Mulwol ko Bin Somm’on e Presidency, July 2014
Fare Micheg nibe Thil Gum’ircha’ey
Nina rog, Mildred Bennion Eyring, e pi’elel u dakaen e binaw nib sug ko milay’ u Granger, Utah, USA. Reb e walagan ni pumo’on, Roy, ke un ko muruwel e tibinaw ni ngan chathowliy e saf. Nap’an ke pagal ke paer bukun e rran ni gathi ram nga tabinaew. Tomuren boech ngiyal’, de un ko pi mo’olung e Galasia. De n’uw nap’an ke yaeni par nga Idaho, USA, nge mabgol me fakay dalip e bitir. Ke yim’ nap’an ni 34 e duw rok nap’an i ppin rok ke taw nga 28 e duw rok nge chig’chig’ e bitir rorow.
Dariy’ fan ni tabinaew nib chig rok Roy ma bay u Idaho nge Nina’ rog e ke yaen ni paer 2500 miles (4025 km) u New Jersey, USA, ke yoloey ngorad ni ke ba’adag rad ma ni ngaen athamgiliy wun’raed. Tabinaw e uncle rog ke tay fan e mar piningraed e nina rog ni “Aunt Mid.”
Ke yaen boch e duw, ma reb e ran kug athapeg e phone call rok reb e cousin rog. Min noeg ngog ni ke yim’ fare ppin ku Roy. Cousin rog e yog, “Aunt Mid e ba’adag ni gura nang”. Aunt Mid e ke nu’uw nap’an ni ke yim’, machane ke magaey e t’ufeg ko tabinaew ma ere kar rogned ngog.
Kug gin’ ni rogon ni nina’ rog ke ayuweg e tabinaw rok ta’ab rogon ko rogon ni pi profet ko fapi Nephites kar ayuweg ned pi tabinaw roraed ni kar chugur gaed ngak pi chon e tabinaw ni yad ba’adag ni ngar pii’ e gospel rok Yesus Kristus. Nephi ke yoloey chepin ni ke athapeg ra ayuweg pifak e bitir ko walagan ni ngar suloed nga rogon e mich ko chitamangirow, Lehi. Fapi faak ni mo’on ku Mosiah kar daged e runguy ni ta’ab rogon nap’an kar machib niged e gospel ngak picha’an Lehi.
En Somoel ke fal’eg rogon ni nge yoeg ni ngad thamiyed e t’ufeg u pi tabinaw nibe paer nib manemus. Picha’ nib fel’ yangrad ko Galasia daba’ e ma thamiyed e gum’ir’cha’rad ni ngar chel gaed ngak tabinaew rorad. Yad be gay fithingan e pi gidii’rad ni dawori yog ni ngar thapag ned pi gam’ing ko tathap nga lan biney e yafos roraed. Yad ma fek pi fithingaen nga lan e temple. Nap’an yaed ma yaen nga lan e raen ko tawfe, rayog roraed ni ngar thamiyed e t’ufeg rok Somoel nge pi chongin e tabinaw ni kar ngongoliyed pi gam’ing roraed ni fan.
Rayog nggu puguraen e t’ufeg nga lan e lam rok cousin rog ni ke call nag me yoeg, “Nina romaed ke yim’, nge ra ba’adag Aunt Mid ni ngam nang.”
Gimed ni be ngongoliy pi gam’ing ni fan ko pi chongin e tabinaw romed e ma ayuweg nu dakaen e t’ugeg boed ni kar rin’ed pi pagal nu Mosiah nge re profet Nephi. Boed yaed, gimed ra thamiy e faflaen’ ni fan picha’ nibe athapeg e tawath rom. Ku rayog ni ngam thamiy ta’ab rogon e faflaen’ boed e Ammon, ni ke weliy fan e muruwel rok ko missionary nu fithik pi chongin e tabinaw rok nib palog:
“Ere, ngad ‘uf gaed, arragon, ngad ‘uf gaed ngak’ Somoel; arragon, ngad falfalaen’ gaed, ya falfalaen’ rodaed e kari gel; arragon, ngad oged e magaer ku Got rodaed ni gubinfen. Musap, minii’ e rayog ni nge ‘uf ngak’ Somoel nge pag rogon? Arragon, minii’ e rayog rok’ ni nge weliy mornga’agen gelingin nge pag fini yo’or yay, nge murnguy rok’, nge gumaen’ rok’ ko gafgow ni tay ni fan ngak’ e gidii’? Musap gaed, gube yoeg ngomed, dabiyog ni nggu weliy e gin th’abi achichig riy u lanin’ug” (Alma 26:16).
Gube micheg ni amithingun e runguy ni bay rom ko pi gidii’en e tabinaw rom —dem turug e gin ni yad ma paer riy—e mugu’uliy ko fare micheg ni ra yib Elijah. Ma ke yib. Gum’ircha’ ko pi bitir e be chel ngak chitamangirad, ma gum’ircha’ ko chitamangirad ba chel ngak pifak rad. (mu guy Malachi 4:5–6; Joseph Smith—History 1:38–39). Nap’an ni gabe thamiy rom ni gaba’adag ni ngam gay fithingan pi gidii’ em ni kakrom ni ngam fek nga temple, gabe thamiy e mugu’ul ko fare yi’iy nem.
Rib fael wa’ath dad ni gadad ma paer ko ngiyal nap’ani yib i m’ug nib riyul’ fare micheg ni ngan chel e gum’ircha’ey. Ke thamiy Mildred Bennion Eyring u gum’ir’cha’ey e ren’ey. Ke t’ufeg e tabinaew ko walagen, ma ke gay rogon ni nge ayuweg raed. Kar thamiyed ni ke chel gum’ir’cha’raed ngak Aunt Mid ni bachan kar nanged ni yad be t’uf ngak.
© 2014 ko Intellectual Reserve, Inc. Gubin mabay matwon. Kan yoloey u Merikan. Kan micheg nag ko thin nu Ngalis: 6/14. Micheg nag i pilyeg: 6/14. Pilyeg thin ko First Presidency Message, July 2014. Yapese. 10867 905
Rogon ni ngan Fil Biney e Mulwol
Sana ram ba’adag ni ngam bi’eg pi yi’iy marung’agen e ya’el ku Elijah rok picha’an ni gabe machib nag (muguy Malachi 4:5–6; Joseph Smith—History 1:38–39). Mu puruy niged ko uragon ni ngan ngongoliy chepin e tabinaw, ni ma un ngay ko talin e indexing, photography, nge blogging ngay. Fa’an picha’an ni gabe machib nag ngak e dar nanged fan e FamilySearch.org, mu lemnag ni ngam dag nagraed e ren’ey.