Mensahe sang Unang Panguluhan, Abril 2014
Isa ka Mabakod nga Pagpahamtang sang Angkla
Sang nagligad lang nakaangkon ako sing oportunidad nga maglayag sa isa ka dako nga bapor sa matahom nga baybayon sang Alaska, USA. Samtang ang kapitan nagahanda sa pagtinir sang bapor asta mag-aga sa malayo kag matinlo nga baybayon, ma-id-id niya nga gintun-an ang lokasyon kag mga sirkumstansya pareho sang natakna nga paghunas kag pagtaub, kadalumon sang tubig kag distansya gikan sa peligroso nga mga sablag. Sang kombinsido na, ginhulog niya ang angkla agud ang bapor magpabilin nga hilway kag nakaangkla sing maayo, nga naghatag sa mga pasahero sang oportunidad nga magdayaw sa katahum sang mga gintuga sang Dios.
Sang nagalantaw ako sa baybayon, akon narealisar nga ang bapor ginaanod-anod nga halos indi madiparahan sa pinakagamay nga huyop sang hangin kag hulag sang tubig. Apang, ang bapor nagtinir lang gid sa amo nga lugar suno sa kalabaon sang linya sang angkla kag sa kusog sang angkla.
Wala ginatago sang kapitan ang angkla sa bapor, nga handa lamang nga ipapanaog kon may mag-abot nga bagyo. Indi, iya gin-angkla ang bapor bilang pagpaiway kag pagprotekta sa bapor sa pag-idog sa peligroso nga katubigan ukon amat-amat nga pagkaanod pakadto sa baybayon samtang hilway ang pamatyagan sang mga pasahero kag mga tripulante.
Sang ginahunahuna ko ini nga sitwasyon, nagsulod sa akon pamensaron nga isa ini ka kahigayunan para sa isa ka paanggid (parable) kay kon indi, pareho lang nga nagasiling ako nga wala gid ako nakapalupad sang eroplano.
Ngaa Kinahanglan Naton sang mga Angkla
Ang gamit sang isa ka angkla amo ang tipigan ang bapor nga hilway sa katalagman kag protektado sa napili nga lokasyon ukon ang buligan nga makontrol ang bapor sa tion sang malain nga tiempo. Apang, para mahimo ining importante nga mga katuyuan, indi igo ang basta angkla lang. Ang angkla kinahanglan nga mapag-on, masaligan, kag ginagamit sing maayo sa husto nga tion kag lugar.
Ang mga indibidwal kag mga pamilya nagakinahanglan man sang mga angkla.
Ang mga pagtilaw sarang mag-abot bilang dako nga unos nga magahuyop sa aton sa sala nga direksyon kag nagapahog nga maghaboy sa aton sa dalagko nga mga bato. Apang kon kaisa yara man kita sa peligro kon ang tanan-tanan daw maayo lang—ang hangin mahinay kag ang tubig makanay. Sa pagkamatuod, sarang kita mangin yara sa pinakadako nga peligro kon kita ginaanod-anod kag ang pag-idog tuman ka gamay nga haloson naton mabatyagan ini.
Ang Ebanghelyo Ang Aton Angkla
Ang mga angkla kinahanglan mangin mapag-on, mabakod, kag mentenado agud magamit kon kinahanglanon. Dugang pa, ang mga ini kinahanglan iangot sa isa ka pundasyon nga makasarang sang kabug-at sang nagkalain-lain nga mga puwersa.
Siyempre, ang ebanghelyo ni Jesucristo ang amo nga angkla. Ginhanda ini sang Tagtuga sang kalibutan para sa isa ka diosnon nga katuyuan kag gindesinyo agud maghatag sang kahilwayan kag giya sa Iya mga kabataan.
Sa pagkamatuod, ano bala ang ebanghelyo luwas sa plano sang Dios nga tuboson ang Iya mga kabataan kag dalhon sila pabalik sa Iya presensya?
Sa paghibalo nga duna sa tanan nga butang nga maanod, kinahanglan naton ipahamtang sing malig-on ang aton mga angkla sa pundasyon sang kamatuoran sang ebanghelyo. Indi ang mga ini dapat basta lang ihulog sa mga balas sang bugal ukon halos lang nagatandog sing manabaw sa aton mga pagtuo.
Ini nga bulan may oportunidad kita nga makapamati sa mga alagad sang Dios sa isa ka general conference sang Simbahan. Ang ila mga pulong, upod ang balaan nga mga kasulatan kag mga pagpabatyag sang Espiritu, nagahatag sang mabakod kag malig-on nga pundasyon sang wala’y katapusan nga mga kaayuhan kag mga prinsipyo sa diin sarang naton iangot ang aton mga angkla agud makapabilin kita nga malig-on kag mabakod sa tunga sang mga paghimud-os kag mga pagtilaw sang kabuhi.
Ang dumaan nga propetang si Helaman nagtudlo, “Sa bato sang aton Manunubos, nga amo si Cristo, ang Anak sang Dios, nga kamo kinahanglan gid nga magpasad sang inyo sadsaran; agud kon ang yawa magapadala sang iya mamadlos nga mga hangin, huo, sang iya mga baslay sa buhawi, huo, kon ang tanan niya nga bato nga hielo kag ang iya mabaskog nga dalimuos magatupa sa inyo, mangin wala ini sing gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amo ang isa ka pat-od nga sadsaran, isa ka sadsaran nga kon diin ang mga tawo magapasad indi sila mahulog” (Helaman 5:12).
Ang Importansya sang Malig-on nga Pagpahamtang sang mga Angkla
Ang kabuhi may paagi sa pagtilaw sang aton mga angkla kag pagsulay sa aton nga magpaanod. Apang, kon ang aton mga angkla nahamtang sing insakto sa bato sang aton Manunubos, makahawid ini—bisan ano pa nga puwersa sang hangin, kakusog sang tubig, ukon kataas sang mga balod.
Siyempre, ang isa ka bapor wala gindesinyo agud magpundo lamang sa dungkaan kundi agud ipasaka ang angkla kag maglayag sa mga kadagatan sang kabuhi. Apang ina isa ka paanggid para sa lain naman nga tion.
Sa karon, nalipay ako sa pagkahibalo nga ang angkla sang ebanghelyo kag ang bato sang aton Manunubos magatipig sa aton nga malig-on kag mabakod.
Ang subong nga angkla magatipig sa aton gikan sa pagkaanod padulong sa peligro kag kalalat-an. Ini magatugot sa aton sing manami nga oportunidad nga malipay sa di-matupungan nga mga katahum sang padayon nga nagaliwat-liwat kag makatalandog nga mga eksena sang kabuhi.
Ang kabuhi matahum kag makalilipay. Ang hangin, unos, kag nagaluntad nga mga puwersa mahimo magsulay sa aton nga maanod padulong sa mga peligro nga makita man ukon indi, apang ang mensahe sang ebanghelyo kag iya sini diosnon nga gahum magatipig sa aton sa aton banas pabalik sa hilway nga dungkaan sang aton Amay nga Langitnon.
Gani, indi lamang kita magpamatisa mga pamulong-pulong sang Abril nga general conference kundi idapatman ang ila mga mensahe bilang angkla nga nahamtang sing malig-on sa aton adlaw-adlaw nga mga kabuhi.
Kabay nga bugayan kag giyahan kita sang Dios sa sining daku kag importante nga buluhaton!
© 2014 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, April 2014. Hiligaynon. 10864 861
Pagtudlo gikan sa Sining Mensahe
Binagbinaga ang pagsugilanon parte sa importansya sang mga angkla sa konteksto sang pamilya ni Lehi nga naglayag padulong sa ginsaad nga duta (tan-awa sa 1 Nefi 18). Pwede ninyo itudlo ang 1 Nefi 18:11–15, isa ka panahon sang si Nefi gingapos, ang Liahona wala na naggana, kag ang sakayan-dagat ginahabyog sang mabaskog nga mga unos. Ano nga mga konsikwensya ang aton maatubang kon indi malig-on ang aton pag-angkla sa ebanghelyo? Pwede man ninyo itudlo ang 1 Nefi 18:21–22 kag hambalan kon paano kita makasalapo sang kahilwayan paagi sa pagdangop sa Manluluwas.