iTukutuku ni Mataveiliutaki Taumada, June 2014
Vakusakusataki ni Cakacaka
O sa bau kila beka ni sa yabaki 98 na Lotu ni bera ni qai 100 na kena iteki? Ia ni se bera ni 30 na yabaki i muri, sa tauyavutaka na Lotu na ikarua ni kena 100 na iteki. Ia ena loma ni walu na yabaki mai na gauna oya sa sivia na 300 na iteki ena Lotu Nikua eda sa sivia na 3,000 na iteki na keda kaukauwa.
Na cava na vuna sa vaka tiko kina oqo na totolo ni toso oqo? Baleta beka ni da sa kilai vakavinaka cake? Baleta beka ni tu na noda veivalenilotu totoka?
Era ka bibi na veika oqori, ia na vuna e tubu tiko kina na Lotu nikua baleta ni sa vakaraitaka oti na Turaga ni na vakakina. Ena Vunau kei na Veiyalayalati, e kaya kina o Koya, “Io, au na kitaka kusarawa na noqu cakacaka ena kena gauna.”1
O keda, me vaka ni da luvena vakayalo na Tamada Vakalomalagi, eda a talai mai ki vuravura ena gauna oqo me rawa ni da mai vakaitavi ena kena vakatotolotaki na cakacaka cecere oqo.
Se bera vakadua, mai na veika au kila, me vakaraitaka na Turaga, ni Nona cakacaka ena vakayacori walega ena bula oqo. Ia, na Nona cakacaka e taura na tawamudu taucoko. Au vakabauta ni sa vakusakusataka tiko o Koya na Nona cakacaka ena vuravura ni yalo. Au vakabauta talega, ni sa vakarautaka tiko na Turaga e vuqa na yalo me ra ciqoma na kosipeli, mai vei ira na Nona italai mai kea. Na noda cakacaka me da vakasaqarai ira na noda era sa mate ka da qai lako ki na valetabu ka cakava na veicakacaka vakalotu ka na kau yani kina vei ira ena taudaku ni ilati na madigi vata e tu vei keda.
O ira yadua na Yalododonu Edaidai vinaka ena vuravura ni yalo era sa ogaoga tiko, me vaka e tukuna o Peresitedi Brigham Young (1801–77). “Na cava era cakava tiko mai kea? Era vunau tiko, vunau tiko e veigauna kecega, ka vakarautaka tiko na sala vei keda me da vakusakusataka kina na noda cakacaka ena kena tara na veivaletabu eke kei na veivanua tale eso.”2
Ia, e sega ni rawarawa na cakacaka ni tuva kawa. Vei kemuni mai Scandinavia, au duavata kei kemuni ena nomuni rarawa. Me kena ivakaraitaki, ena noqu yasana mai Suwiteni, na yacai tukaqu o Nels Monson; na yacai tamana e sega sara ga kina na Monson ia na Mons Okeson. Na yacai tamai Mons o Oke Pederson, ka yacai tamana o Peter Monson—lesu tale ki na Monson.
E namaka vei iko kei au na Turaga me daru cakava vakavinaka na nodaru cakacaka ni tuvakawa. Au nanuma na imatai ni ka me caka kevaka me daru cakava vakavinaka na nodaru cakacaka sai koya me tiko vata kei kedaru na Yalona na Tamadaru Vakalomalagi. Ni daru sa bula ena kena dodonu duadua me vaka na ka e daru kila, daru na dolava na sala me vakataucokotaki kina na veivakalougatataki e daru dau vaqara vakatotolo ka vagumatua.
Eda na cala, ia e sega ni dua vei keda e rawa me kenadau ena cakacaka ni tuvakawa ke sega ni vulica taumada. O koya me da curumaki keda yani ki na cakacaka oqo, ka da vakarau me da kabata na kena ulunivanua. E sega ni cakacaka rawarawa oqo, ia sa vakataqara vei iko na Turaga, ka sa vakataqara talega vei au ko Koya.
Ni o cakava na cakacaka ni tuvakawa, o na sotava eso na tao ena kena sala, o na kaya vei iko, “Sa sega tale ni dua na ka au rawa ni cakava.” Ni o yacova na vanua oqori, lolou sobu e durumu ka kerea vua na Turaga me dolava na sala, ena dolava vei iko na sala o Koya. Au vakadinadinataka ni dina.
Na Tamada Vakalomalagi e lomani ira na Luvena ena vuravura ni yalo me vaka ga na Nona lomani iko kei au. Ena vuku ni nodra vakabulai na noda era sa mate, e kaya kina na Parofita o Josefa Simici, “Ia oqo ni ra sa vakatotolotaki me vakacavari yani na inaki cecere eso ni Kalou, ka ra sa vakayacori tiko mai na veika era a tukuna na Parofita, ni sa tauyavutaki e vuravura na matanitu ni Kalou, ka sa vakalesui mai na kedra itutu makawa na veika eso, sa vakatakila mai vei keda na Turaga na itavi kei na galala dokai oqo.”3
Me baleti ira na tubuda era sa takali yani ka sega mada ni se kila na kosipeli, sa tukuna o Peresitedi Joseph F. Smith (1838–1918), “Mai na noda sasaga ena vukudra ena taluva kina mai vei ira na sinucodo era vesuki tu kina, ka na seyavu yani na butobuto e vakavolivoliti ira tu, me cilavi ira kina na rarama ka ra na rogoca ena vuravura ni yalo na cakacaka sa caka ena vukudra mai vei ira na luvedra eke, ka ra na reki vata kei iko ena kena qaravi na itavi oqori.”4
E milioni vakamilioni na luvena vakayalo na Tamada Vakalomalagi era sega mada ni se bau rogoca na yaca i Karisito ni bera ni ra mate yani ka lako ki na vuravura ni yalo. Ia oqo sa vakavulici vei ira na kosipeli ka ra sa waraka tiko na siga e daru na vakayacora kina na vakadidike e ganita me caramaki na sala me rawa kina ni da lako yani ki na vale ni Turaga ka vakayacora ena vukudra na cakacaka era sa sega ni rawa ni cakava o ira vakataki ira.
Kemuni na taciqu kei na ganequ, au vakadinadinataka ni na vakalougatataki keda na Turaga ni da ciqoma ka cakacakataka na bolebole oqo.
Veivakavulici mai na iTukutuku Oqo
Vakasamataka e dua na italanoa taleitaki mai na nomu ivolanikawa ka wasea na italanoa oqori kei ira o dau sikova. O na gadreva beka mo vakayagataka na taro ena nodra iwasewase na gone ni iTukutuku ni Mataveiliutaki Taumada (draunipepa 6) mo vakayaloqaqataki ira kina o sikova me ra wasea na kedra italanoa. Vakasamataka mo wilika na Vunau kei na Veiyalayalati 128:15 ka veivosakitaka na bibi ni kena qaravi na veicakacaka vakalotu ni valetabu ena vukudra na tubuda.
© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni First Presidency Message, June 2014. Fijian.10866 858