Pweng sin Prestuhnsi Se Met, Jun 2014
Salkweack Orekma uh
Kuh kom akihlen lah Alu fohlohkyak se tuh sun yac 98 met liki oasr stek 100 kac? Tuhsruhk suhpuhs liki yac 30 tohkoh, Alu uh oakiyac stek 100 ahkluo la. Ac yac na alkosr tohkohyang puhs liki stek 300 luhn Alu uh. Mihsenge puhs liki stek fokoko 3,000 lasr.
Efuh kuh luhpan kapwack se pihsrpihsr? Ma ke srihpen etweyuck wo kuht? Ma ke srihpen oasr lohm alu wolacna lasr?
Ma inge yohk srihpac, tuhsruhk srihpac ma Alu uh kapwack mihsenge uh pa lah Leum El ahkkahlwemye lah ac kap. Ke Doctrine ac Covenants, El fahk lah el ac salkweack orekma Lal uh ke pacl la uh.1
Kuht, tuhlihk nguhn nuhtin Pahpah Lucng uh, suhpweyuckme nuh facluh ke pacl se inge tuh kuht in wi salkweack orekma wowo se inge.
Leum El soenna, ke etuh luhk uh, ahkkahlwemye lah orekma Lal ikolyuck nuh sin mwet moul uh. Sahyacna, orekma Lal uh sruokwacni ma pahtpaht. Nga luhlahlfongi muh El salkweack orekma Lal ke facluh luhn nguhn. Nga luhlahlfongi pac lah Leum, sin mwet kuhlwacnsap Lal we, ahkoo nguhn pucspucs in eis wosasuc. Orekma lasr uh pa in suk mwet misac lasr uh ac som nuh in tempuhl ac oruh akwuck muhtahl ma fah us nuh selos suc ahluhkwelah mwe lihsrlihsr se pacl wowo oacpacna oasr lasr uh.
Mwet Luhlahlfongi wo ke Lwen-sahflah nuh kwewa ke facluh luhn nguhn kahfofo, Prestuhn Brigham Young el fahk (1801–77). “Meac elos oruh we uh? Elos luti, luti pacl nuh kwewa, ac ahkolah inkacnek lasr in salkweack orekma lasr in muhsahi tempuhl uh yenuh ac kuhtwena acn sahyac.”2
Inge, orekma ke sramsram mahtuh luhn sucu uh tiac fihsracsr. Nuh suwos fin acn Scandinavia, nga akacsruhi ke kohs lowos an. Nuh ke mwe srihkasrak, ke lain in sucu Sweden luhk uh, inen pahpah mahtuh tuhmuhk ah pa Nels Monson; inen pahpah tuhmwacl ah tiac pa Monson tuhsruhk Mons Okeson. Inen pahpah tuhmwacl Mons ah pa Oke Pederson, ac inen pahpah tuhmwacl ah pa Peter Monson—sifilpac fohlohk ne ke Monson.
Leum El motko nga kom in oruh orekma ke sramsram mahtuh luhn sucu lasr uh in wo. Nga muh ma se met kuht enenuh in oruh kuht fin ac oruh orekma lasr uh in wo pa in oasr Nguhn luhn Pahpah Lucng yohrohsr. Ke kuht moul in nwacsnwacs oacna ke kuht etuh in moulkihn uh, El ac ikacslah inkacnek nuh ke ahkfalyeyacn mwe insewowo ma kuht suk ke inse pwacye ac oaru uh.
Kuht ac oruh ma tahfonglac uh, tuhsruhk wacngihn sesr kuh in etwaclah na pwacye orekma ke sramsram mahtuh luhn sucu kuht fin tiac sasuc nuh kac met. Pwacnwacng, kuht enenuh in eis kuhtyang nuh ke orekma se inge, ac kuht enenuh in ahkolah nuh ke kuhtuh iwacack uh. Tiac orekma fihsracsr se pa inge, tuhsruhk Leum El fihliyac nuh fom, ac El fihliyac nuh feik.
Ke kom suk orekma ke sramsram mahtuh luhn sucu uh, kom ac konwacack lah kom ac kosrweyucklac, ac kom ac fahk nuh sum sifacna, “Wacngihn ma sahyac nga kuh in oruh.” Ke kom ac sun pacl sacn, puhtati nuh ke intem ac siyuck sin Leum in ikacslah inkacnek an, ac El fah inkacslah inkacnek an nuh sum. Nga fahkwack lah ma se inge pwacye.
Pahpah Lucng El luhngse tuhlihk Nahtuhl ke facluh luhn nguhn oacna ke El luhngse nga ac kom uh. Nuh ke orekma in molwelah mwet misac lasr uh, Mwet Pahluh Joseph Smith el fahk, “Ac inge ke srihpac yohk luhn God uh salkweyuck nuh ke oreklac la, ac ma sruhmuhnyuck sin Mwet Pahluh uh ahkfalyeyuck, ke tohkohsrahi luhn God akwucki fin facluh, ac ma akwucki mahtuh fohlohkyak, Leum El ahkkahlwemye kahlwem nuh sesr orekma ac pacl wowo se inge.”3
Kaclos mwet mahtuh lasr ma misac tari ma wacngihn etuh la ke wosasuc, Prestuhn Joseph F. Smith (1838–1918) el fahk, “Ke kampare lasr kaclos uh sein ma kapraclos fah puhtatlac luhkwelos, ac lohsrlohsr raunwelosyak fah kahlmwelihk, kahlwem sac fah tohlohlosyak ac elos fah lohng ke orekma ma oreklac nuh selos sin tuhlihk nahtuhlos yenuh ke facluh luhn nguhn, ac fah wi kowos engan ke oruh lowos ke orekma inge.”4
Miliacn nuh ke miliacn ke tuhlihk nguhn nuhtin Pahpah tuhmasr Inkuhsrao suc soenna lohng ke inen Kraist met liki elos misac ac som nuh ke facluh luhn nguhn. Tuhsruhk inge lutiyuck elos ke wosasuc ac tuhpan ke lwen se nga kom fah oruh sukok enenweyuck in sackuhnlah inkacnek kuht in muh kuh in som nuh in lohm sin Leum ac oruh kaclos orekma ma elos sifacna tiac kuh in oruh.
Tamuhlwel ac tahmtahel wiyuck an, nga fahkwack lah Leum lac fah ahkinsewowoye kuht ke kuht eis ac topuk ke srihke se inge.
Luti ke Pweng Se Inge
Nuhnkuh ke soko sramsram kom luhngse yohk ke sramsram mahtuh luhn sucu lom an ac akacsruhi ke sramsram soko inge yurin mwet kom muhtwacta yohroh an. Kom ac kuh in luhngse orekmakihn kihsen siyuck ke ip se luhn tuhlihk an ke Pweng luhn Prestuhnsi Se Met (sra puk ahk 6) in ahkkweyaclos suc kom muhtwacta yohroh an in akacsruhi ke sramsram lalos an. Nuhnkuh in riti Doctrine and Covenants 128:15 ac sramsramkihn yohk srihpaciyacn oruh ke akwuck luhn tempuhl nuh sin mwet mahtuh lasr uh.
© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/14. Ahkkweyeyucklac ke lweng: 6/14. Lwenglah luhn First Presidency Message, June 2014. Kosraean. 10866 868