Ennaan eo an Būreejtōnji eo Kein Kajuon, Jānwōde 2015
Ļo̧o̧r Rikanaan ro
Iaar jerbal ilo United States Navy ļo̧k n̄an jem̧ļo̧kin Pata eo an Laļ in Kein Karuo. Iaar juon jeļa, bōlen jerbal eo ettā tata ilo navy. Innām iaar ekkar n̄an erom juon Jeļa First Class, ālkin wōt iaar ekkar n̄an erom juon Yeoman Third Class.
Pata eo Kein Karuo eaar jemļo̧k, im tokālik iaar maron̄ bōjrak jān jerbal. Ak iaar kōm̧m̧ane juon kālet bwe n̄e imaron̄ bar ro̧o̧lļo̧k n̄an tariņae, ikōņaan jerbal āinwōt juon opiija ej ritōl ilo tariņae. Iaar ļōmņak, “Ij jamin bar kwalkol pileej im kareeo jikin m̧ōn̄ā eo, ij jamin bar būraaji piļoor ko, n̄e imaron̄ kōm̧m̧an bwe in jab bar.”
Ālkin aō kar em̧m̧akūt, iaar kobaļo̧k ilo United States Naval Reserve. Iaar etal n̄an kamminene aolep M̧ande jota. Iaar lukkuun katak bwe in maron̄ ekkar. Iaar bōk aolep kain kakkōlkōl imaron̄: ilo kōļmenļo̧kjeņ, ānbwin, im en̄jake. Āliktata, eaar itok jet nuuj em̧m̧an: “Em̧ōj bōk eok n̄an ritōl an tariņae an juon ensign ilo United States Naval Reserve.”
Iaar lukkuun m̧ōņōņō in kwaļo̧ke n̄an kōrā eo pāleeō, Frances, im ba, “itōbrak! Itōbrak!” Eaar bakwōj eō im ba, “Kwaar lukkuun jerbal bwe kwōn bōke.”
Ak innām juon men eaar waļo̧k. Iaar kūr n̄an erom juon rikakpilōklōk ilo bisoprik an ward eo aō. Kweilo̧k in ko̧o̧njeļ eo an bisop eo ekar ilo ejja joten eo wōt an kweilo̧k in kamminene eo aō ilo navy. Iaar jelā bwe eaar wōr juon idabtōk eļap. Iaar jeļā bwe ejjeļo̧k aō iien n̄an jibadek Navy Reserve im eddo ko aō ilo bisoprik. Ta eo in ikar kōm̧m̧ane? Juon kālet ej aikuj kōm̧m̧an.
Iaar jar kake. Innām iaar etal im loļo̧k em̧m̧aan eo ekar aō stake būreejtōn ke iaar juon ļaddik, Elder Harold B. Lee (1899–1973), eo ekar jen Doulul eo an Jon̄oulruo Rijilōk ro. Iaar jijet jujelļo̧k n̄an tebōl eo jān e. Iaar ba n̄an e ewi jon̄an aō kaorōk jerbal in tōl ilo tariņae ilo Navy. Ilo m̧ool, iaar kwaļo̧k n̄an e kape in leta in ijjitōn eo iaar bōke.
Ālkin kejōkļo̧kjeņ kōn jekjek eo ium̧win jidik iien, eaar ba n̄an n̄a, ”en̄in ta eo kwoj aikuj kōm̧m̧ane, Būratōr Monson. Kwōn je juon leta n̄an Bureau of Naval Affairs im ba n̄an er bwe kōnke kūr eo am̧ āinwōt juon membōr in bisoprik, kwoj jab bōk jerbal in tōl in ilo United States Naval Reserve.”
Būruwō eaar rub. Eaar kakkobaba, “Innām jeje n̄an rijjitōn̄ eo an Twelfth Naval District ilo San Francisco im ba n̄an er bwe kokōņaan em̧m̧akūt jān reserve eo.”
Iaar ba, “Elder Lee, kwoj jab meļeļe kōn tariņae. Aaet, renaaj m̧akoko in letok n̄an n̄a jerbal in tōl in ilo Navey n̄e ij m̧akoko in bōke, ak Twelfth Naval District eban kajjieon̄ kabōjrak eō. Kōn juon bata ej kajoorļo̧k ilo Korea, juon eo ejjab ritōl maron̄ naaj kūri . N̄e ij bar ro̧o̧lļo̧k, imaron̄ bōlen ro̧o̧lļo̧k āinwōt juon opiija ej ritōl tariņae, ak iban n̄e iban bōk jerbal in ritōl. Kwoj m̧ool ke kōkkapilōklōk eo kokōņaan bwe in bōke in?”
Elder Lee ej likūt pein ioon aera im ilo juon wāween an juon baba ba, “Būratōr Monson, en ļapļo̧k am̧ tōmak. Tariņae ej jab n̄an kwe.”
Ikar etal n̄an m̧weo im̧ō. Iaar likūt ilowaan embiloob eo leta in commission eo ekoba leta in kabbōjrak eo n̄an bōke. Innām iaar je juon leta n̄an Twelfth Naval District eo im kajjitōk n̄an em̧m̧akūt jān Naval Reserve.
Em̧m̧akūt eo aō jān Naval Reserve eaar pād ilo kurub eo āliktata lolorjaki m̧okta jān jerjer in bata eo an Korea. Doulul an opiij ko aō rekar jerbal. Jiljino wiik ālkin aō kar kūr n̄an erom juon rikakpilōklōk ilo bisoprik, iaar kūr n̄an erom bisop eo an ward eo aō.
Ij jamin kar kabwijer juon jerbal ilo Kabun̄ in ij kabwijer rainin n̄e iaar jab ļoor kōkapilōklōk eo an juon rikanaan, n̄e iaar jab jar kōn kālet eo, n̄e iaar jab tōpar juon kam̧oolol in juon m̧ool eaorōk; māletlet an Anij jet iien ej waļo̧k āinwōt menin bwebwe n̄an armej.1 Ak katak eo emake iaan im eļaptata jemaron̄ ekkatak ilo mour in ej bwe n̄e Anij ej kōnono im ajri ro Nejin rej pokake, renaaj aolep iien jim̧we.
Em̧ōj kar ba bwe bwebwenato rej kaben injej ko reddik, im barāinwōt n̄an mour ko ad. Kālet ko rej ļōm̧ake mejānkajjik eo. Ak jej jab make iaar ilo ejjeļo̧k jipan̄ ilo kālet ko ad.
Eļan̄n̄e kokōņaan loe meram in lan̄, eļan̄n̄e kokōņaan en̄jake im̧we jān Anij Ekajoor Pōtata, eļan̄n̄e kokōņaan bōk en̄jake in ilo lo̧jeem̧ bwe Jemedwōj Ilan̄ ej tōl eok, innām ļoor rikanaan ro an Anij. N̄e kwoj ļoor rikanaan ro, kwonaaj pād ilo jikin kōjparok.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/14. Kōmālim an ukook: 6/14. Ukook eo an First Presidency Message, January 2015. Marshallese. 12581 874
Katakin jān Ennaan In
Ejjab lōn̄ membōr in Kabun̄ in renaaj bōk kōkkapilōklōk juon ļo̧k juon jān juon Rikanaan, āinwōt an kar Būreejtōn kōm̧m̧ane. Ak jemaron̄ jeram̧m̧an wōt ilo ad ļoor katak ko an rikanaan ro im rijilōk ro. Ļōmņak im riiti kōnono ko an Būreejtōn Monson jān kweilo̧k eo eļap ļo̧k (keememej kōnono ko an ilo kōppeļļo̧k eo im kōnono eo an ilo ikkilōk barāinwōt). Lali naan in tōl ko kajjojo ak kūr ko n̄an kōm̧m̧ani. Komaron̄ kōnono kake ta eo kwaar katak ippān ro kwoj loļo̧k im ļōmņak kōn jet wāween ko n̄an kōjerbal kōkapilōklōk ko an Būreejtōn Monson.