Mensahe sa Visiting Teaching, Abril 2014
Ang Diosnon nga Misyon ni Jesucristo: Manluluwas kag Manunubos
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
“Isa sang pinakaimportante nga titulo ni Jesucristo amo ang Manunubos,” siling ni Elder D. Todd Christofferson sang Korum sang Napulo’g Duha ka mga Apostoles. “Ang Pagtubos nagakahulugan sang pagbayad sang obligasyon ukon sang utang. Ang Pagtubos nagakahulugan man sang pagsalbar ukon paghilway pareho sang pagbayad. … Ang tagsa sining mga kahulugan nagapanugyan sang nagkalainlain nga mga aspeto sang dako nga Pagtubos nga ginhuman ni Jesucristo paagi sa Iya Pagpasag-uli ukon Atonement, nga nagalakip, sa mga tinaga sang diksyonaryo, ‘sang paghilway gikan sa sala kag sa mga silot sini, subong sang sakripisyo nga ginahimo para sa makasasala.”’1
Si Linda K. Burton, Relief Society general president, nagsiling: “Ang Amay nga Langitnon … nagpadala sang Iya Bugtong kag perpekto nga Anak agud mag-antos para sa aton mga sala, aton mga kasakit, kag tanan nga daw indi patas sa aton kaugalingon nga indibidwal nga mga kabuhi.
“… Isa ka babayi nga nag-eksperiyensya sang tinuig nga pagtilaw kag kasubo nagsiling samtang nagahibi sia, ‘Akon narealisar nga daw pareho ako sang daan nga 20-dolyares—ukot, gision, mahigko, ginpasipakpakan, kag namantsahan. Apang … ang akon balor sa gihapon bilog nga 20 dolyares.’ Ini nga babayi nakahibalo nga sia … may tuman nga bili sa [Dios] agud ipadala ang Iya Anak agud magpasag-uli para sa iya mismo. Ang tagsa ka sister sa Simbahan dapat makahibalo sang nahibaloan sining babayi.”2
Gikan sa Balaan nga mga Kasulatan
Gikan sa Aton Kasaysayan
Ang Bag-o nga Katipan [New Testament] nagalakip sang mga sugilanon sang mga babayi nga nagpakita sang pagtuo kay Jesucristo, nagtuon kag nagpangabuhi sang Iya mga pinanudlo, kag nagsaksi sang Iya pag-alagad, mga milagro kag kahalangdon.
Si Jesus nagsiling sa babayi sa bubon:
“Ang bisan sin-o nga nagainom sang tubig nga akon ihatag sa iya indi na gid pag-uhawon; ang tubig nga akon ihatag sa iya mangin-tuburan sa sulod niya nga nagaibwal sa kabuhi nga wala’y katapusan.
“Ang babayi nagsiling sa iya, Ginuo, hatagi ako sining tubig, agud nga indi ako pag-uhawon. …
“Nakahibalo ako nga ang Mesias nagakari, … : kon sia mag-abot, magapahayag sia sa aton sang tanan nga butang.
“Si Jesus nagsiling sa iya, Ako nga nagapakighambal sa imo amo sia.”
Iya “ginbayaan ang iya tibud” kag nagpaambit sang panaksihon parte sa Iya sa siyudad. (Tan-awa sa Juan 4:6–30.)
© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, April 2014. Hiligaynon. 10863 861