Pweng sin Prestuhnsi Se Met, Mahs 2014
Kuhlwacnsap ac Moul Ma Pahtpaht
Mwet Lahngo pa mwe srihkasrak lasr ke kuhlwacnsap tiac kuhtasrihk. Moul suwohswohs Lal pa oaru in kuhlwacnsapuh Pahpah Lucng ac tuhlihk nuh kwewa nuhtin Pahpah Tuhmwacl. Sie sin sie ke srihpac luhn Pahpah ac Wen pa in use nuh sesr nuh kwewa mwe sang luhn moul suhkawihl ac mwe insewowo ke moul ma pahtpaht (liye Moses 1:39).
In ahkfalye nuh ke moul ma pahtpaht, kuht enenuh in eklac ke Iwaclah luhn Jisus Kraist—sifilpac isuslac ac ahknwacsnwacsyeyucklac liki ma koluk. Tuhlihk srihsrihk suc soenna sun matwac yac oalkosr, tuhsruhktuh, wacngihn ma koluk lalos ac moliyucklac ke Iwaclah (liye Mosiah 3:16, 21; Moroni 8:10–12).
Nuh sesr nuh kwewa suc sun matwac ma kuh in eis mwacta, oasr sie plwacn wolacna ma lwelah kuht in ahknwacsnwacsyeyucklac liki ma koluk ac ahkolah nuh ke moul ma pahtpaht. Ahkolah sac muhtwacwacack ke pacptais ke kuh luhn pristut ac eisyuck luhn Nguhn Muhtahl. Na kuht enenuh in esam Mwet Lahngo pacl nuh kwewa ac karihngihn masap ma El use nuh sesr.
Tohkohsrah Benjamin el fahk nuh sin mwet lal ke Puk luhn Mormon ke engan ma tuhkuh ke puhla nuhnak muhnahs ke ma koluk ke Iwaclah luhn Jisus Kraist. Na el lotwelos lah in kalweni eis nuhnak muhnahs ke ma koluk lalos, elos enenuh in luti tuhlihk nahtuhlos in kuhlwacnsapuh sie sin sie ac elos enenuh in kuhlwacng ke elos kuh in ahkfalye mwe enenuh luhn mahno ac nguhn luhn mwet siskaclos. (Liye Mosiah 4:11–16.)
Tohkohsrah Benjamin el luti lah ke kuht kuhlwacnsapuh mwet tuhlan lasr, kuht kuhlwacnsapuh God lasr (Liye Mosiah 2:17).
Jisus El forfor luti wosasuc Lal ac oruh ma wo (liye Orekma 10:38). El ahkkweyelah mwet mas. El ahkmoulyeack mwet misac. Ke kuh Lal El kihte mwet tausin ke elos masrinsrwacl ac wacngihn mongo (liye Mattu 14:14–21; John 6:2–13). Tukun Moulyak Lal El sang mongo nuh sin Mwet Sap puhs Lal ke elos fohlohk liki Meoa Galilee (liye John 21:12–13). Fin acn Macrike, El ahkkweyelah mwet mas ac kais sie ahkinsewowoyelah tuhlihk srihsrihk (liye 3 Nephi 17:7–9, 21).
Mwet Sap James el luti kuht lah kena in kuhlwacnsapuh mwet sahyac kuh in tuhkuh fuhkah ke srui lasr ke ma Leum El oruh kacsr:
“Kuhtwena mwet suc arulacna lohacng nuh ke masap wowo suc ahksukohsohkye mwet uh, ac el kwacfeacng in nuhnkuh na kac, ac el tiac lohng muhkwena ac muhlkuhnlah, ac el orekmakihn mwet ohinge uh God El ac fah ahkinsewowoye ke ma el oruh. …
“Alu pwacye ac nwacsnwacs ye muhtuhn God Pahpah pa inge: in karuhnguhnwacng tuhlihk muhkahimtacl ac katinmas suc muhta in ongaiyac, ac sifacna liyacacng tuh ma koluk luhn facluh in tiac ahkfohkfohkye kom.” (James 1:25, 27).
Sie mwe ahkpwacye lah kom ahknwacsnwacsyeyucklac pa kena yohkwaclihk se in kuhlwacnsapuh mwet sahyac nuh sin Mwet Lahngo. Luti in sucu ac forfor luti uh eklac nuh ke ma engan ac tilac orekma se. Kom konwekomyak sifacna in kahsruh pacl puhs liki na met ah ke acn lutlut kuh kahsruh mwet suhkahsruhp ke mura lom. Finne suhpuhs mani lom in sang nuh sin mwet suhkahsruhp, kom finsrak in oasr mani yohk lom kom in muh kuh in sang yohk (liye Mosiah 4:24). Kom konwekomyak sifacna in kena kuhlwacnsapuh tuhlihk nuhtum ac ahkkahlwemye nuh selos ohiyacn kuhlwacnsapuh mwet sahyac uh.
Ke ohiyac lom an eklac uh, kom ac puhla sie kena in kuhlwacnsap yohk liki na met ah ac tiac eis akihlenyuck kac. Nga etuh mwet tuhma lutlut luhn Mwet Lahngo suc sang mwe sang yohk luhn mani ac kuhlwacnsap ke oaru ma wacngihn sie mwet tuhsruhktuh God ac tuhlihk nahtuhlos ac fah etuh kac. God El akihlen kuhlwacnsap lalos in ahkinsewowoyaclos ke moul se inge, ac El ac fah ahkinsewowoyaclos ke moul ma pahtpaht ma ac fah tuhkuh (liye Mattu 6:1–4; 3 Nephi 13:1–4).
Ke kom karihngihn masap in kuhlwacnsapuh mwet sahyac (liye Mattu 22:39), kom puhla sie eklac ke puhla luhn inse fuhlwact lom. Mwet Lahngo El ahksuwohsye Mwet Sap Lal ke elos akuhkuhin lah suc selos ac yohk emet inmahsrlolos. El fahk:
“Kowos in tiac pac lwelah mwet uh in pahngon kowos Mwet Kol, mweyen Mwet Kol sefanna lowos uh pa Messiah.
“Enenweyuck tuh el suc fuhlwact emet inmahsrlowos elan mwet kuhlwacnsap lowos” (Mattu 23:10–11).
Mwet Lahngo El luti kuht ohiyac kuht kuh in etwaclah in kuhlwacnsapuh mwet sahyac uh. El kuhlwacnsap suwohswohs, ac kuht enenuh in etwaclah in kuhlwacnsap oacna ke El etwaclah—ip nuh ke ip (liye D&C 93:12–13). Nuh ke kuhlwacnsap ma kuht sang, kuht kuh in oruh oacna El yohk likina met ah. Kuht ac pruhe ke kuhiyacn insiyacsr nohfohn in luhngse mwet lokoalok lasr oacna El luhngse elos (liye Mattu 5:43–44; Moroni 7:48). Na kuht kuh in sun ma fal in eis moul ma pahtpaht Yohrohl ac Pahpah tuhmwacsr Inkuhsrao.
Nga olwelah tuh kuht kuh in kuhlwacnsap wo liki na met ah ke kuht ukwe mwe luti ac srihkasrak luhn Mwet Lahngo.
© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, March 2014. Kosraean. 10863 868
Luti ke Pweng Se Inge
Elder M. Russell Ballard ke U luhn Mwet Sap Singucul Luo el kwacfe kuht in pruhe ke pacl wo in kuhlwacnsap: “Ke pruhe in lututacng lom ke kais sie lwen sasuc, siyuck Pahpah Lucng Elan kol kom in akihlen pacl wo se in kuhlwacnsapuh sie sin tuhlihk sacohk Nahtuhl. Na ahkwot ke lwen uh … in sukok mwet kom in kahsruh” (“Be Anxiously Engaged,” Ensign kuh Liahona, Nohfuhmpuh 2012, 31). Motko in suli elos suc kom luti in orwaclah finsrak yohk in pruhe ke kais sie lututacng nuh kwewa nuh ke pacl wowo in kuhlwacnsapuh ac na sokolosyak ke lwen uh.