Fakahoko ʻe he Ngaahi Kautaha ʻOfa ʻa e Siasí ha Tokoni
Talu mei he kamataʻanga hono Toe Fakafoki Mai ʻo e Ongoongoleleí, mo e ʻiloa e kaingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi heʻenau vilitaki ke ala atu ʻo tokoniʻi ʻa kinautolu ʻoku faingataʻaʻiá.
ʻI he ngaahi taʻu kimuí ni maí, kuo ʻomi ʻe he ngaahi foaki ʻofa ʻa e kaingalotu ʻo e Siasí mo e niʻihi kehe, ʻa e koloa mo e paʻanga ke fakalele ʻaki e ngaahi polokalama Tokoni ʻOfa Fakaetangata ʻa e Siasí, ke faitāpuekina ai e moʻui ʻa e kakaí ʻi he funga ʻo e māmaní. ʻI he taʻu 2013, naʻe tokoniʻi ai ʻe he polokalama Tokoni ʻOfa Fakaetngata ʻa e Siasí ha kakai ʻe 10.5 miliona tupu ʻi ha ngaahi fonua ʻe 130.
Naʻe kau he ngaahi ngāue ko ʻení ʻa hono foaki ha koloa ke fakafiemālieʻi mo tokoniʻi ʻaki e moʻuí ʻi he maʻu ha vai maʻá; akoʻi e kau māʻulí mo e kau toketaá ʻi hono fakahaofi ha fanga kiʻi pēpē valevale ʻe lauafe; pea mo foaki ha saliote teketeke. Tānaki atu ki aí, ne tokoni ʻa e Siasí ki ha ngaahi ako ki hono tokangaʻi e matá, huhu maluʻí, mo e tokoniʻi e tukui koló ke tō ʻa e meʻakai ʻoku fakatupu moʻui leleí.
Tokoni ki ha Taha Kumi Hūfanga
Kuo fai ʻe he Siasí ʻa e meʻa tatau pē ke tokoni ki he kau kumi hūfangá pea mo ha niʻihi kehe ʻoku faingataʻaʻia ʻi he ngaahi taú mo e nounou fakameʻatokoní. Kimuí ni Mai:
-
Naʻe foaki ʻe he Siasí ha ngaahi tēniti ʻe lauiafe mo ha meʻakai tefito ki he ngaahi fāmili ʻi Chad pea langa mo ha ngaahi vaikeli, falemālōlō, mo ha ngaahi fale kaukau ʻi he ngaahi ʻapitanga kumi hūfanga ʻi Pukina Fasó.
-
ʻOku tufaki ʻe he Ngaahi Kautaha Tokoni ʻOfa ʻa e Siasí ha meʻakai, ʻū kafu, nāunau fakafaitoʻo, nāunau haisini, nāunau mohenga mo e vala ki he faʻahitaʻu momokó, ʻi he potufonua ko Soataní, Sīliá, Lepanoní, ʻIulakí, mo e feituʻu faka-Kētisí. Kuo tufa atu ʻi he feituʻu ʻIulakí mo faka-Ketisí ha ngaahi saliote teketeke mo ha ngaahi meʻangāue kehe ki he feʻaluʻakí maʻanautolu ne kafo he taú.
-
Ne foaki ki he falemahaki lahi ʻi Kasá ha faitoʻo, nāunau fakafaitoʻo, mo ha huʻakau efuefu.
-
Naʻe foaki ʻi ʻIsileli ha nāunau fakaʻata ki ha fale fakafaitoʻo.
-
ʻI ʻIukuleini mo Lūsiá, kuo ngāue fakataha ai ʻa e Siasí mo e Polokalama Fakalakalakaka ʻa e Puleʻanga Fakatahatahá ke foaki ha meʻakai, nāunau mohenga, vala mo e nāunau haisini ki he kakai ʻe toko 13,000 ne mole honau ʻapí he moveuveu fakalotofonuá.
Ngāue ʻa e Ngaahi Kautaha Tokoni ʻOfa ʻa e Siasí ke tuʻu ʻatā fakapolitikale, pea tokoni ki he kakai ʻi ha faʻahinga siasi pē.
Ngaahi Ngāue Tokoní
ʻOku tokoni foki ʻa e Siasí ʻi he taimi ʻoku hoko ai ha ngaahi fakatamaki fakanatula.
-
ʻI Siela Leone mo Laipīlia, kuo fakakau ʻe he Siasí ha kau ngāue tokoni fakalotofonua ʻe toko 1,600 ke nau fai ha ako ki he founga fakaʻehiʻehi mei he ʻĒpolá mo foaki ha meʻakai mo e nāunau haisini mo fakafaitoʻo.
-
Hili ʻa e tāfea ne fakatupu ʻe he faʻahitaʻu ʻuha ʻi Pakisitani mo ʻInitiá, ne foaki ʻe he Siasí ha meʻakai, nāunau haisini pea mo ha nāunau fakafaitoʻo.
-
ʻI Tongá, ne haveki ai ʻe ha afā ha ʻū ʻapi ʻe laungeau, kau ai ha tukui ʻapi ʻe 116 ʻo ha ngaahi fāmili siasi. ʻE tokoni ʻa e kaingalotú ki hono toe langa honau ngaahi ʻapí. Ne akoʻi kinautolu ki he founga langa honau ʻapí pea kole ange leva ke nau tokoni ki ha kakai ʻe toko fā kehe ke langa honau falé. ʻOku toe tokoni ʻa e Siasí ke tō fakafoki ʻa e ngoué mo fai ha ako fakataukei ki he ngoue ʻi ʻapí.
-
ʻI Mekisikou, hili hono fakaʻauha pe maumauʻi ʻe ha matangi ha ngaahi ʻapi ʻe lauiafe, ne foaki ʻe he kau taki fakalotofonua ʻo e Siasí ha meʻakai mo ha vai ki he ngaahi ʻapi ʻo e kaingalotu ne uesiá, pea ngāue fakataha ʻa e Siasí mo e puleʻangá ke foaki ha nāunau fakameʻakai.
Ko e Meʻa te Ke Lava ʻo Faí
ʻOku tokoni e Foaki ki he Paʻanga Tokoni ʻOfa Fakaetangatá ke lava ai e Siasí ʻo fai ha tokoni fakavavevave ki ha faingataʻa. Ko e tahá, neongo pe ko e fē ʻoku nau nofo aí, ʻe lava ke fakahaaʻi ʻe he kāingalotú ʻa e ʻofa faka-Kalaisí, fai ha tokoni mo langaki hake ʻa e feveitokaiʻakí ʻi he kakai kotoa pē. Ko hono fakatokangaʻi ko ia ʻo ha kau kumi hūfanga pe hikifonua mai ki hotau ngaahi tukui koló, pe ko kinautolu ʻoku fepaki mo ha faʻahinga fakatamaki fakatāutahá, pea tau fakahaaʻi kiate kinautolu ha anga fakakaumeʻá, tokanga, mo ha ʻātakai ʻoku fakalatá, ko ha tōʻonga faka-Kalaisi ia he ʻikai teitei mole noa.
ʻOku feinga ʻa e Siasí ʻo fakafou ʻi hono tafaʻaki tokoni ʻofa fakaetangatá, ke fakahoko e faleʻi ko ia ʻa Palesiteni Tōmasi S. Monisoní “ke tau fefakamālohiaʻaki; pea ʻoku tau malava ke fakatokangaʻi ʻa kinautolu ʻoku liʻekiná. ʻI he taimi ʻoku tau maʻu ai e mata ke vakaí, telinga ʻoku fanongó, mo e loto ʻoku ʻilo mo ongoʻí, ʻe lava ke tau ala atu ʻo fakahaofi” (“The Call to Serve,” Liahona, Sānuali. 2001, 58).
Feʻiloaki e Palesiteni Fakavahefonua ʻo Amman Jordan mo hono ʻofefiné mo ha kau kumi hūfanga.
SARAH JANE WEAVER, CHURCH NEWS