Klumech er a First Presidency, Ongedei el buil 2014
Omesiou me a Diak a Ulebengelel Klengar
A Osobel a meral okesiud er a ungil omesiou. A cherrungel el klengar er ngii a mloterekokl el mesiou er a Chedam er a Babeluades me a rokui el Ngelekel. Se el uldekial a moktek er a Chedam me a Ngalek a mesterir a rokui el chad a sengk er a diak el luut el kodall me a klengeltengat er a diak a ulebengelel klengar (mesa Moses 1:39).
A mo uchul e kede nguu a diak a ulebengelel klengar, eng kired el mengodech lokiu a Tngakireng er a Jesus Kristo—e lmuut el mechell e mo klikiid er a kngtid. A remekekerei el ngalek el ngariou er a eai a rekrir, a uaisei, el diak a kngterir e mla suobel lokiu a Tngkaireng (mesa Mosiah 3:16, 21; Moroni 8:10–12).
E kid el rokui el kuk mla mo rebab a rekid, e ngar ngii a klebokel el uldasu el uchul e kede mo beches er a kngtid e kudmeklid el kirel a diak a ulebengelel klengar. Tial kedmekled omuchel lokiu a techolbechelid er tirkel loba ngerachel er a priesthood me a dirrek el ngeiul a Chedaol Reng. E mo kired el blechoel el melbedebek er a Osobel e oltirakl a llechul el Ngii a mla meskid.
Chelsel a Babier er a Mormon e a King Benjamin a ulechais er a rechedal kirel a deureng el mei se el domelchesiu el mla mousubes er a kngtid lokiu a Tngakireng er a Jesus Kristo. E ulsisechakl er tir el kmo a uchul a ngbetel a kngterir, eng kirir el mo olsisechakl er a rengelekir el mo mesiou er a ta me a tang e kirir el mo bekerurau el kirel aikel lousbech a bedenged me a reng er tirkel meliuekl er tir el chad. (Mesa Mosiah 4:11–16.)
Ng dirrek el ulsisechakl el kmo, “Chelechang e ak melekoi er kemiu aikang me ko mo subii a klemerang el kmo; se el mosiou el kirel a ngii di el chad e kau a meral mesiou er a Dios er kau” (Mosiah 2:17).
A Jesus a mirrael lolisechakl er a ebangkelio er Ngii e meruul a ungil (mesa Rrellir 10:38). Ngii a ulemekungil er a resmecher. Ngii a ulekiis er a re mla mad. Ngokiu a Klisichel e Ngii a ulemekang er a retelael el mle songerenger el dimlak a kelir (mesa Mateus 14:14–21; Johanes 6:2–13). Uriul er a Okisel er a Kodall e Ngii a mirrous a kall el mo er a re Apostol er Ngii er a lorael merema er a kederang er a Debel a Galilee (mesa Johanes 21:12–13). E a kuk Beluu er a Merikel, e Ngii a ulemekungil er a resmecher e uledersta er a rengalek el omekngeltengat er tir (mesa 3 Nephi 17:7–9, 21).
A Apostol Jakobus a ulsisechakl er kid el kmo ng mekera se el blak el reng el mo mesiou er a rebebil a lomuchel lokiu omereng el saul er kid er a ikel bla lruul a Rubak el kired:
“Ngike el lomes er a cherrungel el llach er a iilmokl, e melemolem el ngar ngii, e diak di lorrenges mengoit, ng dirrek el ngara omeruul, ng kaikid el chad a ngeltengat er a urerel. …
“A meral klechelid me a diak a kngtil er medal a Dios me a Chedam a tiakid, Mo oldingel er a re diak a redemerir me a re mla melakl er a chelsel a ringel le ngar ngii, e mo mengikiid er ngii er a mekngit er a beluulechad” (Jakobus 1:25, 27).
A ta er a olchotel a kmo ke meral klikiid a sel chachisois el blak el reng el mo mesiou er a rebebil kirel Osobel. A oldingel e olsisechakl a mo uchul a deureng ngdiak di el ngerachel el kirel mekedmokl. Ke mesekau el odars a temem lolngeseu a tekoi er a skuul e dirrek el olngeseu er a remechebuul el ngara beluam. Ng uaisei el locha olngesonges a ududem el mo olngeseu er tirkel ngesonges, eng di ngurungulem mel betok er kau me luchul el sebechem lodars a betok (mesa Mosiah 4:24). Ke mesekau el semeriar el mesiou er a rengelekem e olecholt er tir a teletael er a omesiou el mo er a rebebil.
E se el omengodech, e ke mo metik er kau el semeriar el meruul a meklou el teletael er a omesiou el diak a medengei. Ak medengelterir a roltirakl er a Osobel el mla odars a meklou el ngeseu er a udoud e blak a rengrir el mesiou e diak a chad el medengei ng di Dios me a rengelkir a medengei. A Dios a medengei omesiungir e mo omekngeltengat er tir er tia el klengar , e Ngii a mo omekngeltengat er tir er se el diak a ulebengelel klengar el merael mei (mesa Mateus 6:1–4; 3 Nephi 13:1–4).
Me se el bla moltirakl er a llach el mo mesiou er a rebebil (mesa Mateus 22:39), e ke mla mesa ngeldechel a rengum el kirel a kldidai el reng. A Osobel a milsemechokl er a re Apostol er Ngii er a le kautitekangel el kmo ng techa er tir a kot el ngarbab. Ng millekoi:
“Ng diak a ta er kemiu el mastang: le ng di chimong a Mastang er kemiu, el ngii a Kristo.
“E ngike el ngii a kot el ngarbab er kemiu el rokiu a mo mesiungiu” (Mateus23:10–11).
A Osobel olsisechakl el kmo kede mekera dosiou er a rebebil. Ng mle cherrungel omesiungel, meng kired el mesuub el mo mesiou el uai Ngii—el dersta er a tal taem (mesa D&C 93:12–13). Ngokiu omesiou el dodars, e kid a sebeched el merael mo uai Ngii. Kede mo ngara nglunguuch loba rokir el rengud el mo oubeltikelreng er a recherreued el uai Ngii loubeltikelreng el mo er tir (mesa Mateus 5:43–44; Moroni 7:48). Seikid e a uriul eng mo sebeched el nguu a diak a ulebengelel klengar lobengkel Ngii me a Demad er a Babeluades.
Ak yaksok el kmo ng sebeched el mo mui el mesiou se el doltirakl osischeklel me a okesiul Osobel.
© 2014 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, March 2014. Palauan. 10863 881
Osischeklel Tia el Klumech
A Elder M. Russell Ballard er a Chelechad er a Teruich me a terung el Apostol a mla mengelechel er kid el mo ngara nglunguuch el kirel a techall el mo mesiou: “Chelsel aikel nglunguchiu a le tutau er a bek el sils, molengit er a Chedam er a Babeluades me lomekrael er kemiu el mo mtebengar a techall el mo mesiou er a kmal di chimong er tirkal tokubets el Ngelekel. E moruul a urerem er se el sils … e mosiik er a kmong techang el bo mngeseuir” (“Bo el ngar ngii er a rengum el meruul,” Ensign malechub a Liahona, Nov. 2012, 31). Momdasu el siotai er tirka el molisechakl er tir el mo kudmeklii a moktek el mo ngara nglunguuch er a bek el tutau el kirel a techall el mo mesiou e bo losiik er tir er seikid el sils.