iVaqa ni Veisiko, June 2014

Na iLesilesi Vakalou i Jisu Karisito: Veiqaravi Vakalotu

Vulica ena masumasu na itukutuku oqo ka tovolea mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Oqo e dua na tiki ni ituvatuva ni iVaqa ni Veisiko ka matataki kina na iwalewale ni nona ilesilesi na iVakabula.

Ni da veiqaravi vakalotu vei ira na tani, eda sa na yaco me tisaipeli dina nei Jisu Karisito, o koya a vakotora na ivakaraitaki vei keda. E kaya o Peresitedi Thomas S. Monson: “Eda vakavolivoliti mai vei ira era vakaleqai tu. …Eda sa liga ni Turaga e vuravura, ka da sa vakaroti meda qaravi ira ka vukei ira na Luvena.¹

E vakavuvulitaka o Linda K. Burton, na peresitedi raraba ni iSoqosoqo ni Veivukei: “Ni da vakatovotovotaka, sa rawa vei keda yadua me da yaco me da vakataka na iVakabula vakalevu cake ni da qaravi ira na luveni Kalou. Me vukei keda meda veilomani vakavinaka cake, au vinakata meu vakatura e va na vosa meda nanuma tiko: “Taumada vakararai, qai veiqaravi.” Ni da vakayacora vakakina, eda sa rokova tiko na noda veiyalayalati, ia na noda veiqaravi, me vakataka na nei Peresitedi Monson, ena ivakadinadina ni noda bula vakatisaipeli.²

E rawa ni da dau masulaka e veimataka me da dau raica ka kila na madigi eso me da veiqaravi kina vei ira na tani “Ena tuberi iko na Tamada Vakalomalagi, ka ra vukei iko na agilosi,” e kaya o David L. Beck, peresitedi raraba ni cauravou. “Ena soli vei iko na kaukauwa mo vakalougatataka na bula ka vueta na yalo.”³

Mai na iVolanikalou

Maciu 20:25–28; 1 Nifai 11:27–28; 3 Nifai 28:18

Mai na Keda iTukutuku Makawa

Ena koniferedi raraba ni Okotova 1856, a kacivaka kina o Peresitedi Brigham Young (1801–77) ni ra se kosova tikoga mai na bucabuca na ivuvunilotu ena qiqidreti ia me veivuke na tamata kecega ena kena kumuni na iyaya me baleti ira ena gauna sara ga oqo. E vola kina o Lucy Meserve Smith ni ra “luvata na marama na nodra likueloma, sitokini, kei na veika kece e rawa ni ra solia, e kea, ena loma ni valecavu, ka kumuna yani ena loma ni qiqidreti.”

Ni ra sa tekivu yaco yani ki Salt Lake City na ivuvunilotu, qai vola vaqo o Lucy, “Au se bera ni bau marautaka mada e dua na cakacaka au sa cakava ena noqu bula, me basika kina na mataqali yalo ni duavata vakaoqo. Meu curu ga ki na dua na sitoa ka tukuna na lomaqu; kevaka e isulu, e vakarautaki ga mai ka sega ni saumi.”⁴

E tukuna vaqo o Peresitedi George Albert Smith (1870–1951) me baleta na veiqaravi vakalotu vei ira na tani: “Na noda marau tawamudu ena vakatautauvatataki ga kei na ivakarau eda soli keda kina ena nodra vukei na tani.”⁵

Vakasamataka Oqo

1. Na sala cava e rawa ni tuberi keda kina na masu, me da iyaya ni cakacaka ena liga ni Turaga?

2. Na sala cava e rawa ni vukei keda kina na veiqaravi vakalotu vei ira na tani, me da maroroya na noda veiyalayalati?

© 2014 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/14. Vakadonui me vakadewa: 6/14. Vakadewa ni Visiting Teaching Message, June 2014. Fijian.10866 858

iDusidusi

1. Thomas S. Monson, “Na Cava Au Sa Bau Cakava Vua E Dua Nikua?” Liaona, Nove. 2009, 86.

2. Linda K. Burton, “Taumada Vakararai, Qai Veiqaravi,” Liaona, Nove. 2012, 78, 80.

3. David L. Beck, “Na Nomu iTavi Tabu ni Veiqaravi,” Liaona, Me 2013, 56.

4. Lucy Mack Smith, ena Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 36–37.

5. George Albert Smith, ena Luvequ Yalewa ena Noqu Matanitu, 77.