Mensahe iti Visiting Teaching, Septiembre 2014

Ti Nadiosan a Mision ni Jesucristo: Mangliwliwa

Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti mainayon nga impormasion, mapan iti reliefsociety.lds.org.

Pammati, Pamilia, Tulong

Inkari ni Jesucristo, “Dikayto baybay-an nga ul-ulila: umayakto kadakayo” (Juan 14:18). Ikkannakayonto iti “balangat iti lugar ti dapu, ti lana ti rag-o iti lugar ti dung-aw” (Isaias 61:3). Gapu ta sinagaba ni Cristo ti Pannubbot para iti tunggal maysa kadatayo, dinatayonto malipatan. “Inawat ti Mangisalakan iti Bagina … dagiti saemtayo ken panagsagabatayo ken panagrigattayo tapno maammuanna no ania ti mariknatayo ken no kasano a liwliwaennatayo,” kinuna ni Linda S. Reeves, maikadua a mammagbaga iti Relief Society general presidency.¹

Iti pannakaammo a liwliwaennatayonto ni Cristo ket mabalin a mangisangbay kadatayo iti talna ken mangparegta kadatayo a mangsurot iti pagwadanna babaen ti panagserbitayo kadagiti dadduma. Kinuna ni Presidente Thomas S. Monson: “Ti pannakaammotayo iti ebanghelio ken ti ayattayo iti Nailangitan nga Amatayo ken ti Mangisalakantayo ket mangliwliwa ken mangtulongto kadatayo ken mangisangbay kadatayo iti rag-o iti puspusotayo no magnatayo a sililinteg ken agtungpaltayo kadagiti bilin. Awanto ditoy lubong ti makabael a mangparmek kadatayo.”²

Manipud kadagiti Nasantuan a Kasuratan

Juan 14:18, 23; Alma 7:11–13; Doktrina ken Katulagan 101:14–16

Manipud iti Pakasaritaantayo

Ni Elaine L. Jack, ti maika-12 a Relief Society general president, kinunana: “Iti visiting teaching agtitinnulongtayo. Masansan nga isao dagiti tignaytayo dagiti saan a maisao dagiti timektayo. Ti nabara nga arakup ket makaited iti napintas unay a komunikasion. Mamagkaykaysa kadatayo ti panagkatawa nga aggigiddan. Ti kanito a panagbibinninglay ket mangpasadiwa kadagiti kararuatayo. Ditay kanayon a kabaelan a baklayen ti dagensen wenno parikut ti maysa a mariribukan, ngem matulongantayo wenno mapapigsatayo ti pakinakemna tapno kabaelanna nga ibturan daytoy a naimbag.”³

Dagiti kakabsat a nagkauna a kameng ti Relief Society “nasarakanda ti naespirituan a pigsa iti tunggal pammateg ken panangngaasi ti tunggal maysa. … Kabayatan ti panagsagabada kadagiti pannubok iti sakit ken ipapatay, nagkararagda a sipapammati para iti tunggal maysa ken liniwliwada ti tunggal maysa. ‘Siwawaya a naiburay ti ayat ti Dios iti tunggal maysa,’ insurat ni Helen Mar Whitney, ‘agingga a kasla naawan ti bileg ti maysa a nadangkes kadagiti panagkalikagumna nga umasideg iti nagbabaetantayo iti Apo, ken dagiti naranggas a pannubokna, iti dadduma a pagarigan, ti mangigapu iti panagladingittayo.”⁴

© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, September 2014. Ilokano. 10869 864

Panunotenyo Daytoy

Kasano a mangyeg kadakayo iti liwliwa ti pannakaawat a manglaglagip ti Apo?