2014
Te misioni hanahana a Iesu Mesia : Hoho‘a
Tenuare 2014

Parau poro‘i na te mau tuahine hahaere, Tenuare 2014

Te misioni hanahana a Iesu Mesia : Hoho‘a

A tuatapapa na roto i te pure i teie materia ma te imi ia ite eaha te faaite atu. Nahea te maramaramaraa i te oraraa o te Faaora e i Ta’na misioni e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te mau tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org

Te Faaroo, Te Utuafare, Te Totauturu

No to tatou haro‘aro‘a e o Iesu Mesia to tatou hi‘oraa i roto i te mau mea atoa, e nehenehe tatou e faarahi i to tatou hinaaro ia pee Ia’na. Ua î te mau papa‘iraa mo‘a i te mau faaitoitoraa no tatou no te pee i te mau taahiraa o te Mesia. Na ô atura te Mesia i te Ati Nephi, « o ta outou hoi i hi‘o mai ia’u i te rave, o ta outou ïa e rave ». (3 Nephi 27:21) Na ô atura te Fatu ia Toma, « O vau te e‘a, te parau mau, e te ora : aore roa e taata e tae i te Metua ra, maori râ ei ia‘u » (Ioane 14:6).

I teie mahana te faahaamana‘o mai nei te feia faatere ia tatou ia tuu i te Faaora ei hi‘oraa no tatou. Ua parau o Linda K. Burton, peresideni no te Sotaiete Tauturu e, « Ia papa‘i-ana‘e-hia te haapiiraa no te Taraehara i roto i te hohonu o to tatou aau tata‘itahi, ei reira tatou e haamata ai i te riro ei huru taata ta te Fatu e hinaaro ».1

Ua parau te peresideni Thomas S. Monson e, « to tatou Fatu e Faaora, o Iesu Mesia, o to tatou hi‘oraa e to tatou puai ».2

A rave ana‘e i te faaotiraa ia haafatata atu ia Iesu Mesia, ia haapa‘o i Ta’na mau faaueraa, e ia tautoo no te ho‘i i to tatou Metua i te ra‘i ra.

No roto mai i te mau papaʻiraa moʻa

2 Nephi 31:16 ; Alama 17:11 ; 3 Nephi 27:27 ; Moroni 7:48

No roto mai i to tatou aamu

« Ua tapa‘o Oia i te arati‘a e ua iriti i te e‘a », te papa‘iraa ïa a Elisa R. Snow, te piti o te peresideni o te Sotaiete Tauturu, no te misioni a Iesu Mesia i te tahuti nei.3 Ua tavini Oia i te taata—hoê i muri iho hoê. Ua haapii Oia e e ti‘a ia tatou ia vaiiho i te iva ahuru ma iva no te faaora i tei hahi ê (hi‘o Luka 15:3–7). Ua faaora e ua haapii Oia i te taata, ma te rave i te taime no te taata tata‘itahi i roto i te hoê naho‘a e 2.500 taata (hi‘o 3 Nephi 11:13–15 ; 17:25).

Ua parau te Peresideni Dieter F. Uchtdorf, te tauturu hoê i roto i te Peresideniraa Matamua e : « O outou te mau tuahine faahiahia, te horo‘a nei outou i te taviniraa aroha i te tahi atu mau taata no te mau tumu o te mono i te mau hinaaro no to outou iho maitai. No te reira te rave nei outou mai te Faaora te huru. … Tei ni‘a noa to’na mau mana‘o i te tautururaa ia vetahi ê ».4

© 2014 by Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/13. Parau faati‘a no te iritiraa : 6/13. Iritiraa no Visiting Teaching Message, January 2014. Tahitian. 10861 895

Te mau nota

  1. Linda K. Burton, « Te faaroo i te taraehara a Iesu Mesia, ua papa‘ihia anei i roto i to tatou aau ? » Ensign e aore râ Liahona, Novema 2012, 111.

  2. Thomas S. Monson, « Meeting Life’s Challenges », Ensign, Novema 1993, 71.

  3. « Auê te Paari e te Aroha », Te Mau Himene, no. 109.

  4. Dieter F. Uchtdorf, « Happiness, Your Heritage », Ensign e aore râ Liahona, Novema 2008, 120.

Eaha ta’u e nehenehe e rave ?

  1. No te aha e nahea o Iesu Mesia e riro ai ei hi‘oraa no’u ?

  2. Nahea te taviniraa i te mau tuahine ta’u e hahaere nei e tauturu ia’u ia pee i te Faaora ?