Messaġġ tal-Ewwel Presidenza, Marzu 2014
Servizz u Ħajja Eterna
Is-Salvatur huwa l-eżempju tagħna ta’servizz altruwista. Il-Ħajja perfetta Tiegħu ddedikaha biex jaqdi lil Missierna tas-Smewwiet u lil ulied Missierna kollha. L-għan komuni tal-Missier u tal-Iben hu li jagħtina lkoll ir-rigal tal-immortalità u l-barka tal-ħajja eterna (ara Moses 1:39).
Biex inkunu nistgħu nikkwalifikaw għall-ħajja eterna, għandna bżonn ninbidlu permezz tal-Att tal-Fidwa ta’ Ġesù Kristu—nitwieldu mill-ġdid u nitnaddfu mid-dnub. Madankollu, it-tfal żgħar taħt it-tmien snin huma mingħajr dnub u jiġu mifdijin permezz tal-Att tal-Fidwa (ara Mosiah 3:16, 21; Moroni 8:10–12).
Għalina lkoll li nilħqu l-età li tagħmilna responsabbli minn għemilna, hemm pjan meraviljuż li jagħtina ċ-ċans li nitnaddfu mid-dnub u nħejju ruħna għall-ħajja eterna. Din it-tħejjija tibda permezz tal-magħmudija minn min għandu l-awtorità tas-saċerdozju u bl-għoti tal-Ispirtu s-Santu. Imbagħad għandna dejjem niftakru fis-Salvatur u nżommu l-kmandamenti li Huwa tana.
Is-Sultan Benjamin kellem lin-nies tiegħu fil-Ktieb ta’ Mormon dwar il-ferħ li nirċievu meta nħossu li aħna ġejna maħfurin mid-dnub permezz tal-Att tal-Fidwa ta’ Ġesù Kristu. Imbagħad huwa għallimhom li, sabiex jibqgħu jiksbu maħfra minn dnubiethom, huma għandhom jgħallmu lil uliedhom biex jaqdu lil xulxin u għandhom ikunu ġenerużi kemm jistgħu meta jiġu biex jgħinu lil dawk ta’ madwarhom fil-bżonnijiet temporali u spiritwali tagħhom. (Ara Mosiah 4:11–16.)
Huwa għallimhom ukoll, “U araw, jiena ngħidilkom dan kollu sabiex tiksbu l-għerf; sabiex tkunu tafu li meta intom tkunu qed taqdu lil għajrkom intom fil-fatt tkunu qed taqdu lil Alla tagħkom” (Mosiah 2:17).
Ġesù għadda ħajtu jgħallem l-evanġelju u jagħmel il-ġid (ara Atti 10:38). Huwa fejjaq lill-morda. Huwa qajjem lill-mejtin. Bil-qawwa Tiegħu Huwa tama’ eluf ta’ nies meta huma kienu bil-ġuħ u mingħajr ikel (ara Mattew 14:14–21; Ġwanni 6:2–13). Wara l-qawmien Tiegħu mill-imwiet Huwa ta jieklu lil bosta Appostli minn Tiegħu meta dawn reġgħu lura lejn ix-xatt tal-Baħar tal-Galilija (ara Ġwanni 21:12–13). Fil-kontinent Amerikan, Huwa fejjaq lill-morda u bierek lit-tfal, wieħed wieħed (ara 3 Nephi 17:7–9, 21).
Ġakbu l-Appostlu għallimna kif ix-xewqa li naqdu lil ħaddieħor tiġi mill-gratitudni tagħna għal dak li għamel għalina l-Mulej:
“Imma dak li jgħarbel sewwa l-liġi perfetta tal-ħelsien, u jżomm sħiħ magħha, u ma jkunx wieħed li jisma’ biss u jinsa, iżda wieħed li jagħmilha, huwa hieni dan fl-għemil tiegħu. …
“Quddiem Alla u l-Missier, ir-reliġjon pura u bla tebgħa hija din, Iżżur l-iltiema u r-romol fl-hemm tagħhom, u żżomm ruħek bla tinġis ‘il bogħod mid-dinja” (Ġakbu 1:25, 27).
Xi ħaġa li tkebbes fik ċertezza li qed tippurifika ruħek hi meta inti tħoss xewqa dejjem tikber li taqdi lil ħaddieħor f’isem is-Salvatur. It-tagħlim tad-dar u t-tagħlim taż-żjajjar inti tibda tħares lejh bħala xi ħaġa ta’ ferħ u mhux xi biċċa xogħol li ġejt mitlub twettaqha. Tispiċċa tibda toffri aktar spiss l-għajnuna volontarja tiegħek fl-iskola lokali jew tibda tgħin aktar lil dawk li huma foqra fil-komunità fejn inti tgħix. Avolja ma tantx għandek flus x’tagħti lil dawk li għandhom anqas minnek, tkun tixtieq li għandek iżjed biex tkun tista’ tagħti iżjed (ara Mosiah 4:24). Tinbet ġewwa fik xewqa akbar li taqdi lil uliedek u turihom kif jaqdu lil ħaddieħor.
Hekk kif in-natura tiegħek tinbidel, inti tħoss ix-xewqa li toffri servizz akbar mingħajr ma tistenna lura ebda rikonoxximent. Jiena naf dixxipli tas-Salvatur li taw somom kbar ta’ flus u offrew is-servizz tagħhom b’ determinazzjoni li ħadd ħlief Alla u ħlief uliedhom ma jkunu jafu x’għamlu. Alla għaraf is-servizz tagħhom billi berikhom f’ din il-ħajja, u Huwa jberikhom fil-ħajja eterna li għad trid tiġi (ara Mattew 6:1–4; 3 Nephi 13:1–4).
Hekk kif inti obdejt il-kmandament li taqdi lil ħaddieħor (ara Mattew 22:39), inti ħassejt bidla fis-sentimenti ta’ kburija tiegħek. Is-Salvatur ikkoreġa lill-Appostli Tiegħu meta huma bdew jargumentaw bejniethom dwar min kien l-akbar fosthom. Huwa qal:
“Tħallux min isejħilkom mexxejja, għax il-mexxej tagħkom wieħed hu, il-Messija.
“Il-kbir fostkom għandu jkun il-qaddej tagħkom” (Mattew 23:10–11).
Is-Salvatur jgħallimna kif nistgħu nitgħallmu naqdu lil xulxin. Huwa qeda lill-oħrajn b’ mod perfett, u aħna għandna nitgħallmu naqdu lil ħaddieħor kif tgħallem Hu—pass,pass (ara D&C 93:12–13). Permezz tas-servizz li nagħtu, aħna nistgħu nsiru bħalu. Nitolbu bil-qawwa kollha f’qalbna li nħobbu l-għedewwa tagħna kif ħabbhom Hu (ara Mattew 5:43–44; Moroni 7:48). Finalment aħna mbagħad inkunu nistgħu nikkwalifikaw għall-ħajja eterna Miegħu u ma’ Missierna tas-Smewwiet.
Jiena nwiegħed li aħna nkunu kapaċi naqdu b’ perfezzjoni akbar hekk kif aħna nimxu wara t-tagħlim u l-eżempju tas-Salvatur.
© 2014 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/13. Approvazzjoni tat-traduzzjoni: 6/13. Traduzzjoni ta’First Presidency Message, March 2014. Maltese. 10863 159
Tagħlim minn Dan il-Messaġġ
Il-Presbiteru M. Russell Ballard tal-Kworum tat-Tnax-il Appostlu ħeġġiġna sabiex nitolbu ħalli jkollna opportunitajiet fejn nistgħu naqdu lil ħaddieħor. “Fit-talb tiegħek kull filgħodu, itlob lill-Missier tas-Smewwiet sabiex jiggwidak ħalli tagħraf l-opportunitajiet li jkollok quddiemek li taqdi l-ulied prezzjużi tiegħu. Imbagħad għaddi l-jum … fittex lil xi ħadd biex tgħin” (“Be Anxiously Engaged,” Ensign jew Liahona, Nov. 2012, 31). Ikkunsidra li tistieden lil dawk li inti tgħallem sabiex jagħmlu riżoluzzjoni li kull filgħodu jitolbu sabiex huma jkollhom quddiemhom opportunitajiet li jaqdu lil ħaddieħor u jfittxu dawn l-opportunitajiet matul dak il-jum.