Ang LDS Charities Nanghatag og Tabang

Sukad sa unang mga adlaw sa Pagpahiuli, ang mga miyembro sa Ang Simbahan ni Jesukristo sa mga Santos sa Ulahing mga Adlaw nahibaloan sa ilang determinasyon sa pagtabang ug pagbayaw niadtong nag-antus.

Sa bag-ohay nga katuigan, ang mga miyembro sa Simbahan ug ang uban, pinaagi sa ubay-ubay nga mga kontribusyon, nakahatag og paagi alang sa mga programa sa Church Humanitarian Services nga makapanalangin sa mga tawo sa tibuok kalibutan. Niadtong 2013 lang, ang mga programa sa LDS humanitarian nakatabang og sobra sa 10.5 ka milyon ka mga tawo sa 130 ka mga nasud.

Kini nga paningkamot naglangkob sa paghatag og kahupayan ug makapatunhay sa kinabuhi nga mga butang sa paghatag og limpyo nga tubig; sa pagbansay sa mga midwife ug mga doktor aron sa pagluwas sa kinabuhi sa liboan ka bag-ong natawo nga bata; sa paghatag og mga wheelchair. Agi og dugang, ang Simbahan nagtabang sa vison care and training, mga bakuna, ug pagtabang sa mga komunidad sa pagpatubo og masustansyang mga pagkaon.

Pagtabang sa Refugee

Ang Simbahan mihimo kanunay ug dakong paningkamot sa pagtabang sa mga refugee ingon man usab sa uban nga nag-antus sa panagbangi ug kakulang sa pagkaon. Bag-ohay lang:

Ang Simbahan midonar og liboan ka mga tolda ug suplay sa pagkaon ngadto sa mga pamilya sa Chad ug naghimo og mga puso, mga kasilyas, ug mga shower building sa kampo sa mga refugee sa Burkina Faso.
Sa Jordan, Syria, Lebanon, Iraq, ug sa rehiyon sa Kurdish, ang LDS Charities nag-apud-apod og mga pakete sa pagkaon, mga habol, mga suplay sa medikal, mga hygiene kit, mga hapin sa kama, ug sinina sa tingtugnaw. Sa Iraq ug sa rehiyon sa Kurdish, mga wheelchair ug uban pang mga ekipo sa pagbalhin gihatag ngadto sa mga tawo nga nasamdan sa panagbangi.
Sa Gaza, mga pharmaceutical, mga suplay sa medikal, ug gatas gidonar ngadto sa ulohang ospital.
Sa Israel, ekipo sa ultrasound gidonar ngadto sa usa ka medikal nga pasilidad.
Sa Ukraine ug Russia, ang Simbahan nakigtambayayong sa United Nations Development Program sa nanghatag og pagkaon, mga hapin sa kama, sinina, ug personal nga gamit sa panglimpyo sa panglawas alang sa 30,000 ka tawo nga nawad-an og balay tungod sa sibil nga kagubot.

Ang LDS Charities nagpabilin nga walay gidapigan sa politika ug sa pagtabang sa mga tawo sa bisan unsang pagtuo.

Paningkamot sa Kahupayan

Ang Simbahan mitubag usab kon adunay natural nga katalagman ang mahitabo.

Sa Sierra Leone ug Liberia, ang Simbahan mipaapil sa 1,600 ka lokal nga mga boluntaryo sa pagbansay unsaon paglikay sa Ebola ug paghatag og pagkaon ug nag-unang panlimpyo ug mga suplay sa medikal.
Ang sunod-sunod nga pagbaha tungod sa kusog nga habagat sa Pakistan ug sa India, ang Simbahan mihatag og pagkaon, mga hygiene kit, ug mga suplay sa medikal.
Sa Tonga, usa ka dakong unos ang miguba sa gatusan ka mga panimalay, lakip sa mga panimalay sa 116 ka mga miyembro. Ang mga miyembro mitabang sa pagtukod og balik sa ilang mga panimalay. Sila gibansay kon unsaon sa pagtukod sa ilang kaugalingong kapasilungan ug dayon gihangyo sa pagtabang og dili moubos og upat ka tawo aron pagtukod sa ilang balay. Ang Simbahan mitabang nga mabalik ang pagpanom ug sa pagbansay nga mananom diha sa panimalay.
Sa Mexico, sa dihang usa ka kusog nga bagyo miguba o midaut sa liboan ka mga panimalay, ang lokal nga mga lider sa Simbahan mihatag og pagkaon ug tubig sa naapektohan nga mga miyembro, ug ang Simbahan nakigtambayayong sa gobyerno sa estado sa paghatag og mga pinutos nga pagkaon.

Unsay Inyong Mahimo

Ang mga donasyon sa Humanitarian Aid Fund makapahimo sa Simbahan sa pagtubag sa diha-diha dayon nga mga krises. Agi og dugang, bisan asa sila nagpuyo, ang mga miyembro nagpakita og Kristohanong gugma, nagserbisyo, ug nagtahud sa tanang mga tawo. Ang pagtagad sa mga refugee sa atong komunidad, o niadtong nag-antus sa ilang kaugalingong kalamidad, ug pagtanyag kanila og pakighigala, interes, ug maabi-abihong palibut usa ka Kristohanon nga buhat nga dili gayud makawang.

Pinaagi sa humanitarian nga organisasyon, ang Simbahan naningkamot sa pag-implementar sa tambag ni Presidente Thomas S. Monson nga “makalig-on kita sa usag usa; kita adunay kapasidad nga motagad niadtong wala matagad. Kon kita adunay mga mata nga makakita, mga dunggan nga makadungog, ug kasingkasing nga makahibalo ug mobati, kita motabang ug moluwas” (“The Call to Serve,” Liahona, Ene. 2001, 58).

Ang Presidente sa District sa Amman Jordan ug iyang anak nga babaye nakighimamat sa mga refugee.

Sarah Jane Weaver, Church News