President a Odzi Kan Amandzɛɛbɔ, Obiradzi 2014
Erema Edwuma no Akɔ Do Ntsɛmtsɛm
Ana inyim dɛ nsanananmu Asɔr no nyaa mfe 98 ansaana orinya stake horow 100 a? Mbom nkyii mfe 30 enndu mpo na Asɔr no akyekyer ne stake horow 100 a otsĩa ebien dadaw. Na afei mfe awɔtwe ara pɛr ekyir no Asɔr no enya stake horow bɔbor 300. Ndɛ hɛn ahoɔdzen bɔbor stake horow 3,000.
Ebɛnadze ntsi na Asɔr ne nyinii yi rokɔ do ntsɛmtsɛm ara yi? Ana osiandɛ wonyim hɛn yie ntsi a? Ana osiandɛ yɛwɔ asɔr adan afɛɛfɛw ntsi a?
Ndzɛmba yinom hia, naaso siantsir a Asɔr no rinyin ndɛ nye dɛ Ewuradze kyerɛɛ dɛ dɛm na ɔbɛyɛ. Nkyerɛkyerɛ na Ahyɛmudzi mu no, Ɔkãa dɛ, “Hwɛ, merebɛyɛ edwuma ntsɛm wɔ ne ber mu.”1
Hɛn, dɛ yɛyɛ hɛn Ɔsor Egya Ne sunsum mu mba no, wɔasoma hɛn aba asaase do mber yi dɛ ama yeetum yɛdze hɛnho aahyɛ mu ama edwuma kɛse yi aakɔ do ntsɛmtsɛm.
Ma minyim no, Ewuradze nnkyerɛɛ dabiarada dɛ N’edwuma wɔyɛ no wɔ ɔnnkyebo asetsena yi mu nko. Mbom, N’edwuma no tsen fura mfesantsen. Megye dzi dɛ Ɔreyɛ N’edwuma ntsɛmtsɛm wɔ sunsum wiadze. Megye dzi so dɛ, Ewuradze nam No nkowaa a wɔwɔ hɔ no do, resiesie esunsum pii ma wɔagye asɛmpa no. Hɛn edwuma nye dɛ yɛbɔhwehwɛ hɛn ewufo na afei yɛakɔ temple na yɛayɛ ayɛdze krɔnkrɔn a ɔbɛma hɔn a wɔwɔ ntwamutam n’ekyir no enya akwanya kor noara a hɛn so yɛwɔ no bi.
President Brigham Young (1801–77) kãa dɛ, Nda a Odzi Ekyir Ɔhotseweenyi mapã biara a ɔwɔ sunsum wiadze no nnyi adagyir. “Ebɛnadze na wɔreyɛ no wɔ hɔ?” Wɔrekã asɛmpa no, rekã no aber nyina, na worisiesie kwan no ama hɛn ma yɛayɛ hɛn temple horow ne nsisii ho edwuma wɔ ha na beebiara no ntsɛmtsɛm.”2
Afei, ebusua abakɔsɛm ne yɛ nnyɛ mberɛw. Hom a hom fi Scandinavia no, menye hom kyɛ hom abagura. Mfatoho, me Swedfo ebusua santsen no, me nanabanyin ne dzin dze Nels Monson; n’egya ne ndzin nnyɛ Monson koraa, mbom ɔyɛ Mons Okeson. Mons n’egya ne dzin dze Oke Pederson, na ɔno so n’egya ne dzin dze Peter Monson— wɔasan abɛyɛ Monson bio.
Ewuradze enyi da kwan dɛ emi na ɔwo yɛbɛyɛ hɛn ebusua abakɔsɛm edwuma no yie. Modwen ho dɛ sɛ yɛbɛyɛ hɛn edwuma yie a, dza otwar dɛ yedzi kan yɛyɛ nye dɛ yebenya hɛn Ɔsor Egya no sunsum ma ɔnye hɛn atsena. Sɛ yɛbɔ bra tsenenee dɛ mbrɛ yenyim dɛ ɔwɔ dɛ yɛbɔ no a, Obobue kwan no ma yenya nhyira ne mãhyɛ no a yɛhwehwɛ no enyiberdo na enyimia mu no.
Yɛbɛyɛ mfomdo, naaso hɛn mu biara runntum nwea wɔ ebusua abakɔsɛm edwuma mu a, oenndzi kan annyɛ abaɛfor. Dɛm ntsi, otwar dɛ yɛdze hɛnho nyina hyɛ edwuma yi mu, na otwar dɛ yɛyɛ ahosiesie dɛ yɛwɔ koko tsentsen bi fow. Edwuma yi nnyɛ mberɛw, naaso Ewuradze dze ato wo do, na Ɔdze ato mo do.
Ber a itsen do yɛ ebusua abakɔsɛm edwuma no, ibohu dɛ ibehyia akwansiwdze horow, ma ase woho dɛ, “Biribiara nnyi hɔ bio a mubotum ayɛ.” Sɛ ikodu dɛm gyinabew no a, kɔ wo ntwɛr enyim na bisa Ewuradze ma ombue kwan no, na Obobue kwan no ama wo. Megye dase dɛ iyi yɛ nokwar.
Ɔsor Egya dɔ Ne mba a wɔwɔ sunsum wiadze tse dɛ mbrɛ Osi dɔ emi na ɔwo no. Ɔfa no hɛn ewufo nkwagye ho edwuma no, Nkɔnhyɛnyi Joseph Smith kãa dɛ, “Na afei ber a Nyankopɔn No botae etsitsir rehyɛ mã ntsɛmtsɛm no, na ndzɛmba a Nkɔnhyɛfo no kãa ho nsɛm no rehyɛ mã no, ber a wɔakyekyer Nyankopɔn n’ahenman wɔ asaase do, na wɔdze tsetseberdo nhyehyɛɛ asan ananmu no, Ewuradze ada hɛn asɛdze na ndzinoa yi edzi akyerɛ hɛn.”3
Ɔfa no hɛn ewuakɔr a woetwa mu kɔ a woennya asɛmpa no ho nyimdzee no, President Joseph F. Smith (1838–1918) paa mu kãa dɛ, “Ɔnam hɛn mbɔdzembɔ a yɛbɔ ma hɔn no do no, hɔn ndaduamu nkɔnsɔnkɔnsɔn no bɛtsetsew efi hɔnho, na sum a woetwa hɔnho ehyia no bɛpa, ma kan ahyerɛn hɔn do na wɔbɛtse no wɔ sunsum wiadze hɔ, edwuma a hɔn mba ayɛ ama hɔn wɔ ha, na wɔnye hom bedzi dɛw wɔ hom asedze yinom ne nyɛe mu.”4
Hɛn Ɔsor Egya No sunsum mu mba ɔpepe ɔpepe wɔ hɔ a wɔanntse Christ ne dzin dabiarada ansaana woruwu na wɔrokɔ sunsum wiadze. Naaso sesie dze wɔakyerɛ hɔn asɛmpa no ma wɔrotweɔn da no a emi nye ɔwo bɛyɛ nhwehwɛmu a ohia dze ebuei kwan no ama yeetum akɔ Ewuradze fie na yɛakɛyɛ edwuma ama hɔn a, hɔnara wonnkotum ayɛ.
Mo nuanom na nkyerɛmbaa, megye dase dɛ Ewuradze behyira hɛn ber a yɛgye tafɛrbanyinmbɔmu yi to mu na yɛyɛ.
Erekyerɛkyerɛ efi Amandzɛɛbɔ Yi Mu
Dwen w’ebusua abakɔsɛm ho asɛm bi a ipɛ no papaapa na enye hɔn a eserɛ hɔn no nkyɛ. Bia ibɛpɛ dɛ edze nsɛmbisa a ɔwɔ mbofra afã a ɔwɔ President a Odzi kan na n’Apamfo Amandzɛɛbɔ (krataafa 6) hɔ no hyɛ hɔn a eserɛ no nkuran ma wɔakyɛ hɔn ho nsɛm. Susu dɛ ibɛkenkan Nkyerɛkyerɛ na Ahyɛmudzi 128:15 na apɛnsapɛnsa yerigyina ayɛ temple ayɛdze ama hɛn ewuakɔr no ho hia a ohia mu.
© 2014 Intellectual Reserve, Inc. Wɔakora ho tumdzi nyina. USA na wotsintsimii. na wotsintsimii. Ngyirisi kasa ho mpendo: 6/14. Nkyereasee ho mpendo: 6/14. First Presidency Message, June 2014. Fante. 10866 502 ne nkyerɛasee