2014
Misin Wolacna luhn Jisus Kraist: Kahlwem luhn Facluh
March 2014

Pweng ke Forfor Luti, Mahs 2014

Misin Wolacna luhn Jisus Kraist: Kahlwem luhn Facluh

Pruhe in lutlutkihn kuhfa inge ac suk in etuh ma in akacsruhi kac. Etuh moul se ac misin luhn Mwet Lahngo ac ahkyohkye fuhkah luhlahlfongi lom Kacl ac ahkinsewowoye mwet kom liyacacng ke forfor luti uh? Nuh ke kuhtuh pac ma in etuh, som nuh ke reliefsociety.lds.org.

Luhlahlfongi, Sucu, Kahsruh

Ke kuht muhtwacwacack in kahlwem kac lah Jisus Kraist pa Kahlwem luhn Facluh, kuht ac ahkyohkye luhlahlfongi lasr Sel ac oruh kahlwem se nuh sin mwet sahyac. Kraist El fahkwack ke srihpac Lal ke kahlwem pwacye ma ahkkahlwemye mwet nuh kwewa suc tuhkuh nuh facluh (liye D&C 93:2) ac siyuck lah kuht sruok kahlwem Lal tuh in kuh in tohlwack facluh (3 Nephi 18:24).

Mwet pahluh lasr elos oacyacpac fahkwack ke Kahlwem luhn Kraist. Prestuhn Henry B. Eyring, Mwet in Kahsruh Se Met ke Prestuhnsi Se Met, el fahk: “Kais sie pacl kom sulwaclah in moul yohk likina met ah in oacna Mwet Lahngo, fahkwack luhlahlfongi lom ac fah ahkfokokoyeyucklac. In pacl kom ac fah sifacna etwacack lah El pa Kahlwem luhn Facluh. … Kom ac fah ahkkahlwem-ye nuh sin mwet sahyac ke Kahlwem luhn Kraist ke moul lom an.”1

Elder Quentin L. Cook ke U luhn Mwet Sap Singucul Luo el fahk lah ma inge ke kuht pa kahlwem nuh ke facluh: “Kuht enenuh in tuhkweni karihngihn sucu lasr ac muhta met yurun mwet nuh kwewa ma wo in oruh ma nuh kwewa kuht kuh in karuhnguhnwacng kahlwem, finsrak, ac nwacsnwacs ke acn lasr uh.”2

Ke Ma Suhmuhslah uh

John 8:12; Doctrine and Covenants 50:24; 115:5

Ke Sramsram Mahtuh Lasr

Muhtwacn Luhlahlfongi ke Lwen-sahflah mihsenge uh tahfwelah in kohlwack kahlwem lalos.

Ke twek ahk 80 ke lohm-loes fin acn Hong Kong, China, sie tahmtahel suhkahpahs ke mahno—Mwet Luhlahlfongi ke Lwen-sahflah muhkwena ke sucu lal— orwaclah lohm mihslac se ma el ac mwet muhtwacta kuh in puhla kolyuck luhn Nguhn. El fihliyac ma suhmuhslah, puk in luti lal ke Rilif Sosaiti, ac puk in on nahtuhl fototo nuh yohrohl. El som nuh ke tempuhl in oruh akwuck ke mwet mahtuh lal.3

Fin acn Brazil sie ninac suwohs el tuhfahlah tuhlihk nahtuhl ke kahlwem luhn wosasuc. On ke U luhn Tuhlihk Srihsrihk wohnwelah lohm puhlak sruhsrah se sel ah, ac petsac luhn tempuhl, mwet pahluh luhn God, ac Mwet Lahngo ke Liahona, afohnlah pihsinkac ah. El ac mukul tuhmwacl kihsackuhnlah in siliyucki ke tempuhl tuh tuhlihk nahtuhlos in muh kuh in isuslac nuh ke olweacng. Pruhe pacl nuh kwewa lal pa tuh Leum Elan kahsrwel in tuhfahlah tuhlihk nahtuhl ke kahlwem, ma pwacye, ac kuh luhn wosasuc.4

© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn Visiting Teaching Message, March 2014. Kosraean. 10863 868

Mwe kahsruh

  1. Henry B. Eyring, “A Living Testimony,” Ensign kuh Liahona, Mei 2011, 128.

  2. Quentin L. Cook, “Let There Be Light!” Ensign kuh Liahona, Nohfuhmpuh 2010, 30.

  3. Liye Daughters in My Kingdom: The History and Work of Relief Society (2011), 163–64.

  4. Liye Daughters in My Kingdom, 164.

Meac Nga Kuh In Oruh Uh?

  1. Sramsramkihn lah meac kalmac in sie kahlwem nuh facluh mihsenge.

  2. Motko ke ohiyac in ukwe kahlwem luhn Kraist in kahsrwe kom in muhtweng ke ma upac an.

Print