Mensahe ti Umuna a Panguluen, Pebrero 2015
Pammaneknek ken Pannakapasurot
Adda pagdumaan ti panangawat iti pammaneknek ti kinapudno ken panagbalin a pudno a napasurot. Kas pagarigan, impaneknek ti naindaklan nga Apostol Pedro iti Mangisalakan nga ammona a ni Jesus ti Anak ti Dios.
“Ni Jesus kinunana kadakuada, Ngem dakayo siasinoak ti panagkunayo?
“Ket simmungbat ni Simon Pedro, ket kinunana: Sika ti Cristo, ti Anak ti Dios a sibibiag.
“Ket simmungbat ni Jesus ket kinunana kenkuana:Nagasatka, Simon, anak ni Jonas; ta saan a ti lasag wenno dara, ti nangipaltiing kenka no di ket ni Amak nga adda sadi langit” (Mateo:15–17).
Ngem idi agangay, iti bilinna ken ni Pedro, inikkan ti Apo isuna ken datayo iti pangiwanwan nga agbalin a pudno a napasurot ken mataginayon dayta a pannakapasurot iti tungpal biag. Kastoy kinuna ni Jesus: “Ket sika inton makapagbabawikan, pabilgem dagiti kakabsatmo” (Lucas 22:32).
Insuro ni Jesus ni Pedro nga adda pay la dakkel a panagbalbaliw a nasken a nalablabes pay ngem ti kaadda ti pammaneknek iti pannakabael nga agpanunot, makarikna, ken agtignay a kas pudno a napasurot a disipulo ni Jesucristo. Dayta ti nabileg a panagbalbaliw a kalkalikagumanayo amin. Apaman a magun-odtayo daytoy, kasapulantayo dayta a panagbalbaliw nga agtultuloy agingga iti gibus ti mortal a pannakapadastayo (kitaen iti Alma 5:13–14).
Ammotayo manipud iti bukodtayo a padas ken manipud iti panagserbitayo iti dadduma a saanto nga umdas ti kaadda ti sumagmamano a naindaklan a kanito ti naespirituan a bileg. Inlibak ni Pedro nga am-ammona ti Mangisalakan uray pay kalpasan a nakaawat iti saksi babaen ti Espiritu a ni Jesus ti Cristo. Ti Tallo a Saksi ti Libro ni Mormon ket addaanda iti direkta a pammaneknek a naited kadakuada a ti Libro ni Mormon ket balikas ti Dios, ngem idi agangay kimmapuyda iti kabaelanda a mangkanunong ken ni Joseph Smith kas Propeta ti Simbaab ti Apo.
Kasapulantayo ti panagbalbaliw iti puspusotayo, kas nailadawan iti libro ni Alma: “Ket inrakurakda amin kadagiti tao ti agpapada a banag—a nabaliwanen ti puspusoda; nga awanen ti tarigagayda a nga agaramid iti dakes” (Alma 19:33; kitaen met iti Mosiah 5:2).
Insuronatayo ti Apo a no pudno a napasurottayo iti ebangheliona, agbalbaliwto ti puspusotayo manipud kadagiti managimbubukod a pakaseknan iti serbisio a mangparegta iti dadduma bayat ti panagtignaytayo nga agturong iti agnanayon a biag. Tapno magun-od dayta a pannakapasurot, mabalintayo ti agkararag ken agtrabaho a sipapammati tapno agbalin a baro a parsua a maaramid babaen ti Pannubbot ni Jesucristo.
Mairugitayo babaen ti panagkararag para iti pammati nga agbabawi iti kinamanagimbubukod ken para iti sagut ti panangipateg nga ad-adda pay kadagiti sabali ngem iti bagbagitayo. Makapagkararagtayo para iti bileg a mangikkat iti kinapalangguad ken panagilem.
Ti kararag ti agbalinto pay a tulbek iti panangawattayo iti sagut ti ayat para iti balikas ti Dios ken iti ayat ni Cristo (kitaen iti Moroni 7:47–48). Agkadua dagiti dua. No basaen, utoben, ken ikararagantayo ti balikas ti Dios, maadaltayo nga ipateg daytoy. Inkabil ti Apo daytoy iti puspusotayo. No mariknatayo dayta nga ayat, marugiantayto nga ayaten ti Apo nga ad-adda pay. Babaen iti dayta sumangbayto ti ayattayo kadagiti sabali a kasapulantayo tapno mapapigsatayo dagitay inkabil ti Dios iti dalantayo.
Kas pagarigan, makapagkararagtayo tapno mangilasin kadagiti pasuruan ti Dios kadagiti misionario. Makapagkararag dagiti full-time misionario a sipapammati tapno maammmuan babaen ti Espiritu no ania ti isuro ken ipaneknek. Makapagkararagda a sipapammati nga ipariknanto koma ti Apo ti ayatna iti tunggal maysa a maam-ammoda. Saanto a mayeg dagiti misionario ti tunggal maysa a maam-ammoda iti danum ti panagbuniag ken iti sagut ti Espiritu Santo. Ngem mabalinda a maaddaan iti Espiritu Santo kas maysa a kadkadua. Babaen ti serbisioda ken addaan iti tulong ti Espiritu Santo, dagiti misionario, kalpasanna, ket agbalbaliwto iti puspusoda iti dayta a panawen.
Mapabaronto dayta a panagbalbaliw manen ken manen bayat ti siaayat a panangitultulotayo nga agtignay a sipapammati a mangpapigsa kadagiti sabali babaen ti ebanghelio ni Jesucristo. Saanto a maysa laeng a pasamak ti pannakapasurot wenno conversion wenno maysa a banag nga agpaut laeng iti maysa a tiempo ti panawen ti biag no di ketdi agtultuloy a proseso. Makapagbalin ti biag a naranraniag agingga iti naan-anay nga aldaw, no makitatayto ti Mangisalakan ken matakuatantayo a nagbalintayon a kas kenkuana. Inladawan ti Apo ti panagdaliasat iti kastoy: “Silaw dayta nagtaud iti Dios; ket isu nga umawat iti lawag, ken agtultuloy iti Dios, umawat iti ad-adu a lawag; ket rumanraniag a rumanraniag dayta a lawag agingga iti naan-anay nga aldaw” (DkK 50:24).
Ikarik kadakayo a posible dayta iti tunggal maysa kadatayo.
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus tiFirst Presidency Message, February 2015. Ilokano. 12582 864
Panangisuro manipud iti Daytoy a Mensahe
Inusar ni Elder David A. Bednar ti Korum dagiti Sangapulo-ket-dua nga Apostol ti “pangngarig maipapan iti atsara” tapno isurona a ti pannakapasurot wenno conversion ket agtultuloy a proseso imbes a maminsan laeng a pasamak: “Binatog iti kada binatog ken pammilin iti kada pammilin, in-inut ken saan a madmadlaw, dagiti panggeptayo, dagiti panunottayo, dagiti balikastayo, ken dagiti aramidtayo agbalindanto a maikaykaysa iti pagayatan ti Dios” (“Ye Must Be Born Again,” Liahona, Mayo 2007, 19). Sublianyo nga adalen ti pangngarig maipapan iti atsara kadagiti sursuruanyo. Ania ti maaramid ti tunggal maysa kadatayo tapno makapagtultuloytayo a sititibker iti in-inut a proseso ti pannakapasurot wenno conversion nga agpada nga inlawlawag da Presidente Eyring ken Elder Bednar?