahl en kamwakelehsang ngenitail kan lipwen dihp oh pwurehng weliakapwala, unsek, oh mwakelekel duwehte seri.
Ahpw ekei pak soahng teikan kin kahrehiong atail wawaila oh pein kolkitaildi, elehiong madamadau sohte katepe oh mwekid kan me kin kahrehiong kitail en apwaliki tepida.
Kairada me Keieu Mwahu Loalatail
Wiahda koasoandi kan en doadoahklahng wia mehkot mwahu. Kitail ese me Samatail Nanleng sapwellimaniki koasoandi kan en doadoahklahng pwehki E mahsanihiongkitaillehr me Sapwellime doadoahk oh kilohri iei en kairada mour poatoapoat oh mour soutuk en aramas (tehk Moses 1:39).
Pein atail koasoandi kan en doadoahklahng kak kairada me keieu mwahu loalatail. Ah, ehu me kin keieu karampwa atail nanti kan en wiahda oh kolokol koasoandi kan iei atail kin pwilikihdi doadoahk ong ehu rahn. Ekei pak kitail kin karampwa tapiada mehkot, awiawih ansou me keieu mwahu en tepida—keieun rahn en pahr kapw ehu, tepidahn summer, ansou me kitail pahn alehdi malipilip en wia pisop men de president en Pwihn en Sawas en Lih, mwurin seri koaros ahr pahn kohla sukuhl, mwurin atail pahn kommoaldihsang doadoahk.
Kumwail sohte anahne luk mwohn amwail pahn tepida mwekidlahng amwail koasoandi kan en doadoahklahng me pid mour pwung. Kumwail sohte anahne awiodo mweimwei en wiahla aramas me kumwail koasoandihongehr en wiahla. Kumwail sohte anahne awih en lukohng papah nan Mwomwohdiso.
Ekei pak kitail kak katiasang sounpar tohto en atail mour awiawih en pilipilda (tehk D&C 121:34–36). Ahpw met wia lamalam likamw ehu. Kumwail pilipildahier!
Ekei pak nan ahi mour I kin pepehd nihpwong medemedewe irair kan, pwunod kan, de nsensuwed kan. Ahpw mendahte uwen rotorot en pwohngo, I kin nsenamwahukihla madamadau wet: ni menseng ketipino pahn dak.
Nan ehuehu rahn kapw, dakadahn ketipin kapw kin pwarada—kaidehnte ong sampah ahpw pil ong kitail. Oh iangodo ehuehu rahn kapw iei tepida kapw— ansou mwahu en pwurehng tepida.
Ahpw Iaduwe Mah Kitail Pwupwidi?
Ekei pak me kin doareikitailla iei masepwehk. Kitail mwein kakete periki me kitail sohte pahn pweida, me kitail pahn pweida, me kitail pahn namenekida, me paiamwahu pahn wekidkitailla, de me e pahn wekidala irail akan me kitail poakohng.
Oh eri kitail kin awih. De kadarala atail inengo.
Ehu me kitail anahne tamataman ansou me kitail kin wiahda koasoandi kan en doadoahklahng iei met: Kitail pahn mwein uhdahn pwupwidi—mweinele kisin ansou kis te. Ahpw ieremen nsensuwedkihla, kitail kak kehlailkihda pwehki atail wehwehki met kin kihsang katoutou en unsek ansou wet. E kin kamehlel sangete ni tapio me ehu ansou de pil ehu ansou tohrohr, kitail pahn pwupwidi oh sohte itar. Wehwehki met kin kihsang pwuriamwei oh pahtou sang ansoun pwupwidi.
Ansou me kitail kin wehwehki atail koasoandi kan en doadoahklahng ni wiepe duwe met, pwupwidi sohte anahne wia mehkot mehn karampwaikitail. Tamataman, mendahte ma kitail sohte mwadangete lellahng me kitail inangih, kitail pahn ekis keirda pohn ahlo me weidlahng.
Oh met kesempwal—e katep laud.
Mendahte atail pahn sohte lel atail lain en imwisekla, doulahte nan seiloako pahn kairada kitail en laudsang me kitail wia mahso.
Ansou Keieu Mwahu en Tepida Iei Met
Mie ehu lepin padahk audapan me mahsanih, “Ansou keieu mwahu en poadokedi tuhke iei sounpar 20 samwalahro. Keriau en ansou mwahu iei met.”
Mie mehkot me kaselel oh kin kairada koapwoaroapwoar me pid lepin mahsen met. Mie mehkot kin kakehlail me pid mehlelo me ma kitail pahn pilada en koasoanehdi met, kitail kak doula ansouohte.
Met iei ansou keieu mwahu en wiahla aramas me kitail men wiahla ehu rahn—kaidehnte ong sounpar 20 sang met kohla ahpw pil ong mour soutuk.
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, January 2014. Pohnpeian. 10861 885
Padapadahk sang Iren Mahsen Wet
President Uchtdorf kawehwe me ansou me kitail kin sohte kapwaiada atail koasoandi kan en doadoahklahng, “kitail kak kehlailkihda. … Mendahte atail pahn sohte lel atail lain en imwisekila, doulahte nan seiloako pahn kairada kitail en laudsang me kitail wia mahso.” Peki tohn peneini en kihda irair me irail ahniki ansou me irail kasukuhl sang kemwekid-o laudsang me irail kasukuhlki ni eh imwiseklao, me rasehng kesepwil sang sukuhl de alehdi kisakis en pweida.