Parau poro‘i a te Peresideniraa Matamua, Tenuare 2014
Te taime maita‘i a‘e no te tanu i te hoê tumu raau
I Roma i mutaa ihora, e atua o Janus no te mau haamataraa. E mea pinepine oia i te faahoho‘ahia e piti hoho‘a mata—hoê e hi‘o i muri no tei ma‘iri, e te tahi e hi‘o i mua no tei a muri a‘e. Te ma‘iri nei te tahi mau reo i te ava‘e tenuare ia au i to’na i‘oa, no te mea, ua riro te omuaraa o te matahiti ei taime no te feruriraa e no te faanahoraa.
E rave rahi tauatini matahiti i muri mai, e rave rahi mau ta‘ere na te ao nei e faatumu nei i ni‘a i te hoê peu no te raveraa i te mau faaotiraa no te matahiti apî. Oia mau, e mea ohie te raveraa i te mau faaotiraa—te haapa‘oraa i te reira o te hoê ohipa taa ê roa ïa.
Ua farii te hoê taata o tei hamani i te hoê tapura roa no te mau faaotiraa no te matahiti apî i te hoê huru maitai no to’na haereraa i mua. Ua parau oia ia’na iho, « tae roa mai i teie nei, ua haapa‘o maita‘i au i ta’u tamaa, ua faaoroma‘i maite au, ua tape‘a noa vau i ta’u tapura haamau‘araa, e aita noa‘e au i maniania no te uri a te taata tapiri mai ia’u. Tera râ te 2 no tenuare teie mahana, e no ta‘i noa mai nei te oe e e taime teie no’u ia ti‘a na ni‘a mai i te ro‘i. E riro ei semeio ia tape‘a noa vau i ta’u mau opuaraa ».
Haamata-faahou-raa
Te vai ra te tahi ohipa faahiahia papû maita‘i no ni‘a i te hoê haamataraa apî. Te mana‘o nei au i te hoê taime e aore râ te tahi atu, ua hinaaro tatou paatoa e haamata faahou ma te hoê tapura mâ.
Mea au roa na’u e farii i te hoê roro uira apî e te hoê pehe putu (disque dur) mâ. No te tahi taime e tere maita‘i roa te reira. Tera râ a tere noa ai te mau mahana e te mau hepedoma e rahi noa mai te mau faanahoraa i te haamauhia (vetahi e mea hinaarohia, vetahi e ere i te mea hinaarohia), e mea papû e haamata te roro uira i te taere, e te mau mea ta’na i faaohipa no te rave vitiviti e te manuïa e riro i te turuhe. Te tahi taime eita te reira e tere faahou. Oia’toa no te faatere faahou ia’na e nehenehe e riro ei ohipa rahi no te mea ua î roa te pehe putu i te mau itepiri e i te mau ohipa faufaa ore. Te tahi râ mau taime te rave‘a hopea roa o te tumâraa ïa i te pehe putu o te roro uira e te haamata-faahou-raa.
E nehenehe atoa i te huru taata e riro i te î roa i te ri‘ari‘a, i te feaa, e i te pe‘ape‘a teimaha. Te mau hape ta tatou i rave (mea hinaarohia anei e e ere i te mea hinaarohia) e nehenehe e faateimaha ia tatou e tae roa i te taime e au ra e mea fifi roa ia rave i te mea ta tatou i ite e ti‘a ia tatou ia rave.
I roto i te huru o te hara, te vai ra te hoê rave‘a faahiahia mau no te tumâraa, tei piihia te tatarahapa o te faati‘a ia tatou ia tumâ i to tatou pehe putu tei î, o te faateimaha nei i to tatou aau. E faaite mai te evanelia, na roto i te taraehara semeio e te aroha o Iesu Mesia, ia tatou i te e‘a no te tamâ i to tatou varua i te tafetafeta o te hara e ia riro ei mea apî faahou, te mâ, e mai te hoê tamarii hara ore.
I te tahi râ taime, e faataere vetahi mau ohipa ia tatou i raro e e tape‘a’tu ia tatou, o te faatupu mai i te mau mana‘o e te mau raveraa hotu ore o te haafifi ia tatou ia haamata.
Faatupu i te huru maita‘i a‘e i roto ia tatou
Haamau i te mau opuaraa o te hoê raveraa hanahana ïa. Ua ite tatou e mau opuaraa ta to tatou Metua i te ra‘i ra, no te mea ua parau Oia ia tatou e Ta’na ohipa e To’na hanahana o te « faatupu i te tahuti ore e te ora mure ore o te taata nei ». (Mose 1:39)
E nehenehe ta tatou iho mau opuaraa e faaite mai i to tatou maita‘i a‘e. Teie râ, te hoê o te mau ohipa o te haaparuparu i ta tatou tautooraa i roto i te raveraa e te haapa‘oraa i te mau faaotiraa o te vaihoraa ïa no te tahi ê atu mahana e rave ai. E faataere tatou i te tahi taime te haamataraa, ma te tia‘iraa i te taime tano no te haamata—te mahana matamua o te matahiti apî, te omuaraa o te tau mahanahana, ia piihia tatou e te episekopo e aore râ e te peresideni o te Sotaiete Tauturu, i muri iho ia haere ana‘e te mau tamarii i te haapiiraa, i muri iho ta tatou faatuhaaraa.
Aita outou e hinaaro i te hoê parau titauraa na mua‘e outou e haamata ai i te nuu i roto i te faatereraa o ta outou mau opuaraa tano. Aita outou e titauhia ia tia‘i i te parau faati‘a no te riro ei taata o ta outou i faataa ia riro mai. Aita outou i titauhia ia tia‘i ia ani-manihini-hia no te tavini i roto i te Ekalesia.
E nehenehe tatou i te tahi taime e haamau‘a e rave rahi mau matahiti o to tatou oraraa i te tia‘iraa ia ma‘itihia. (hi‘o D&C 121:34–36) Teie râ o te hoê mana‘o hape te reira. Ua ma‘iti-a‘ena-hia outou !
I te tahi mau taime o to’u oraraa, aita vau e taoto maita‘i i te pô ua î to’u feruriraa i te mau uiraa, i te mau haape‘ape‘araa e aore râ i te oto no’u iho. Noa’tu râ eaha te huru uriuri o te poiri o te pô, e faaitoito-tamau-hia vau e teie mana‘o : ia po‘ipo‘i e hiti mai te mahana.
I te mahana apî atoa, e tae mai hoê tataiao apî—eiaha noa no te fenua no tatou atoa râ. E no te hoê mahana apî e tae mai hoê haamataraa apî—hoê fana‘o no te haamata faahou.
E mai te mea e, aita tatou e manuïa ?
Te tahi taime te ohipa o te tape‘a nei ia tatou o te mata‘u ïa. E mata‘u paha tatou e eita tatou e manuïa, e ia manuïa tatou, e pe‘ape‘a rii tatou, e taui paha teie manuïa i to tatou huru, e aore râ e taui paha te huru o te feia ta tatou i here.
E no reira e tia‘i tatou. E aore râ e vaiiho roa.
Te tahi ohipa o ta tatou e ti‘a ia haamana‘o noa ia haamau ana‘e tatou i te mau opuaraa o teie ia : E mea papû paha eita tatou e manuïa—no te hoê noa râ taime poto. Eiaha râ e haaparuparu te mana‘o, e ti‘a ia tatou ia itoito no te mea e iriti teie haro‘aro‘a i te teimaha no te riro ei mea maita‘i a‘e i teie nei. Te faaite mai nei te reira i te omuaraa ra e, e te vai ra te taime, e nehenehe tatou e ma‘iri. Te iteraa i te reira na mua roa, na te reira e iriti ê i te tuhaa rahi o te maere e te mana‘o paruparu o te manuïa ore.
Ia piri atu tatou i ta tatou mau opuaraa mai teie te huru, eita te manuïa ore e taoti‘a ia tatou. A haamana‘o, noa’tu aita tatou e tae i to tatou tapaeraa mau tei hinaarohia i teie ihoa taime, ua nuu tatou i mua i ni‘a i te e‘a e arata‘i atu i reira.
E teie mau ohipa—e auraa rahi to te reira.
Noa’tu e ma‘iri tatou na mua a‘e i te reni tapaeraa, na roto i te rave-tamau-raa na te reira e faariro ia tatou ei mea maitai a‘e i tei na mua a‘e.
Te taime maita‘i a‘e no te haamata, i teie nei ïa.
Te parau ra hoê maseli tahito e, « te taime maita‘i a‘e no te tanu i te hoê tumu raau, e 20 matahiti ïa i ma‘iri. Te piti o te taime maita‘i a‘e, i teie nei ïa ».
Te vai ra te hoê ohipa faahiahia roa e te ti‘aturi rahi no te ta‘o i teie nei. Te vai ra te hoê ohipa papû maita‘i, mai te peu e ma‘iti tatou e rave i te hoê faaotiraa i teie nei, e nehenehe tatou e nuu i mua i teie ihoa taime.
Teie nei o te taime maita‘i a‘e no te haamata ia riro ei taata o ta tatou i hinaaro mau ia riro mai—eiaha no te 20 matahiti noa, no te mau tau atoa râ e a muri noa’tu.
© 2014 by Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/13. Parau faati‘a no te iritiraa : 6/13. Iritiraa no First Presidency Message, January 2014. Tahitian. 10861 895
Haapiiraa no roto mai i teie parau poroʻi
Ua faataa te peresideni Uchtdorf e, ia ore ana‘e tatou e tapae i ni‘a i ta tatou mau opuaraa, « e nehenehe tatou e tae. … Noa’tu e ma‘iri tatou na mua a‘e i te reni tapaeraa, na roto i te rave-tamau-raa, na te reira e faariro ia tatou ei mea teitei a‘e, i tei na mua a‘e. A ani i te mau melo o te utuafare ia faaite mai i te mau iteraa i reira ratou i te haapii-hau-raa na roto mai i te faanahoraa, eiaha râ na roto mai i te hopearaa, mai te fariiraa i te parau tuite i te fare haapiiraa e aore râ te fariiraa i te haamauruururaa.