Poraus seni Fefin Chon Amwa, March 2014
Ewe Misin me Nang usun Jises Kraist: Saramen ewe Fonufan
Iotek me kaeo ei puk me kukkuta met kewe kopwe aea. Epwe ifa usun weweochu manauen me misin an ewe Samon epwe anapeno om nuku non I me efeiochu ekkena ir ka mamasa me churi? Ren pwan ekkis poraus, kopwe feino won www.reliefsociety.lds.org.
Nuku, Famini, Aninis
Ren ach sia weweiti pwe Jises Kraist i ewe Saramen ewe Fonufan, kich sipwe anapano ach nuku non I me winiti saram ngeni ekkewe ekkoch. Kraist a pwarata usun wisan pwe ewe saram mi ennet mi asarama iteitan mwan [me fefin] a feito non ewe fonufan (D&C 93:2) me A tingor pwe kich sipwe “atinata [An] saram pwe epwe asarama fonufan” (3 Nifai 18:24).
Nouch soufos ra pwan pwarata usun ewe Saramen Kraist. Preseten Henry B. Eyring, Ewe Aewin Chon Annis non ewe Aewin Presetensi, a era: “Iteitan fansoun ka fini om kopwe achocho ne manau usun ewe Chon Amanau, epwe fisita reom pochokunen om kapasen pwarata. En kopwe pwisin feito non eu fansoun ne sinei pwe I ewe Saramen ewe Fonufan. … Kopwe asaramano ngeni ekkoch ewe Saramen Kraist non manauom.”1
Elter Quentin L. Cook seni ewe Mwichen Engon me Ruemon Aposel a era usun ach saram ngeni ewe fonufan: “Kich sipwe atutumunu ach famini me sipwe nonnom fengenni ren aramasen tupwon ne fori met kewe mettoch ne tumunu ewe saram, nukunuk, me mettoch murinno non ach kewe neni.”2
Seni ekkewe Pukfel
Seni Ach Uruo
Ekkewe fefin chon ach Mwichefen ra sopweno ne atinata saramer ikenai.
Won ewe wanik asam won eu imw mi nangatameta non Hong Kong, China, mi wor emon fefin mi weires ne mokutukut inisin—i chok chon ewe Mwichefen me non an famini—ra forata nenian pwe ekkoch wasona chon churi i repwe mefi memefian ewe Ngun mi Fel. Mi wor ren noun pukfel, ekkewe puken Fin Anisi, me an we puken konfel. A feino ngeni tempel ne fori ekkewe angangen pin fan itan noun chon newo.3
Non Brazil mi wor emon in a tumunu noun kewe semirit non ewe saramen ewe kapas allim. Konen Kinter a kokkonu non imwan we, me sasing seni ewe Liahona usun ekkewe tempel, soufosun Kot, me ewe Samon mi pacheta won ekkewe etip. Ir me punuan we ra angang weires pwe repwe ririfengen non tempel pwe nour kewe semirit repwe nounou non ewe pwon. An sou ikiotek pwe ewe Samon epwe anisi i ne amarita noun kewe semirit non ewe saram, ennet me pochokunen ewe kapas allim.4
© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun Visiting Teaching Message, March 2014. Chuukese. 10863 901