Mensahe sang Unang Panguluhan, Hulyo 2014
Ang Promisa sang Pagliso sang mga Tagipusuon
Ang akon iloy, nga si Mildred Bennion Eyring, nagdako sa isa ka komunidad sang pagpanguma sa Granger, Utah, USA. Isa sang iya mga utod nga lalaki, nga si Roy, ang nagsunod sa palangabuhian sang pamilya sa pagsagod sang mga karnero. Sang lamharon pa sia, naghinguyang sia sang madamo nga mga semana malayo sa ila puluy-an. Sa pagligad sang panahon, amat-amat nga nadula ang iya interes sa Simbahan. Sang ulihi, nagsaylo sia sa Idaho, Estados Unidos sang Amerika, nagpangasawa, kag nakaangkon sang tatlo ka kabataan. Napatay sia sa edad nga 34 sang ang iya asawa 28 anyos ang edad kag ang ila kabataan magagmay pa.
Bisan pa nga ang diutay nga pamilya ni Roy ato sa Idaho kag ang akon iloy nagsaylo mga 2,500 ka milya (4,025 ka kilometro) sa New Jersey, USA, masami sia nagapadala sa ila sang mga sulat sang pagpalangga kag pagpaisog. Ang pamilya sang akon tiyo mapinalanggaon nga ginatawag ang akon iloy nga si “Tiyay Mid.”
Madamo nga tinuig ang nagligad, kag isa ka adlaw nakabaton ako sang isa ka tawag gikan sa isa sang akon mga pakaisa. Ginsugiran ako nga ang balo ni Roy napatay na. Ang akon pakaisa nagsiling, “Gusto gid ni Tiyay Mid nga makahibalo ka.” Si Tiyay Mid madugay na nga napatay sadto, pero ang pamilya [sang akon tiyo] sa gihapon nakabatyag sang iya pagpalangga kag nagdab-ot sa pagpahibalo sa akon.
Nagpamensar ako kon paano gintungdan sang akon iloy ang responsibilidad sa iya pamilya kasubong sang responsibilidad sang Nefinhon nga mga propeta sa ila mga pamilya paagi sa pagpabilin nga malapit sa mga paryente nga luyag nila dalhon sa ebanghelyo ni Jesucristo. Si Nefi nagsulat sang isa ka rekord nga ginlauman niya nga mag-impluwensya sa mga anak sang iya mga utod nga magbalik sa ginatuohan sang ila amay, nga si Lehi. Ang mga anak ni Mosias nagpakita sang amo man nga pagpalangga sa ila pagwali sang ebanghelyo sa mga kaliwat ni Lehi.
Ang Ginuo naghatag sang mga pamaagi para sa aton nga mabatyagan ang pagpalangga sa sulod sang mga panimalay nga mahimo magpadayon sa katubtoban. Ang lamharon nga mga miyembro sa Simbahan karon nakabatyag sang ila mga tagipusuon nga nagaliso o nagaulikid sa ila mga pamilya. Nagapangita sila sang mga ngalan sang mga miyembro sang ila pamilya nga wala makaangkon sang oportunidad nga mabaton ang mga ordinansa sang kaluwasan sa sining kabuhi. Ginadala nila inang mga ngalan sa templo. Sa ila pagpabunyag, may kahigayunan sila nga mabatyagan ang pagpalangga sang Ginuo kag sang mga miyembro sang pamilya nga ila ginahikotan sang tal-os nga mga ordinansa.
Madumduman ko pa ang pagpalangga sa tingug sang akon pakaisa nga nagtawag kag nagsiling, “Ang amon iloy napatay, kag si Tiyay Mid maluyag gid nga makahibalo ka.”
Kamo nga nagahikot sang mga ordinansa para sa mga miyembro sang pamilya nagadab-ot sa pagpalangga, kasubong sa mga anak nga lalaki ni Mosias kag sang propetang si Nefi. Pareho sa ila, makabatyag kamo sang kalipay para sa sadtong nagabaton sang inyo halad. Makapaabot man kamo nga mabatyagan ang pareho kadaku nga kalipay sang kay Amon, nga nagsiling parte sa iya pangmisyonaryo nga pag-alagad sa tunga sang malayo nga mga himata:
“Gani, magkasadya kita, huo, magakasadya kita sa Ginuo; huo magakasadya kita, kay nalubos ang aton kalipay; huo dayawon naton ang aton Dios sa wala’y katubtuban. Yari karon, sin-o ang mahimo nga magakasadya sing tuman sa Ginuo? Huo, sin-o ang makahambal sing tuman kadamo nahanungod sang iya dako nga gahum, kag sang iya kaluoy, kag sang iya pagkamainantuson tuhoy sa mga anak sang tawo? Yari karon, ginasiling ko sa inyo, indi ko masiling ang pinakadiutay nga bahin nga akon ginabatyag.” (Alma 26:16).
Nagasaksi ako nga ang inyo mga balatyagon sang pagpalangga para sa mga miyembro sang inyo pamilya—bisan diin man sila—mga katumanan sang promisa nga si Elias magakari. Nagkari sia. Ang mga tagipusuon sang mga anak nagaliso sa ila mga ginikanan, kag ang tagipusuon sang mga ginikanan nagaliso sa ila mga anak (tan-awa sa Malaquias 4:5–6; Joseph Smith—History 1:38–39). Kon nagabatyag kamo sang kaluyag nga magpangita sang mga ngalan sang inyo mga katigulangan kag dalhon inang mga ngalan sa templo, nagabatyag kamo sang katumanan sinang panagna.
Isa ka bugay ang magkabuhi sa panahon nga ang promisa sang pagliso sang mga tagipusuon nagakatuman. Si Mildred Benion Eyring nakabatyag sinang obligasyon sa iya tagipusuon. Ginpalangga niya ang pamilya sang iya utod nga lalaki, kag nagdab-ot sia sa ila. Nabatyagan nila ang ila mga tagipusuon nga nagliso sa pagpalangga kay Tiyay Mid bangud nakahibalo sila nga palangga niya sila.
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, July 2014. Hiligaynon. 10867 861
Pagtudlo gikan sa Sining Mensahe
Ayhan luyag ninyo magbasa sang panagna parte sa espiritu ni Elias upod sa inyo ginabisitahan. (tan-awa sa Malaquias 4:5–6; Joseph Smith—History 1:38–39). Hambali ang mga paagi nga makapasakop sa family history, kalakip na ang mga kasangkapan pareho sang indexing, photography, kag blogging. Kon ang inyo mga ginabisitahan wala pa makahisayod FamilySearch.org, huna-hunaa ang paghinguyang sang tion agud ipakita ang mga ini sa ila.