Maʻu Atu ʻa e Ngaahi Maʻuʻanga Tokoni ki he Ngaahi Fakataha Alēleá

ʻOku maʻu ʻe he kau mēmipa ʻo e fakataha alēlea ʻo e siteikí mo e uōtí he taimí ni ha peesi uepisaiti foʻou ʻa e Siasí ʻoku ui ko e Ministering Resources ʻi he ministering.lds.org ke tokoni ki he fakafoʻituituí mo e ngaahi fāmilí ʻi heʻenau ngaahi fie maʻu fakatuʻasino mo fakalaumālié, ʻo kau ai e ngaahi palopalema faingataʻa mo pelepelengesí. ʻOku lava ke maʻu ia ʻe kinautolu ʻoku lolotonga ʻi ai hanau ngaahi uiuiʻi lolotonga ʻi he ngaahi fakataha alēlea fakasiteiki mo fakauōtí ʻo fakafou ʻi heʻenau ʻakauni LDS.

Kuo ʻoatu e fakamatala fakamuimuitaha ki he maʻuʻanga tokoni ne ʻoatu kimuʻa ki he kau pīsopé pē mo e kau palesiteni fakasiteikí pea toe fakalahi atu mo ha fakahinohino pau kau ki he founga ke tokoniʻi kinautolu ʻoku ngaohikoviá, ʻa kinautolu ʻoku fefaʻuhi mo e maʻunimaá, niʻihi ʻoku nau fakaʻaongaʻi e ponokalafí, niʻihi ʻoku manako fakahomosekisualé pea mo kinautolu ʻoku fefaʻuhi mo e ngaahi palopalema fakapaʻanga mo fakaengāué.

ʻI he fakahinohino ʻa e pīsopé, ʻe lava ke fakaʻaongaʻi ʻi he fakataha alēlea fakauōtí a e Ngaahi Maʻuʻanga Tokoní maʻá e lelei ʻa e fakafoʻituituí mo e ngaahi fāmilí ʻoku nofo he ʻēlia ʻo e uōtí.