Poraus seni ewe Aewin Presetensi, April 2014
Efoch Angko A Pochokun Me Monnota
Ese watte fansoun a no, a wor ai tufich ua tongeni sai won efoch sipw unukkun ewe oressetin mi ningoch non Alaska, USA. Nupwen ewe sou-emwen a ammonata ren nonnomun ewe sipw ren ewe pwin non eu noomw mi touau, a tumunu ne katonochu ewe neni me nikinikinin, mwokutokuten ekkewe no, ewe anonnonun ewe set, me ewe ukkukun touau seni ekkewe mettoch mi afeiengau. Nupwen a menemenoch, a minatiw ewe angko pwe ewe sipw epwe tumunoch me angko non pochokun, a mut ngeni ekkewe chon sai eu tufich ne ingeiti ewe ningoch mi mwaramwaren fofforun Kot kewe.
Nupwen ua nengeni ekkewe oresset, ua poputa ne esinna ewe sipw a rikino ekkis me ekkis ren ewe kukkunun asepwan me ewe fetanin set mi anonnon. Ina mo, ewe sipw a nonnom ren pochokun non eu neni mi foukukumos anapanap seni taman ewe saanen angko me ewe pochokunen ewe angko.
Ewe souemwen ese isoni ewe angko won ewe sipw pwe epwe chok minatiw nupwen eu monumon a feito. Apw, a angkoni pwe monnotan tumun pwe epwe tumunu ewe sipw pwe esap mokut ngeni ekkewe set mi afeingau ika epwe pasaano ngeni ewe pii nupwen ekkewe chon sai me ekkewe ra wawa ewe sipw ra mefi kinamwe.
Nupwen ua ekipwichi ei otun, ua esinna ika esap ei eu tufich ren eu tutunap, use mo wawa efoch sepenin.
Pwata mi Namwot Ngenikich Angko
Ewe wisen efoch angko pwe epwe annomu me tumunu ewe sipw non eu neni mi och ika aninnis ne nemeni ewe sipw nupwen ewe ran mi ngau Ina mo, ne apwonueta ekkei popun mi auchea, efoch angko chok ese naf. A namwot ewe angko epwe pochokun me wenechar, me sia tongeni aeaochu non ewe fansoun mi pung me ewe neni mi pung.
A namwot aramas me famini epwe wor nour kewe angko pwan.
Osukosuk a tongeni feito ussun chok eu monumon mi nap ne enikicheno seni ewe an me afeingauakich ngeni ekkewe fau. Nge fan ekkoch nonnomuch mi efeingau nupwen meinisin mi nikinikin tumunoch—ekkewe asepwan mi pwetete me ekkewe set mi sonosonoch. Wesewesen, nonnomuch mi tongeni efeingaw mi men watte nupwen sa pasaano me ach mokut mi men kukkun sise tongeni esinna.
Ewe Kapas Annim mi Ach Ankgo
A namwot ekkewe angko repwe pochokun, wenechar, me monnata fansoun mi namwot. Me soposopun, a namwot ir repwe apach ngeni eu nongonong mi tongeni uwei ewe watten ekkewe pochokun mi u ngeni.
Pungun, ewe kapas annimen Jises Kraist a efoch angko ina ussun. A ammonata seni ewe Chon Fofforun mettoch meinisin ren eu popun mi fen me anapanap pwe epwe awora tumunoch me emwen ngeni Noun kewe.
Met wewen ewe kapas annim, mwirin mettoch meinisin, me nukun ewe kokkotun Kot ne angasa Noun kewe me uweir sefan ngeni?
Kich sia sinei pwe mokutokutun mettoch meinisin repwe apasaano, a namwot sipwe fokkun ammochu nouch kewe angko won ewe nongonong mi fau an ennetin kapas annim. Resap ekkis etiu won ekkewe piin namanamtekia ika keran attapa ewe mesen ach kewe nuku.
Ei maram a wor ach tufich ne rong seni noun Kot kewe chon angang non eu mwichenapen mwichefen. Ar kewe kapas fiti pukfel me ekkewe memmefen ewe Ngunu Pin, ra awora eu nongonongen fau mi pochokun an ekkewe nongonong esemuch me ekkewe annuk minne sa tongeni apacha nouch kewe angko won pwe sipwe sopweino ne pochokun me tumunoch nein ekkewe osukosuk me ekkewe sossotun manau.
Ewe soufosen nom Ilaman a afanafana, pwe won ewe fau an nouch Chon Angasano, ion ewe Kraist, Ewe Noun Kot, oupwe aueta ami nongonong pwe; nupwen ewe setan a tinano an asepwan mi pochokun, ennet, an minen feiengauen monumon, ennet, meinisin an sossot o monumon chapur ra fiu ngonuk, ekkewe ir meinisin esap mo wor ar pochokun wom ne oturokutiw non ewe pwangen riaffou me metek esemuch, pokiten ewe fau ka aueta won, minne ewe ennetin nongonong, eu nongonong ika pwe aramas ra aueta won resap tongeni turutiw. (Helaman 5:12).
Ewe Auchean Ekkewe Angko mi Pochokun Nonnomur
Manau a wor an napanap ne sotuni nouch kewe angko me sotuni kich ne pasaano. Ina mo, ika nouch kewe angko mi pung ar iseta won ewe fau an nouch Chon Amanau, repwe kamochuno— ese nifinifin pochokunen ewe asepwan, pochokunen ekkewe mwokutun set, are ewe taman ekkewe no.
Iwe, efoch sipw ese for pwe epwe nonnom chok non eu nenien sipw nge epwe weita ewe angko me feinno won ewe setin manau. Nge ina eu tuttunapen pwan eu fansoun.
Iei, ua angei kinamwe ne sinei pwe ewe angkon ewe kapas annim me ewe fau an nouch Chon Angasano epwe apochokuna me awenechara kich.
Ei sokkun angko epwe akouno kich seni ach pasaano ngeni efeiengau me osukosuk. Epwe awora ngeni kich ewe tufich mi nap ne pwapwaiti ekkewe ningoch esor nonnon an ewe napanapen manau ekisiwin iteitan.
Manau a ningoch me mi niwinoch ne manaueni. Asepwan, monumon, me ekkewe no repwe sotunikich ne apasaano ngeni ekkewe feiengau sia kuna are sise tongeni kuna, nge ewe porausen ewe kapas annim me an manaman mi fen epwe annomu kich won ewe aan ngeni an Semach Won Ngang nenien sipw mi tumunoch.
Iwe, sisap chok ausening ngeni ekkewe afanafanen ewe mwichanapen mwicehfen non April nge sipwe pwan anganga ar kewe poraus ussun chok efoch angko mi pochokun nonnomun non manauach.
Amwo Kot epwe efeiochu me emwenikich non ei angang mi auchea me namwot!
© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, April 2014. Chuukese. 10864 901
Afanafan seni Ei Poraus
Oupwe ekipwichi ne foffos ussun auchean angko non ewe mokutokutun an Liai we famini ra feinno ngeni ewe fonu mi pwon. (nengeni 1 Nifai 18) Kopwe mochen nengeni 1 Nifai 18:11–15, eu fansoun nupwen Nifai a fotek, ewe Liahona a kouno ne angangoch, me ewe siip a emweni seni ekkewe notar mi feiengau. Met ekkewe ponu sia kuna nupwen sise apach ngeni ewe kapas annim? Kopwe pwan mochen nengeni 1 Nifai 18:21–22 me poraus usun ifa ussun sipwe tongeni kuna kinamwe seni ach kunnu ngeni ewe Chon Amanau.