Mensahe ti Umuna a Panguluen, Septiembre 2014
Nakasaganatayo Kadi?
Iti lugar a naminsan a nagnaedak ken nagserbiak idi, nangipagna ti Simbaan iti proyekto iti manukan, a dagiti boluntario manipud kadagiti lokal a ward ti kangrunaan a nagasikaso. Kaaduanna a panawen daytoy ket nadur-as a maipagpagna a proyekto, a mangabasto iti balay a pagidulinan dagiti bishop iti rinibribu a presko nga itlog ken ginasgasut a kilo ti naparti ken nadalusanen a manok. Nupay kasta, iti sumagmamano a gundaway, saan laeng a panagkapuyo iti ima dagiti nagboluntario nga agpart-time nga agay-aywan iti manok no di ketdi pay pannakapaay iti puso ken panunotda.
Kas pagarigan, kanayonkonto a malaglagip ti panawen a panangummongmi kadagiti agtutubo a lallaki iti Aaronic Priesthood tapno mangtedda iti maysa a proyekto ti panagdalus iti panawen ti kalgaw. Nagguummong ti nagaget ken naregta a grupo para iti proyekto ken sidadarasda a nagparut, nangummong, ken nangpuor iti adu a ruruot ken putputed a kayo. Babaen ti lawag dagiti mapupuoran a bonfire, nangankami iti hot dogs ket kinablaawanmi dagiti bagimi iti naileppas a nasayaat a trabaho.
Nupay kasta, adda maysa laeng a problema a mangted peggad. Ti ariwawa ken dagiti uram ket namagburibor unay iti nakain-inaka a populasion dagiti 5,000 nga agitlog a manok ta kaaduanna kadagitoy ti kellaat a naawanan iti dutdot ket nagsardengda a nagpessa. Kalpasan dayta binay-anmi ti sumagmamano a ruruot tapno makapagpapessakami iti ad-adu pay nga itlog.
Awan miembro ti Simbaan a timmulong a nangipaay kadagiti agkasapulan ti makalipat wenno pagbabawyanda ti kasta a padas. Saan a baro kadakami ti kinagaget, kinasalimetmet, ken panagpannuray iti bagi, ken panagparabur iti dadduma.
Nasken a laglagipentayo a ti kasayaatan a sistema ti balay a pagidulinan para iti tunggal pamilia iti Simbaan ket maaddaan koma iti abasto a taraon, lupot, ken, no mabalin, dadduma pay a kasapulan ti panagbiag. Mairaman iti balay a pagidulinan ti Apo ti oras, talento, paglaingan, panangngaasi, naikonsagrar a banag, ken banag a pakaseknan iti kuarta dagiti napudno a miembro ti Simbaan. Magun-od dagitoy a pagalaan iti tulong wenno resources iti bishop iti panangtulong kadagiti agkasapulan.
Igunamgunammi iti amin a Santo iti Ud-udina nga Aldaw nga agbalinda koma a nasirib iti panagplanoda, agbalinda koma a naannad iti panagbiagda, ken liklikanda ti nalaus wenno di kasapulan a panagutang. Ad-adu pay a tao ti makalasat wenno makaibtur kadagiti rigat iti pakaseknan iti kuarta no adda abastoda a taraon ken lupot ken awan utangda. Ita nga agdama makitatayo nga adu dagiti saan a nangsurot iti daytoy a balakad: adda abastoda iti utang ken awan taraonda.
Ulitek ti impakdaar ti Umuna a Panguluen sumagmamano a tawen ti napalabas:
“Nabalakadan dagiti Santo iti Ud-udina nga Aldaw iti adun a tawen nga agsaganada para iti panagrigat babaen ti panangidulin iti saggabassit a gatad ti kuarta. Ti panagurnong iti kuarta ket awan duadua a mangted iti talged ken pagimbagan. Adda pagrebbengan ti tunggal pamilia a mangipaay iti bukodna a kasapulan agingga a kabaelanna.
“Allukoyendakayo sadino man ti pagnaedanyo iti lubong nga agsaganakayo para iti panagrigat babaen ti panangkitayo iti kasasaad dagiti pakaseknanyo iti kuarta. Allukoyendakayo nga agbalin a nasalimetmet iti panaggastoyo; disiplinaenyo ti bagiyo iti panaggatangyo tapno maliklikan ti panagutang. Bayadanyo a dagus ti utangyo agingga a kabaelanyo, ket wayawayaanyo ti bagiyo manipud iti daytoy a pannakaadipen. Masansan nga agurnongkayo iti bassit a gatad ti kuarta tapno in-inut a makapaaddakayo iti reserba a kuarta.1
Nakasaganatayo kadi para kadagiti saan a mapakpakadaan a pasamak iti biagtayo? Naan-anay kadin dagiti paglaingantayo? Agbibiagtayo kadi a nasalimetmet? Adda kadi reserba nga abastotayo itan? Natulnogtayo kadi kadagiti bilin ti Dios? Agtungtungpaltayo kadi kadagiti pannursuro dagiti propeta? Nakasaganatayo kadin a mangted iti sanikuatayo kadagiti nakurapay, kadagiti agkasapulan? Napudnotayo kadi iti Apo?
Agbibiagtayo kadagiti nariribuk a panawen. Masansan a saan nga ammo ti masakbayan; ngarud allukoyennatayo nga agsagana para kadagiti saan a mapakpakadaan a pasamak. No dumteng ti oras a panangeddeng, naladawen ti oras a panagsagana.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, September 2014. Ilokano. 10869 864
Panangisuro manipud iti Daytoy a Mensahe
Iti panangibilang iti kasapulan dagiti sarsarungkaranyo, mangpanunot kadagiti wagas a pakatulonganyo kadakuada nga agbalin a managpannuray iti bukod a kabaelan iti trabaho, pakaseknan iti kuarta, pagidulinan iti taraon, ken panagsagana para iti di mapakpakadaan a panagkasapulan. Mangpanunot iti maysa a paglaingan a maibinglayyo kadakuada, kas iti panagmuyong wenno panagtarawidwid iti kuarta, a mangpatibker kadakuada a mangsurot iti balakad ni Presidente Monson.