Agtutubo
Nagserbiak Manen
Agnanaed ti nagsurat iti Rio Grande do Norte, Brazil.
Maysa nga aldaw, kalpasan ti panangileppasko iti maysa a proyekto iti serbisio, magmagnaak idi agingga a nadanonko ti meetinghouse ket nakitak ti dua a kakabsat a babbai nga agdaldalus iti pasdek. Gagangay laeng dagiti balikasko: “Kakabsat, kasapulanyo kad’ ti tulong?” Maysa kadakuada ti immisem kaniak ket kinunana a simmangpetak iti husto nga oras gapu sa is-isuda laeng ti agdaldalus ket nabannogdan. Kinunana a nagkararag nga ibaon koma ti Apo ti maysa a tao a tumulong. Naragsakanak unay a siak ti nagbalin a sungbat iti kararagna. Kalepleppasko a nangted iti serbisio iti maysa a tao ket nabannogak unayen, ngem sinurotko ti pusok ket indiayak ti agserbi nga ad-adda pay.
Maysa a bilin nga agtrabaho a sirarag-o (kitaen iti DkK 24:7). No addaantayo iti tarigagay nga agserbi iti amin a gundaway, makatulongtayo a mapasamak dagiti milagro iti biag dagiti dadduma pay a tao. Agbalin a napatpateg ti biagtayo no agserbitayo. Pudno nga ay-ayatennatayo ti Apo, tulonganna ti tunggal maysa kadagiti annakna, ken ikkannatayonto iti pigsa nga agserbi.