Etop eke First Presidency, Ofiong Ita ke Isua 2014
Unwam ye Nsinsi Uwem
Andinyanga edi uwutnkpo ono nnyin kabanga eti unwam. Eti edisana uwem esie ekedi abanga ndinwam Ete nnyin ke Enyong ye kpukpru ndito eke Ete esie. Uduak Ete ye Eyen edidiana kiet edi man ono kpukpru nnyin eno ikpokidem emi midikpaha mkpa ye edidiong eke nsinsi uwem. (kese Moses 1:39).
Ndidot man inyene nsinsi uwem, nnyin inyene ndikpuhore oto Uwa Usio Isop eke Jesus Christ— mmana obufa nnyung nsana mkpong idioknkpo. Mkpri ndito ke idak isua itiaita, nte ededi, inyeneke idioknkpo ndien enyanga mmo oto ke Uwa Usio Isop (kese Mosiah 3:16, 21; Moroni 8:10–12).
Nte nnyin emi isimde isua emi idade ke iso ikpe, odu eti usung emi edinwamde nnyin ndikpong idioknkpo nyung mbenge idem nno nsinsi uwem. Usung mbenge idem oro otongo ye uduok mmong nto odudu itie oku ye ndibo Edisana Spirit. Ndien nnyin inyene nditi Andinyanga kpukpru ini nyung nnim mme mbet emi Enye okonode nnyin.
King Benjamin ama eting ke Nwed Mormon ono ikot esie kabanga inemesit emi odude ke edifen ke mme idioknkpo oto ke Uwa Usio Isop eke Jesus Christ. Ndien enye ekekpep mmo ete ke mmo ndibo edifen ke mme idioknkpo mmo, mmo enyene ndikpep ndito mmo ndinwam kiet eken ndien mmo enyene ndinwam owo ekededi eke oyomde unwam edide ke unana obukidem mme eke spirit. (Kese Mosiah 4:11–16).
Enye ekekpep nko ete, “Sese, ami nsian mbufo mbanga mme nkpo emi man mbufo ekpep ifiok, man mbufo ekpep ete ke ini mbufo enode mboho idung mbufo uwam enam utom Abasi” (Mosiah 2:17).
Jesus akasanga anam utom ukpep iko Abasi Esie onyung anam nti nkpo. (kese Utom mme Apostle 10:38). Enye ama okok mme udongo. Enye ama anam mme akpa mkpa eset. Ke odudu esie Enye ama ono ediwak tosin owo udia kini biong okodongde mmo ndien inyung inyeneke udia (Kese Matthew 14:14–21; John 6:2–13). Ke Enye ama Ekeset ke Mkpa Enye ama ono ediwak Mbet Esie udia kini mmo edisimde ke mben Akpa Galilee (kese John 21:12–13). Ke America, Enye ama okok mbon udongo onyung odiong mkpri ndito kiet kiet (kese 3 Nephi 17:7–9, 21).
Apostle James ekekpep nnyin danga udong ndinwam mbon efen oworo oto inemesit eke nnyin inyenede kabanga se Jehovah akanamde ono nnyin:
“Edi owo eke enimde mbet uworo ufin, onyung onimde aka iso, midige ndikokop, edi andinam iko, owo emi eyebo edidiong ke utom esie. …
“Edisana ido Abasi emi midekheke ke enyin Abasi nnyin ye Ete edi emi, Ndika nkese ndito-akpa ye Mmm ebekpa ke ukut mmo, nyung nim idemesie edisana ke ererimbot” (James 1:25, 27).
Kiet ke otu mme idorenyin emi owutde ete ke eyet mbufo esana edi ndinyene akamba udong ndinwam owo nno Andiyanga. Home teaching ye visiting teaching akabare edi nkpo idara onyung emem ndinam. Afo okut idem fo nte awade idem ke ndinwam ke ekpri ufoknwed mme ndinwam ndise nkpo mbanga mme ubuene ke obio mbufo. Okposuk edi nte afo enyenede ekpri okuk ndinwam mmo eke minyeneke, okposong udong fo edi ndinwam nkan oro edieke afo ekpenyenede. (kese Mosiah 4:24). Afo edikut idem fo nte enyenede udong ndinwam ndito fo onyung owut mmo usung nte ekpenwamde mbon efen.
Nte uduot fo okpuhore, afo eyenyene udong ndisin akamba unwam nno owo ke muyomke ediongo fi. Ami mmediongo ikot Abasi emi enode ediwak eno okuk esin unwam ye nsin ifik ke usung eke baba owo kiet ibohoke Abasi ikpong ye ndito esie efiokde ebanga. Abasi okut unwam mmo ke ndidiong mmo ke uwem emi, ndien Enye eyediong mmo ke uwem nsinsi emi edidide (kese Matthew 6:1–4; 3 Nephi 13:1–4).
Nte afo ekenimde mbet ndinwam owo efen (sese Matthew 22:39), afo emekop ukpuhore nkpo abanga ekikere ntangidem mbufo. Andiyanga ama ekpeb mme Mbet Esie kini mmo ekekerede ebanga owo emi edide akamba ke otu mmo. Enye odoho ete:
“Kuyom ekot mbufo Obong: koro kiet edide Obong, kpa Christ.”
“Edi enye emi edide akamba ke otu mbufo eyekabare edi isungutom” (Matthew 23:10–11).
Andiyanga ekekpep nnyin nte ikpenwamde mbio efen. Enye ama anwam ke edisana usung, ndien nnyin inyene ndikpep ndinwam nte Enye ekekpepde—ke udim ke udim (kese D&C 93:12–13). Oto ke unwam eke nnyin inode, nnyin imekeme ndibiet Enye. Nnyin iyebong akam ye ofuri esit ndima mme asua nnyin nte Enye amade mmo (kese Matthew 5:43–44; Moroni 7:48). Ndien nnyin ke akpatre iyedot ndinyene nsinsi uwem ye Enye ye Ete nnyin ke Enyong.
Ami mmenwongo nte nnyin imekeme ndinwam ke eti usung nte nnyin itieneke ukpepnkpo ye uwutnkpo eke Andinyanga.
© 2014 eketode Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13. Edikabare eke First Presidency Message, March 2014. Efik. 10670 553
Ukpeb nkpo eketode Etop Emi
Elder M. Russell Ballard eke Eboho mme Mbet Duopeba ama odoho nnyin ete yak nnyin ibong akam man iyom ufang ndinwam: “Ke akam usenubok fo kpukpru obufa usen, benge, Ete ke Enyong ndikpeme fi ndikut ufang man anwam kiet ke otu mme osongurua ndito Esie. Ndien da ofuri usen kiet … ndiyom owo man anwam” (“Sin Ifik Yom,” Ensign ye Liahona, Nov. 2012, 31). Kere banga ndikot mmo emi afo ekpepde nditongo ndibong akam kpukpru usenubok nyom ufang ndinwam nyung nyom ufang oro ke ofuri usen oro.