Klumech er a First Presidency, Ongelolem el buil 2014

Orreched er a Ureor

Mla er a President Thomas S. Monson

siasing/Llecheklel

President Thomas S. Monson

Kau ke metebengar tial mla moluut el Ikelesia el kmo ng mle oketiu me a eai a rekil ruchei er a bochul ngarngii a dart el blil a ongdibel er ngii? E ng di mekesai er a okedei el rak ruriul, e a Ikelesia a mla kutmokl a mong meng dart el blil a ongdibel.. E di mle eai el rak ruriul risei ea Ikelesia a mla mo er ngii a betok er a edei el dart el stake er ngii. Chelechal sils e kede mla mo er ngii a edei el telael el blil a ongdibel er kid.

Ngera uchul me tial ulekerulel a ikelesia a kmal merchereched el merael mo klou? Tia uaisei e le kid el merael a chised? A dang uaisei le kid el betok a klebokel a ikelesia er kid?

A ikang a meklou a ultutelel, eng di a uchul me a Ikelesia a meleketek er chelecha el sils a ngii el Rubak a uluchais el kmo ng mo uaisei. Ngara Doctrine and Covenants, e Ngii a dilu el kmo Ngii a mo orchedii a Urerel er se el belsechel.¹

Kid, el reng el ngelekel a Demad er a Babeluades, a mlo durokl el mei er a beluulechad er chelecha el taem me bol sebeched el ulsiseb er a orrechedel tial klou a bekul el ureor.

A Rubak a dirkak a tang, sel denguu er a klemedengei er ngak, me louchais el kmo a Urerel a kmal di ngar tial beluulechad. Ng bai, Urerel a omerk el mo er a diak a ulebengelel. A kuumerang el kmo Ngii a oreched er a Urerel er a belurir a rdeleb. Ak dirrek el oumerang el kmo a Rubak, lokiu a Mesiungel el ngar sei, a mengedmokl er a rebetok el delbengir a rechad el mo melai er a ebangkelio. A urered a mo osiik er a rebeldeked e mo er a templo e meruul a chedaol ureor el ngii a mo mesterir a re mla mo dibus a osisiiu el techall el dobang.

A rebek el mekedung el Uriul el-klebesei el Santo el ngara belurir a rdeleb a mechesang, ng millekoi a President Brigham Young (1801–77). “Ngera te meruul er sei? Te olsisechakl, olsisechakl er a bek el taem, e meledaes er a roled el mo orechedii a urered er a okedecherul a templo er tiang me a ngii di el basio.²

A, reksi er a telungalek a diak el beot el ureror. Kemiu el chad er a Scandinavia, ak medengelii a ringelel a ureriu. E le okesiu, a ngar a rsechek el Swedish, e a demak el rubak a oungakl er a Nels Monson; e a ngklel a demal a diak a tang mel Monson ng bai Mons Okeson. A demal a Mons a mle Oke Pederson, ea ngklel a demal a mle Peter Monson—le muut el mo ousbech er a ngakl el Monson.

A Rubak a mengerechir er kau me ngak el mo meruul a reksi er a telungalek er kid el mo ungil. A kumdasu ea kot el tekoi el kired el rulii alsekum me kede mo meruul a urered el mo ungil a mo nguu a Chedaol Reng er a Demad er a Babeluades el mo obengked. Sel de kiei el kedung el oltirakl a ikel dodengei, e Ngii a mo mekengii a rolel a klengeltengat el diak el bo el mekimd e kid a mo semeriar el osiik.

Ke de mo remuul a cheleuid, e ng di ng diak a ta er kid el sebechel mo semmong er a reksi er a telungalek a lak a osisechakl el ma kot. Me a le uaisei, eng kired el soiseb er tial ureor, e kired el mo kldmokl er a bebil er a ringelel tial omerael. Tiang a diak a el beot el ureor, e ng di a Rubak a mla nguu el meskau, e mla nguu el meskak.

Sel mo ureor el kirel tial reksi er a telungalek, e ke mo metik er kau el mo obangel a olibesongel el ngara rolem, me ke mo di kau el melekoi el kmo, “Ng dikea ngodech el sebechek el rulii.” Sel obetik er kau el ngar tiak teletael, e bo moutubaruach e molengit er a Rubak me bol bekengii a rael, e Ngii a mo mekengii a rolem. A kuuchais el kmo tiang a klemerang.

A Chedam er a Babeluades a betik a rengul er a rengelekel el ngara belurir a redeleb el kmal di ua beltkil a rengul leko er kau me ngak. Kirel tial ureor el olsobel er a re mla mad el chedad, e a Profet Joseph Smith a millekoi el kmo, “Me chelechang e tial klou el moktek er a Dios lorreched mel bol mekedmokl, me a tekoi el mildung lokiu a re Profet a mocha tmaut, me a rengedel a Dios bochal meteketek er a beluulechad, me a lultirakl a rechuodel mla moluut, a Rubak a mla ochotii el mei er kid tial ngerachel me a techall.”³

A kuk kirir tirkel rebeldeked el mla merael el dimlak lodengelii a ebangkelio, a President Joseph F. Smith (1838–1918) a uluchais, “Ngokiu a urered el kirir e a bambatel el llechotel er ngii a mo mengubet er tir, e a ilkolk el iliuekl er tir a mo nguemed, me a llomes a mo omekellomes er tir e tir a mo rongesii er a belurir a redeleb a ureor el ngii a mla meruul el kirir el milkedmokl er a rengelekir el ngar tiang, me te mo outkeu el obengkem er a ikal moruul el ngerachel.”⁴

Te ngarngii a re milion me lmuut el betok er a milion el ngalek el reng er a Chedam er a Babeluades el dimlak a tang el rengesii a ngklel a Kristo ruchei er a lemad e lorael mo er a belurir a redeleb. E ng di chelechang e te mla mosisechakl er a ebangkelio me te mengiil er sel sils el kau me ngak a mo osiik el mo dmedesii a rael me bol sebeched el mo er a blil a Rubak e remuul a ureor el kirir el tir a diak el sebechir el di tir el remuul.

Rodam me a rodos, a kuuchais el kmo a Rubak a mo omekngeltengat er kid sel de kengei e douedikel el kirel tial tekoi.

Osischeklel Tia el Klumech

Bo momdasu a ikel soam el chais el ngara reksi er a telungalek er kau e bo mouchais el mo er tirke el moldingel er tir. Ng locha mo soam el ousbech a ker el ngar sel blingelir a rengalek er a Klumech er a First Presidency (ellolem el llel a babier) el mo mengesuseu er tirke el moldingel er tir el mo ouchais a kuk cheldechederir. Bo momdasu a menguiu er a Doctrine and Covenants 128:15 e msodii sel klou a ultutelel er a ureor er a templo el kirir a rebeldeked.