Pweng sin Prestuhnsi Se Met, Fepweri 2014
Kuhlwacnsapuh Leum ke Luhngse
Leum Jisus Kraist El luti, “Tuh el suc luhngse molwelah moul lal ac fah tuhlac luhkwel, ac el suc moul lal tuhlac luhkwel keik, fah molwelah moul lal” (Luk 9:24).
“Nga luhlahlfongi,” Prestuhn Thomas S. Monson el fahk, “Mwet Lahngo El fahk nuh sesr lah kuht fin tiac tuhlac in kuhlwacnsapuh mwet sahyac, srihklac srihpac ke moul lasr sifacna uh. Elos suc moul muhkwena kwaclos sifacna uh ac tuhfah molokweni ac tuhfah tuhlac moul lalos, ke elos suc tuhlac moul lalos ke kuhlwacnsapuh mwet sahyac uh kapwack ac fokokoi—ac sahflahiyac uh molwelah moul lalos.”1
Ke pohloh fahk ten ke luti lal Prestuhn Monson an, el ahkacsmakihnye Mwet Luhlahlfongi ke Lwen-sahflah lah elos pa poun Leum ac lah mwe insewowo luhn ma pahtpaht tuhpanuhlos suc oaru in kuhlwacnsapuh mwet sahyac uh.
Kuhlwacnsap lun Tempuhl
“Kuhlwacnsap wowo oreklac ke kuht oruh akwuck oreklac nuh selos suc ma misac tari. Ke ohiyac pucspucs kuht nihkanuhlos suc kuht oruh orekma uh nuh se uh. Kuht tiac motko in kulohkihnyuck, kuh kuht tiac etuh lah elos ac insese nuh ke ma kuht oruh uh. Tuhsruhktuh, kuht kuhlwacnsap, ac ke oruh sac kuht eis ma ma tuhkuh ke wacngihn kuhiyac sahyac kac: kuht ekihn mwet lahngo ke Ohl Saion. Ke Mwet Lahngo lasr El sang moul Lal in oa sie kihsac oreklac nuh sesr uh, kuht pac, ke kuhtuh ohiyac srihsrihk, oruh oacna ke kuht oruh orekma nuh sin mwet misac lun tempuhl nuh selos suc koflah kihluck nuh met ne ke na oasr ma oreklac nuh selos sesr suc oasr inge fin facluh.”2
Kuht Pa Poun Leum Uh
“Tamuhlwel ac tahmtahel wiyuck an, kuht rauniyuckyak sin mwet ma enenuh pacl lasr, ahkkweyeyuck lasr, tahpuhkyuck lasr, ahkwo lasr, kuhlwacng lasr—elos finne sucu, kawuck, mwet wiyacsr, kuh mwet sac uh. Kuht pa poun Leum inge fin facluh uh, ke kunohkohn se in kuhlwacnsap ac sruhk tuhlihk Nahtuhl uh. El luhlahlfongi kuht kais sie. …
“Kuhlwacnsap sac ma kuht nohfohn pahngpahng nuh kac pa kuhlwacnsap nuh sin Leum Jisus Kraist.”3
Kuhlwacnsap ke Nguhnihn Mwet Lahngo
Ke Facluh Sasuc se, Leum moulyak El fahk lah kuht etuh ma ma kuht enenuh in oruh ke Alu Lal uh; tuh orekma kuht liye El oruh uh pa kuht in oruh uh [Liye 3 Nephi 27:21].
“Kuht ahkinsewowoye mwet sahyac ke kuht kuhlwacnsap ke nguhnihn ‘Jisus luhn Nazareth … suc som ac oruh ma wo’ [Orekma 10:38]. God El ahkinsewowoye kuht in konwacack engan ke kuhlwacnsapuh Pahpah tuhmasr Inkuhsrao ke kuht kuhlwacnsapuh tuhlihk Nahtuhl fin facluh.”4
Enenuh Se in Kuhlwacnsap
“Enenuh in utuckuh pacl se lasr in kuhlwacnsap. Nuh selos mempucr ma mihsrwelac liki mukwikwi kuh suc muhta tiac ke wi oruh ma uh, kuht kuh in pruhe in suk ke kuhtuh inkacnek in sonolos. Siyuck selos in kuhlwacnsap ke kuhtuh ma uh kuh in oruh ohiyac se elos in fohlohk wi mukwikwi uh. Tuhsruhk mwet kol ingacn suc kuh in kahsruh ke nguhsr se inge pa kuhtuh pacl uh tuhpwek in oruh oacna. Kuht enenuh in sang nuh in mwe nuhnak uh lah mwet uh kuh in eklac. Elos kuh in fihliyac nuh sahyac oruh koluk lalos an. Elos kuh in auliyak ke ma koluk uh. Elos kuh in nwacsnwacs in orekmakihn pristut. Ac elos kuh in oaru in kuhlwacnsapuh Leum.”5
Kuh Kuht Oruh Ma Nuh Kwewa Kuht Enenuh In Oruh Uh?
“Facluh enenuh kahsruh lasr uh. Kuh kuht oruh ma nuh kwewa kuht kuh in oruh uh? Kuh kuht esam kahs lal Prestuhn John Taylor ah: ‘Kowos fin tiac ahkfalye pahng lowos an, God lac usot mwacta nuh suwos kwaclos suc kowos kuh in molwelah kowos fuhnuh orwaclah ma kunowos’? [Luti luhn Prestuhn ke Alu uh: John Taylor (2001), 164]. Oasr niyac in tu kuh, paho in sruokwacni, mwe nuhnak in ahkkweye, insiyac in mokle, ac nguhna in molwelah. Mwe insewowo ma pahtpaht tuhpan kowos. Pacl wowo lowos in tiac mwet intoe tuhsruhk in mwet wi oruh kac ke yen in … kuhlwacnsap.”6
© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, February 2014. Kosraean. 10862 868
Luti ke Pweng Se Inge
“Fin oasr luhngse lowos ma oacna ohiyacn Kraist, kowos ac fah ahkolah wo in luti wosasuc. Kowos fah mokleyuck in kahsruh mwet sahyac in etuh Mwet Lahngo ac in Ukwacl.”7 Nuhnkuh in pruhe nuh ke yohkwelihk luhn luhngse pwacye nuh selos suc kowos muhtwacta yohroh an. Ke kowos ahkyohkye luhngse ke ohiyacn Kraist nuh selos uh, kowos fah kuh in kuhlwacnsap ke ohiyac oasr srihpac nuh sin kwewana Leum ac elos suc kowos luti an.