Mensahe sa Visiting Teaching, Hulyo 2014
Ang Langitnon nga Misyon ni Jesucristo: Mananabang
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
Si Jesucristo amo ang aton Mananabang sa Amay. Ang tinaga nga mananabang naghalin sa Latin nga pulong nga nagakahulugan “isa nga nagaampo sa isa pa gid.”1 Ang Manluluwas nagapakitluoy para sa aton, nga ginagamit ang pag-intiendi, hustisya, kag kaluoy. Ang paghibalo sini makapuno sa aton sang pagpalangga kag kapasalamatan para sa Iya Pagpasag-uli.
“Magpamati kay [Jesucristo] nga amo ang aton mananabang sa Amay, nga nagapakitluoy para sa inyo sa iya atubangan—
“Nga nagasiling: Amay, tamda ang pag-antus kag kamatayon niya nga wala sing nahimo nga sala, nga sa iya ikaw tuman nga nahamuot; tamda ang dugo sang imo Anak nga ginpaagay, ang dugo niya nga imo ginsakripisyo agud nga ikaw mahimaya;
“Gani, Amay, kaluoyi ining akon mga kauturan nga nagapati sa akon ngalan, agud nga magakari sila sa akon kag makaangkon sang kabuhi nga wala’y katapusan” (D&C 45:3–5).
Nahanungod kay Cristo nga aton Mananabang, si Elder D. Todd Christofferson sang Korum sang Napulo’g Duha ka mga Apostoles nagsiling: “Daku kaayo ang kahulugan sa akon, nga ako sa bisan ano nga tion kag bisan ano nga kahimtangan makapalapit paagi sa pangamuyo sa trono sang kaluoy, nga ang akon Amay nga Langitnon mamati sa akon ginapangayo, nga ang akon Mananabang, sia nga wala sing may nahimo nga sala, nga ang iya dugo ginpaagay, magapangapin sang akon kawsa.”2
Gikan sa Balaan nga mga Kasulatan
Mosias 15:8–9; Moroni 7:28; Doctrine and Covenants 29:5; 110:4
Gikan sa Aton Kasaysayan
Sa kabug-osan sang kasaysayan sang Simbahan sang Ginuo, ang babayi nga mga disipulo ni Jesucristo nagasunod sa Iya ehemplo. Si Ester isa ka matutum kag maisog nga mananabang. Ang iya pakaisa nga si Mordecai naghatag sa iya sang ordinansa sang hari nga ang mga Judio pagapatyon, kag ginsugo niya sia nga “magpangabay sa atubangan [sang hari] para sa iya katawohan.” Dugang niya: “Kag sin-o bala ang nakahibalo nga ayhan nag-abot ka sa ginharian sa tion nga subong sini?” (Ester 4:8,14).
Wala sapayan sang peligro nga mangin mananabang sang iya katawohan, si Ester nagpasugot: “Niyan, magakadto ako sa pagsulod sa hari, bisan indi suno sa kasuguan: kag kon mawala ako, mawala ako” (Ester 4:16).
Niyan si Ester naghambal sing mapainubuson sa atubangan sang hari kag “naghapa sia sa iya tiilan, kag nagpakiluoy sa iya nga may luha … sa pagbaylo sang mga sulat … sa paglaglag sang mga Judio.” Dugang niya, “Paano bala ang pagkabatas ko sa pagtan-aw sang malaut nga magaabot sa akon katawohan?” (tan-awa sa Ester 8: 3, 5–6). Ang tagipusuon sang hari natandog, kag ginhatag niya ang iya ginapangayo.3
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14.Petsa sang pagtugot sa paglubad: 6/14. Paglubad sang Visiting Teaching Message, July 2014. Hiligaynon. 10867 861
Binagbinaga Ini
Paano ang pagpanabang ni Jesucristo makainspirar sa aton nga magtanyag sang kaluoy kag kapatawaran sa iban?